“Onu da qeyd edim ki, manyak həddən artıq ayıq, soyuqqanlı və savadlı olduğuna görə, onu ifşa etmək olduqca çətin olub”

“Gündəm Xəbər”in ötən sayında xüsusi amansızlıqla törədilən qətl hadisələri, ələlxüsus müəyyən yaş həddinə çatan uşaqlara, azyaşlılara və s. qarşı edilən seksual zoraklıq hadisələri və digər xoşagəlməz olaylarla bağlı suallarımızı ixtisasca hüquqşünas olan, keçmiş siyasi məhbus, Xüsusi Dövlər Mühafizə Xidmətinin sabiq zabiti Asif Lətifova ünvanlayıb, müəyyən cavabları əldə etmişdik. Bu gün də adı çəkilən şəxsdən müəyyən məsələlərlə bağlı münasibətini öyrənməyə çalışdıq. O, bir çox məsələlərlə bağlı, o cümlədən hələ bir neçə il bundan əvvəl özünün üz-üzə qaldığı olayla bağlı yanaşmasını ortaya qoyaraq vurğuladı ki, “2012-ci ilin avqust ayında heç bir cinayət tərkibli əməlim olmadığı halda, verilmiş sifariş əsasında 5 il 6 ay müddətinə azadlıqdan məhrum edildim. XDMX-də aparılan araşdırmalar zamanı guya göndərdiyim, əslində isə heç vaxt göndərmədiyim “SMS”-i qarşıma qoydular. Çünki, biz gündəlik xidmətdə olarkən mobil telefonlarımızı söndürüb xüsusi piramida şkafına qoyurduq. Orada yazılmışdır ki, guya mən kiminləsə əlaqə saxlamışam və müəyyən məlumatları kimlərəsə də çatdırmışam. Çox keçmədi ki, mənimlə bağlı XDMX-də əsası olmayan gülünc materiallar topladılar. Ona görə bu gün də vurğulamaq istəyirəm ki, hər zaman məhkəmə hakimi toplanmış iş materiallarına diqqətlə və tənqidi yanaşmalı, toplanan sübutlara müstəqil qiymət verməyi bacarmalıdır. Onu da unutmaq olmaz ki, hökmü hakim məhkəmənin adından deyil, məhz Azərbaycan Respublikasının adından çıxarır”.
Siz xüsusi dövlət qurumunun zabiti olmusunuz və vaxtilə Andrey Romanoviç Çikotilo adlı şəxsin qol qoyduğu əməllər ciddi səs-küyə səbəb olmuş bir hadisə olaraq, hələ də yaddaşlardan silinməyib. Siz həmin hadisənin təfərrüatları barədə nəsə demək istəyirsinizmi?
-Bəli, isətəyirəm. Mən 1936-cı ildə anadan olmuş və 1980-cı illərdə dünyaya səs salan, Ukrayna əsilli Andrey Romanoviç Çikotilo haqqında müəyyən açıqlama söyləmək istəyirəm. Adını çəkdiyim bu şəxs 1978-ci ildən 1990-cı ilə kimi üstüstə 56 ölüm hadisəsi törədir. Bunlardan yalnız 53-nü sübuta yetirmək mümkün olur. 21 azyaşlı oğlan uşağını, 14 azyaşlı qız uşağını və 18 qadını öldürdükdən sonra, bu şəxs ölmüş şəxslərin meyitlərini zorlayır, həmçinin meyitlər üzərində təhqiramiz hərəkətlər də həyata keçirir. Təsəvvür edin ki, həmin illərdə Çikotilo haqqında Qərb mətbuatı yazır ki, Sovetlər Birliyində hansısa “MİSTER-X” gözəgörünməz bir manyak peyda olur və onu ələ keçirmək müşkül məsələyə çevrilir. Bu şəxsi istintaq orqanları 1984-cü ildə şübhəli şəxs qismində saxlayır və ondan qan analizi götürərkən, Çikotilonun qan qrupu 2-ci qrup olduğu müəyyən olunur. Meytlərdən götürülmüş analizlərdə isə, onların 4-cü qrupa məxsus olduğu bəlli olur. Həmin vaxtlarda ekspertiza və laboratoriya bugünkü kimi inkişaf etmədiyindən və əldə lazımınca sübut olmadığına görə, Çikotilonu sərbəst buraxırlar. Çox keçmir ki, manyak öz cinayətlərini bir-birinin ardınca davam etdirir. Onu da qeyd edim ki, manyak həddən artıq ayıq, soyuqqanlı və savadlı olduğuna görə, onu ifşa etmək olduqca çətin olur. 12 ildən sonra, yəni 1990-cıı ildə Çikotilo təkrar hüquq-mühafizə orqanı əməkdaşları tərəfindən şübhəli şəxs qismində saxlanılır və onun savadlı olması, istintaqçıların işini bir daha çətinə salır. İstintaqı aparanlar son anda məcbur olduqlarından, istintaqa psixiatr Aleksandr Buxanovskini dəvət edirlər. Başlıca məqsəd psixiatrın manyakla söhbət aparması və onun etdiyi hərəkətləri səmimi etiraf etməsinə nail olmaq olur. Həkim Buxanovski manyakla 9 gün ardıcıl söhbət aparır və nəticədə Çikotilo hər şeyi səmimi etiraf edir. Hətta, 12 il ərzində öldürdüyü və basdırdığı meytlərin yerlərini də göstərir. İstintaqçılar Buxanovskinin hipnoz vasitəsilə manyakı dindirməyə nail olduğunu bildirsələr də, həkim onların fikirini qəti surətdə inkar edir və baş verənlərin peşə sirri olduğunu bildirir. Keçirilən məhkəmə prosesi zamanı manyak lüt soyunur və özünün “şizofreniya” xəstəsi olmasını sübut etməyə çalışsa da, məhkəmə onu anlaqlı şəxs hesab edir və son anda Çikotilo ən ağır cəzaya, ölüm cəzasına layiq görülür. Ölüm hökmü icra olunmazdan əvvəl, onun son sözü “bağışlayın, sizi çox incitdim, ona görə də əmri tez icra edin. Çünki, mənim yaşamaq haqqım yoxdur” olur. 14 fevral 1994-cü il tarixdə səhər saatlarında manyakı güllələyirlər. Çox keçmir ki, onun həyat yoldaşı, övladları utandıqlarından Çikotilo soyadını dəyişirlər və yaşadıqları evi satıb başqa şəhərə köçürlər”. Bu və ya digər olaylarla bağlı növbəti saylarımızda.

Cəfər
"Gündəm Xəbər"