Məhbub Zülfüqarli səfirlərdən sığınacaq istəməyə məcbur oldu

İmişlidə fəaliyyət göstərən hüquq müdafiəçisi və journalist Məhbub Zülfüqarlı illərdir ki, yerli məmurların təqib və təzyiqlərinə məruz qalır. Bu yazıda da həmin məmurlardan, onların Məhbub bəyə təzyiqlərindən bəhs edəcəyik.

İmişlinın varlı məmurları

Qeyd edək ki, deputat Əsabil Qasımovdan sonra əslən İmişlidən olan tikinti kralı Ə.Şükürov rayonun varlı adamları sırasında üçüncü yerdə gəlir. İkinci yeri Bakıda və İmişlidə bazar və çoxsaylı obyektləri olan Əziz Quliyevdir tutur ki, o, 25.09.2008-ci ildə məhkəmədə Məhbub bəy barəsində 1 il hökm, 3 000 manat cərimə kəsdirmiş, onu polis və məhkəmələr girdabına salmışdı. Əziz Quliyev CPM-in 147.3-148-ci maddələri ilə iddia qaldıraraq, 50 000 manat təzminat istəmişdi. Amma Məhbub bəy onu təhqir etməmiş, böhtan atmamışdı. Əziz Quliyev iddiasında göstərmişdi ki, psixoloji sarsıntı keçirib, xəstəxanaya düşüb və s. Onun Məhbub bəyi 3 ildən 8 ilə qədər həbs etmək planından birinci xanım Mehriban Əliyeva, ABŞ-ın o vaxtkı səfiri En Dersiyə şikayət edilmişdi. O zaman Azərbaycan Demokrat Partiyası, mətbuat, xüsusilə “Hürriyyət” qəzetinin o vaxtkı redaktoru Süleyman Məmmədli jurnalistin müdafiəsinə qalxmışdı. Nəticədə məhkəmə Məhbub bəy barəsində 1 il icbari hökm, 3 000 manat cərimə cəzası çıxarmaqla kifayətləndi.


Məhkəmə sədrinin acı etirafı


İmişlidən gedən ərəfədə məhkəmə sədri Süleyman Ağayev bu məsələ ilə bağlı maraqlı bir etiraf etmişdi. O, demişdi ki, “Məhbub bəyə sual verdim ki, niyə özünü cəncələ salır, bu ölkədən getmirsən, onun cavabı məni ağlatdı”.


Məhbub bəy o zaman ona belə cavab vermişdi: “Bu ölkədə 80 yaşlı anam var, onu qoyub gedə bilmərəm”.

Məhkəmə sədri bildirmişdi ki, mətbuat onu biabır edib və övladları məhkəmə sədrini qınayıb ki, ata, axı niyə bizi biabır edib, qarğış yiyəsi olmusan. Süleyman Ağayev övladlarına bildirib ki, sifariş çox yuxarıdan idi, Məhbub bəyə bu hökmü oxumalı idi.


Əvəz Şükürovun “işverənləri”


Məhbub bəy İmişlinin varidatına görə üçüncü kapitalisti sayılan Əvəz Şükürovun da təzyiqlərinə məruz qalıb. Əvəz Şükürov Ə. Quliyevdən də irəli gedərək, Məhbub bəyin üzərinə “işverənləri”, Reina qatili, özbək əsilli Abdulkadir Maşaripova bənzəyən Ceyhun adlı işçisini göndərib. Ancaq onlar da Məhbub bəyi susdura bilməyib.

Avtoyol rəisi Şükür Aslanov 30 avqust 2016-cı ildə İmişli Rayon Polos Şöbəsinin rəis əvəzi Habil Ağayevə şikayət verib. Polis şöbəsində Məhbub bəy 3 saat müddətində məşhər ayağına çəkilib. Bütün bunlara dözməyən Məhbub bəy onlara “sizin sifətinizi görməkdənsə, həbsxanada oturmaq şərəfdir” deyib.

Rəis əvəzi Habil Ağayev 12 nəfər avtomobil müfəttişi və serjantları Məhbub bəyin üzünə durdurmaq istəsə də, alınmamışdı. Bəs, buna səbəb nə idi? Məhbub bəy həmin gün Ahıl Ziyalılara Qayğı İB-in sədri Nəsrulla Nurullayev, vəkil Azər Rəsulovla Gənclər Mərkəzində tədbir keçirməli idi. Tədbirə Prezident Administrasiyasından icazə verilmişdi. Rayonun polis rəsmiləri isə elə başa düşüblər ki, gələn qonaqlar eks-spiker Rəsul Quliyevin adamlarıdır. Ancaq sonradan bu səhvlərini başa düşüb Məhbub bəyi azad etdilər.



“O, istənilən adamı tutdura və ya əfv edə bilər”


Ancaq bu hadisədən 1 ay əvvəl - 9 yanvar 2016-cı ildə Məhbub bəy İmişli RPŞ rəisi A.Cəfərova Əvəz Şükürovdan şikayət etmişdi. Rəis isə dostu Əvəz Şükürovun xətrinə dəyməmişdi. Bəs, Məhbub bəyin Əvəz Şükürovun qəzəbinə gəlməsinin səbəi nədir? Məhbub bəy “Gündəm-Xəbər” və “Turan-İnfo” portallına yazdığı yazıda bildirmişdi ki, Yalavac kənd sakinləri bələdiyyə sədri Qəhrəman Qəhrəmanovun hərracsız və saxta sənədlə kəndin mal bazarı ərazisini və örüş yerini Əvəz Şükürova satmasından narazıdır. Bu alqı-satqı zamanı bələdiyyə büdcəsinə bir qəpik də köçürülməmişdi. Həmin gün 200 nəfər kənd sakini, ağsaqqallar etiraz edərək, mitinq keçirdilər. Mitinqin bir-neçə iştirakçısı polisə aparılaraq, izahatları alınıb, sərbəst buraxıldılar. Əvəz Şükürov və yaxınları isə rayonu talan etməkdə davam edirlər. Hal-hazırda Pambıq MTK-nın rəis müavini Əvəz Şükürovun qardaşı Məcnun Şükürovdur. Qardaşı oğlu İlkin isə Avtoyol rəisinin müavinidir. Cavadxanlı kənd sakini Əfqan Həsənovun dişlərini qırdıran, şikayət etdikdə, onu həbs etdirən insanlardan nə gözləmək olar? Həbsdən çıxandan sonra Əfqan bəy dünyasını dəyişdi. Əvəz Şükürovun yaxınlarından biri deyir ki, “o, istənilən adamı tutdura və ya əfv edə bilər.”


Jurnalist mühacirəti seçir

Onu da qeyd edim ki, Əvəz Şükürovun oğlu Bayram Şükürov keşmiş MTN generalı Mövlan Şıxəliyevin köməkçisi olub. İmişlidə baş verənlərlə bağlı Dövlət Təhlükəsizliyi Xidməti rəhbərliyinə şikayətin tam surəti məndədir. Məhbub bəy mafiyanın qələmini sındıra bilmədiyinə görə sığınacaq istəməkdə gecikib. 30 ildir təqiblərə məruz qalan, dissident həyatı yaşayan Məhbub bəy ömrünün şirin çağlarını imkansızlara, ahıllara, şəxsən fransız əsilli Botto Jan İvonnaya, dövlətə sərf edib və halallıq verib. Rayonda çoxları onu Əbülfəz Elçibəylə müqayisə edir, azadlıq yolçusu, azad insan kimi qiymətləndirir.

Məhbub bəy azad insan kimi, təqib, həbs, həqarətlərdən yorulub. Atası Əvəz Zülfüqarov 52 yaşında dünyasını dəyişərkən Məhbub bəyə bunları vəsiyyət edib: “On bacı-qardaşın taleyini sənə tapşırıram.” Gecələr oxuyub, gündüzlər bacı-qardaşlarına kömək edib. Hazırda isə xalqı, dövləti sarsıdan mafiyaya qarşı mübarizə aparır. Ancaq onun gücü yetərli deyil. İki yol ayrıcındadır: Ya vətəndə qalıb təqibolunmaq, həbsə alınmaq, ya da mühacirlik.


Əsabil Qasımovun xalası oğlu həbsdən necə çıxdı?

O, illərdir rayonda baş verən qanunsuzluqlara dözmür, göz yummur, vaxtaşırı bu barədə mətbuatda məqalələr yazır. Onun yazdığı faktlardan birinə diqqət yetirək. İmişlinin deputatı Əsabil Qasımovun xalası oğlu Nazim Xəlilov 2012-ci ilin iyulunda ƏƏSMM rəisi kimi həbs olundu, ona 6 il hökm oxundu. Lakin o, iki ildən sonra kiminsə əli ilə (Əsabil deyilsə, bəs kim?) azadlığa çıxdı, yığdıqlarını xımır-xımır xərcləyir, şahanə ömür sürməkdədir. Hazırda isə Gəncədə Əsabil Qasımovun un dəyirmanına rəhbərlik etməkdədir. Səlim Müslümov isə birləşmiş mətbuatın hədəfində olan İntiqam Əliyevi mətbuatın acığına mükafatlandırır. İntiqam Əliyev Nazim Xəlilovun ata-anasına rəhmət oxudur. İmişlidə işıq smart-kartladır. 10 manat pul ödəyənlərdən əvvəlcədən iki manat tutulur ki, Azərişıq belə istəyir. İmişlidə Cəbrayıl köçkünlərini təxribata çəkən İmişli Regional işıq idarəsinin rəisi Mətləb Həsənovu və müavini yuxarıların göstərişi ilə “dənləmişdilər”. Mətləb Həsənovu təzə gələn rəisə müavin, Mətləbin müavini olmuş Yusifi isə (hansı əsasla?) Cəbrayıl köçkünlərinə işıq rəisi təyin edib. Deməli, İmişli və Cəbrayıllı kadrlar işə yaramırlar. Kimin “arxası” varsa, pulu çoxdursa haqqlıdır. İmişlidəki məmurların bir çoxu sərvətlərinə və vəzifələrinə görə cəmiyyətin sayılan şefləri olsalar da, sovet vaxtı onlara 5 qoyunu belə otarmağa verməzdilər.


Reket qəzetlər harın məmurları müdafiə edir
Ancaq bəzi reket qəzetlər bu harın məmurları müdafiə edir, onların sifarişi ilə yazı yazırlar. Həmin reket jurnalistlər heç vaxt onıar kimi sifarişlə yazı yazmayan jurnalist, hüquq müdafiəçi Məhbub Zülfüqarlını təhqir edirlər. Dövlət rəsmiləri qoy bu yazını oxuyub, müqayisə etsinlər. Niyə Məhbub bəy iddia qaldıranda, hansısa bazarlar və kapitallar sahibi Əziz Quliyev, eləcə də hazırda imişliləri təxribata çəkən Əvəz Şükürov məsuliyyətə cəlb olunmadı. Nədən Məhbub bəyin bütün 30 illik fəaliyyəti ərzində etdiyi şikayətlər onun özünə qarşı çevrildi. Bu nə cür dövlətdir? Bu necə idarəetmədir?


Jurnalistə qarşı sui-qəsd cəhdləri

Məhbub bəy o qədər təqib və təzyiqlərlə üzləşib ki, o, öz ölkəsində qəribdir. Özünü yad kimi hiss edir. Yerli məmurlar ötən 30 ildə ona olmazın əzablar yaşadıb. Hətta onun həyatına sui-qəsd belə edilib. Belə ki, yerli məmurların göstərişi ilə onu iki dəfə zəhərləyiblər. O, yalnız Tanrının mərhəməti sayəsində sağ qalıb. Hazırda Məhbub bəy mühacirət etmək məcburiyyəti qarşısında qalıb. Məgər bu ölkəyə azad insan, həqiqətləri yazan jurnalist lazım deyil? Blogger Mehman Hüseynov, Qənimət Zahid, Mirzə Sakit kimi Məhbub Zülfüqarlı da daim təqib olunub, polis özbaşınalıqları ilə qarşılaşıb, yerli mafiyanın ağılasığmaz zorakılığı ilə üzləşməyib. Məhbub bəyin gənclik ayaması “Komissar Katani” olub. Mafioz Tanolar və Komissar Katani. Onu indi qəbul etməyən deputat Çingiz Qənizadə, vəkil-siyasətçi Qurban Məmmədov, sevdiyi sədri Sərdar Cəlaloğlu da Məhbub bəyi belə adlandırıb, çağırıblar. Sərdar bəyin sayəsində, onun nəsihətindən sonra qisas hissindən uzaqlaşıb, qeyri-zoraki mübarizəni qəbul etmiş Məhbub Zülfüqarlı mühacir həyatını seçmək istəməsə də, buna məcburdur. Öz rayonunda ona rahat yaşamağa imkan vermirlər.

Bu yazını sevimli şairimiz Ramiz Rövşənin məşhur şeirindən bir bəndlə bitirmək istəyirəm:

Sənə bir daş atar yerindən duran,
Səni sevdiklərin daş-qalaq eylər.
Bir əlində daş var, birində Quran
Daş atan bilirmi nə günah eylər?

Həsən Dərya