Məhkəmə təqsirli bilinənləri cəzalandırdı, onlardan birinin cəzası aşağı salındı

Narkotik alverində ittiham olunan Qax rayon sakinləri Nurlan Orucov, Nahid Mirzəyev və Eldəniz Mirzəyevin cinayət işi üzrə məhkəmə prosesi başa çatıb.
İttihama görə, Nahid Mirzəyev satış məqsədi ilə külli miqdarda narkotik vasitə əldə etmək, saxlamaq, daşımaq və sataraq əldə olunacaq gəliri aralarında bərabər bölmək məqsədi ilə əmisi Eldəniz Mirzəyev və tanışı Nurlan Orucov ilə razılığa gəlib. Bu məqsədlə Nahid Mirzəyev istintaqa məlum olmayan mənbədən və vaxtda satış məqsədi külli miqdarda, ümumi təmiz çəkisi - 1015,31 qram olan narkotik vasitə qurudulmuş marixuananı əldə edib. O, həmin narkotik vasitənin 2,15 qramını üstündə saxlayıb, qalan 1013,16 qramını isə bir ədəd sintetik torbada əlində daşımaqla yaşadığı Qax rayonu Zəyəm kəndində yerləşən evinin qarşısına gətirib. Orada əmisi Eldəniz Mirzəyev və tanışı Nurlan Orucovla görüşüblər. Onlar 13 oktyabr 2016-cı il tarixdə dövlət qeydiyyat nişanı və markası məlumolmayan avtomobillə Qax-Zaqatala avtomagistral yolunun Zaqatala rayonunun inzibati ərazisindən keçən giriş hissəsinə gətiriblər.

Bu barədə daxil olmuş məlumat əsasında Qax rayon polis şöbəsinin əməkdaşları tərəfindən keçirilmiş əməliyyat-axtarış tədbirləri zamanı adı çəkilən şəxslər
saxlanılıb. Təqsirləndirilən şəxslər Cinayət Məcəlləsinin 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) və 234.4.3-cü (külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham olunublar. Təqsirləndirilən şəxslərin barəsində olan cinayət işi baxılması üçün Şəki Ağır Cinayətlər Məhkəməsinə göndərilib. Cinayət işi hakim Xəqani Səmədovun sədrlik etdiyi kollrgiyada araşdırılıb. Məhkəmədə təqsirləndirilən şəxs qismində ifadə verən Nurlan Orucov ona qarşı elan edilmiş ittiham üzrə
özünü təqsirli bilib. O, bildirib ki, oktyabrın 12-də səhər saatlarında tanışı Nahid və onun əmisi Eldəniz ilə onların yaşadıqları Qax rayonunun Zəyəm kəndində
görüşüb: “Orada olarkən Nahid bildirdi ki, bir müddət əvvəl Zəyəm kəndində yabanı halda bitmiş nəşə kollarından yığaraq ümumilikdə 1–1,5 kiloqram çəkidə
narkotik vasitə nəşə əldə edib və həmin nəşəni də yığdığı yerdə gizlədib. Nahid dedi ki, əmisi Eldənizlə birgə nəşəni satmaq istəyib, lakin sata bilməyiblər”.
Nurlan Orucov qeyd edib ki, Nahid ona nəşəni satmaq üçün müştəri tapmaqda köməklik etməyi təklif edib: “Əvvəlcə razılaşmasam da, sonradan Nahid əldə olunan
gəlirin 3 yerə bölünəcəyini, mənə də pul verəcəklərini dediyindən razılaşdım. Bildirdim ki, adi halda qara bazarda həmin miqdarda nəşənin qiyməti 6000
manatdır. Ona görə də belə qərara gəldik ki, həmin nəşəni 6000 manata sataq və əldə olunan gəliri də adama iki min manat olmaqla aramızda 3 yerə bölək.
Sonradan özüm də həmin nəşəyə baxdım və yabanı halda olsa da, nəşənin yaxşı olduğunu bildirdim. Təklif etdim ki, Zaqatala rayonunda bu işlərlə məşğul olan adamlar çox olduğundan nəşəni orada sataq”. Təqsirləndirilən şəxsin sözlərinə görə, toplanan nəşəni Zaqatala rayonunda hardasa gizlətmək qərarına gəliblər:
“Nahidgilin Zaqatala rayonu Aşağı Tala kəndində olan məcburi köçkünlər üçün nəzərdə tutulmuş şəhərcikdə evləri olduğundan razılığa gəldik ki, narkotik vasitəni həmin evə apararaq orada saxlayaq. Oktyabrın 13-də, saat 14-15 radələrində Nahidin yaşadığı evin qarşısında görüşərək hər üçümüz yola çıxdıq və taksi ilə Zaqatala
rayonuna getdik. Zaqatala şəhərinin girəcəyində həmin avtomobildən düşdük ki, başqa taksiyə minək. Təxminən 5-10 dəqiqə sonra bizə bir neçə nəfər mülki
geyimli şəxslər yaxınlaşaraq özlərini təqdim etdilər və Qax rayon polis şöbəsinin əməkdaşları olduqlarını bildirdilər. Polis əməkdaşları bizim narkotik vasitələrin
qanunsuz dövriyyəsi ilə məşğul olmağımız barədə məlumat aldıqlarını söylədilər. Sonra onlarla birgə şöbəyə getməli olduğumuzu bildirdilər. Birlikdə polis
şöbəsinə gəldik. Orada üstümüzə baxış keçirildi, baxış zamanı Eldəniz Mirzəyevin əlində olan bir ədəd ağ rəngli torbanın içərisində bir ədəd qırmızı və bir ədəd
qara rəngli torbada cəmi 1 kiloqrama yaxın narkotik vasitə nəşə aşkar olundu. Nahid Mirzəyevin üstünə baxış keçirilən zaman əynində olan boz rəngli
gödəkçənin sağ yan cibindən bir ədəd sellofan bükümdə nəşə aşkar edildi. Bundan sonra aşkar olunmuş narkotik vasitələr qablaşdırıldı və üzəri imzalanaraq
möhürləndi”.
Nurlan Orucov istintaq zamanı verdiyi ifadəsinin bəzi hissəsini təkzib edib. O, Nahidə yabanı halda çöldə bitən çətənə bitkisinin 300-400 dənə toxumunu verməsi, Nahidin isə bir müddət sonra həmin toxumları meşədə əkməsi, narkotikin satılmasında iştirak etməməsi, Nahidin və Eldənizin tutulmasından sonra onun polis
əməkdaşları tərəfindən həbs edilməsi barədə dedikləri ilə bağlı bildirib ki, həmin ifadəni özünümüdafiə məqsədilə verib, hesab edib ki, bununla onlara yalnız
narkotik bitkinin əkilib-becərilməsi cinayətini törətməyə görə cəza təyin olunar. İfadəsində həmçinin törətdiyi əmələ görə peşmançılıq çəkdiyini deyib. Nahid Mirzəyev və Eldəniz Mirzəyev də təqsirləndirilən Nurlan Orucovun ifadəsi ilə eyni məzmunlu ifadələr veriblər.Məhkəmə şahid ifadələrini dinləyəndən sonra hökm
elan edib. Məhkəmənin hökmü ilə təqsirləndirilən şəxslərin hər biri 5 il 6 ay müddətinə azadlıqdan məhrum ediliblər. Hökmdən narazı qalan Nurlan Orucov apelyasiya şikayəti verib. O, barəsində daha yüngül cəza təyin edilməsini xahiş edib. Onun şikayəti araşdırılması üçün Şəki Apelyasiya Məhkəməsinə göndərilib.
Hakim Mirbahəddin Hüseynovun sədrliyi ilə baş tutan prosesdə Nurlan Orucovun apelyasiya şikayətinin dəlilləri araşdırılıb. Məhkəmə sonda Nurlan Orucovun apelyasiya şikayətinin qismən təmin edilməsi barədə qərar qəbul edilib.
Şəki Ağır Cinayətlər Məhkəməsinin hökmü Nurlan Orucova aid hissədə dəyişdirilib və onun cəzası 5 ilə endirilib. Hökm qalan hissədə dəyişdirilməyib.

Aslan
"Gündəm xəbər"