Ağdam Rayon İcra Hakimiyyəti rayonun Dördyol qəsəbəsində ucaldılan Türkiyə və Azərbaycan bayraqlarının endirilməsi iddialarına cavab verib.

GundemXeber.Az bildirir ki, icra hakimiyyətinin İnformasiya təminatı və təhlil sektoru şöbəsinin müdiri Vüsal Mirzəyev Oxu.Az-a açıqlamasında məsələnin yanlış anlaşıldığını deyib. Onun sözlərinə görə, heç kim bayrağı endirmək istəməyib:

“Xeyr, bayraqların endirilməsindən söhbət gedə bilməz. Orada sadəcə olaraq bayraqların standartlara uyğunlaşdırılması məsələsi var. Bayraqların hər biri fərqli ölçüdə idi. O səbəbdən eyni ölçüdə olması və daha yaxşı görünməsi üçün standart formada olan bayraqlarla dəyişdirilib. Vətəndaşlarla yaranan narazılıq da aradan qaldırılıb. Məsələ öz həllini tapıb. Həm Azərbaycan, həm də Türkiyə bayraqları hazırda öz yerindədir”.

Qeyd edək ki, bir qrup şəxs sosial şəbəkədə video yayaraq, polis əməkdaşlarının Azərbaycan və Türkiyə bayraqlarının endirilməli olduğunu dediyini iddia etmişdi.

Gundemxeber.Az