2019-cu ilin birinci yarısında Azərbaycanda insan hüquqları və demokratik azadlıqların təmin edilməsində ciddi problemlər baş verib.

Ölkədə müxalifətə, mətbuata, vətəndaş cəmiyyəti fəallarına qarşı siyasi təzyiqlər, polis zorakılığı və işgəncələr, sərbəst toplaşmaq azadlığının məhdudlaşdırılması halları davam edib, korrupsiyanın ləğvi istiqamətində ciddi addımlar atılmayıb. Bu dövr ərzində müxalifət fəalları, jurnalistlər, blogerlər və vətəndaş cəmiyyəti fəalları hakimiyyəti tənqid etdiyinə görə həbs edilib, polis təqibinə və işgəncələrə məruz qalıb, onların özləri, ailə üzvləri və qohumları işdən qovulub. Bu ilin ilk yarısında Azərbaycanda ifadə azadlığı xeyli məhdudlaşdırılıb və müstəqil jurnalistlərin azad fəaliyyət göstərməsi üçün heç bir şərait yaradılmayıb. Azərbaycanda sərbəst toplaşmaq azadlığı kəskin məhdudlaşrılıb. Müxalifətin bu ilin yanvarında keçirdiyi mitinq sonuncu razılaşdırılmış aksiya olub və bundan sonrakı mitinqlərə icazə verilməyib. 2019-cu ilin ilk altı ayı ərzində Azərbaycanda vətəndaş cəmiyyətinə təzyiqlər davam etdirilib. Qanunvericiliklə QHT-lərə tətbiq edilmiş məhdudiyyətlər bu ildə də qüvvədə saxlanılıb və onların xarici fondlardan maliyyələşməsi qanunla qadağan olunub. Bu dövr ərzində Azərbaycanda işgəncə və zorakılıq halları davam edib. Həbsxanalarda məhkumların siyasi diskriminasiyaya məruz qalması və xüsusi qəddarlıqla döyülməsi faktları aşkar edilib. Azərbaycan bu ilə beynəlxalq korrupsiya indeksində geriləməsi ilə daxil olub və vəzifəli şəxslərin bizneslə məşğul olması, bu məqsədlə rüşvət verilməsi və dövlət vəsaitlərinin mənimsənilməsi adi hala çevrilib. Bütün bunlar ötən il Azərbaycanda insan hüquqlarının vəziyyətini əks etdirən hesabatımızda öz əksini tapıb. Yaxın günlərdə hesabat ictimaiyyətə təqdim ediləcək və beynəlxalq təşkilatlara, diplomatik nümayəndəliklərə veriləcək.

Elçin Məmməd
Hüquq Müdafiəçisi