“Gubad İbadoğlu işi” çərçivəsində həbs edilən Fazil Qasımov və Anar Əliyevin məhkəmə prosesi yanvarın 31-də Bakı Ağır Cinayətlər Məhkəməsində davam edib. Hakim Mahirə Kərimovanın sədrliyi ilə keçirilən iclasda müdafiə tərəfi prosedur pozuntuları və saxta pul sübutlarının təqdim olunma qaydasına dair narahatlıqlarını ifadə edib.

İclas zamanı Qasımov vəkili Fuad Ağayevlə məsləhətləşmək üçün 10 dəqiqəlik fasilə tələb edib. Lakin Ağayevin sözlərinə görə, bu müddətdə mülki geyimli bir əməkdaş ona qarşı aqressiv davranıb və Qasımov tərəfindən verilmiş sənədin geri qaytarılmasını tələb edib. Vəkil bu mülki şəxsin davranışına etiraz etsə də, hakim buna qiymət verməyib.

Ağayev həmçinin işin Türkiyə tərəfindən terror təşkilatı elan edilən qrup ilə əlaqələndirilməsinin əsassız olduğunu bildirib. O, bir il yarım əvvəl yayılan və Azərbaycanda din xadimi Fətullah Gülənin tərəfdarları ilə əlaqədar keçirilən əməliyyat tədbirləri zamanı dörd nəfərin həbs edildiyini iddia edən media məlumatına diqqət çəkib. Ağayevin sözlərinə görə, bu xəbər səhvən Türkiyənin “Yeni Şafak” qəzetinə istinadən dərc edilib və sonrakı araşdırmalar həmin qəzetdə belə bir məlumatın olmadığını üzə çıxarıb.

Vəkil əlavə edib ki, əvvəllər Azərbaycanda Fətullah Gülən ilə əlaqələndirilən əsas şəxslər – Döyrüş Cəfərov, Gümrah Abdurəhmanov, Ruslan Əliyev və Anar Əliyev fərqli ittihamlarla həbs olunub. O, hüquq-mühafizə orqanlarının əvvəlcə bu şəxslərin üzərində radikal dini materiallar, maliyyə sənədləri və saxta pullar tapıldığını iddia etdiyini, lakin rəsmi ittihamnamədə Fətullah Gülən ilə bağlı heç bir ifadənin olmadığını vurğulayıb.

Ağayev bildirib ki, əvvəlki işlərdə təqdim edilən saxta pullar indi Qasımov və Əliyevə qarşı əsas sübut kimi istifadə olunur.

“Saxta pulların Türkiyədən gətirildiyi iddiası həqiqətə uyğun deyil. Bu banknotlar Azərbaycanda istehsal edilib,” vəkil məhkəmədə deyib.

Müdafiə tərəfi bir neçə vəsatət irəli sürüb, o cümlədən Daxili İşlər Nazirliyinə müraciət edərək əvvəlki işlərdəki saxta pulların hazırkı işdəki pullarla eyni olub-olmadığının müəyyən edilməsini tələb edib. Həmçinin, saxta pulların mənbəyinin araşdırılması və əsas şahid olan Elşən Əliyevin telefon danışıqlarının qeydlərinin əldə olunması ilə bağlı vəsatət verilib. Məhkəmə bütün vəsatətləri rədd edib.

Ağayev daha sonra müdafiə vəsatətlərinin ardıcıl olaraq rədd edilməsinə etiraz edərək, məhkəmənin Qasımovun ədalətli müdafiə hüququnu pozduğunu bildirib. O, prokurorluğu mühüm sübutları, o cümlədən Qasımov və İbadoğlu arasında maliyyə əməliyyatlarını sübut edəcək videomaterialları məhkəməyə təqdim etməməkdə günahlandırıb.

“Prokurorluq iddia edir ki, Fazil Gubad İbadoğludan pul alıb, lakin bunun heç bir videosübutu yoxdur. Bunun əvəzinə, eyni seriyalı saxta pullar bir neçə işdə ortaya çıxır. Bu məlumatı kim verib? Əgər etibarlı mənbədirsə, niyə bu mənbə açıqlanmır? Bəlkə, heç bir mənbə yoxdur?”, Ağayev sual edib.

O, hakim Kərimovanın prosesdən uzaqlaşdırılması üçün vəsatət qaldırsa da, prokurorluq bu tələbi əsassız sayıb. Qısa müşavirədən sonra vəsatətin təmin olunmadığını elan ediblər.

Türkiyədə yaşayan Qasımov 2023-cü il avqustun 8-də İstanbulda həbs olunaraq Azərbaycana gətirilib. Fazil Qasımov Qubad İbadoğluna qarşı qaldırılmış cinayət işinin istintaqı çərçivəsində saxlanılıb və Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) maddəsi ilə ittiham olunur.

Azərbaycan Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1-ci (dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunan Qubad İbadoğlu 2023-cü ilin iyulunda həbs edilib və 2024-cü il aprelin 22-ə qədər həbsdə qalıb.

Çoxsaylı yerli və beynəlxalq çağırışlardan sonra aprelin 22-də İbadoğlunun həbsi ev dustaqlığı tədbiri ilə əvəz edilib.

2024-cü il mayın 21-də isə ev dustaqlığı müstəntiqin qərarı ilə polisin nəzarətinə verilmə ilə əvəz olunub və iş üzrə istintaqın müddəti daha 3 ay (avqustun 20-dək) uzadılıb. Bununla yanaşı, iyulun 29-da İbadoğlu ilə bağlı istintaq qeyri-müəyyən müddətə dayandırılıb. Lakin o, həftədə iki dəfə polisdə qeydiyyatdan keçir, ölkədən çıxışına qadağa qoyulub.

İbadoğlu ona qarşı ittihamların əsassız və siyasi olduğunu, fəaliyyətinə görə cəzalandırıldığını qeyd edir.

Hazırda Fazil Qasımovun cinayət işi Qubad İbadoğlunun cinayət işindən ayrı icraata götürülüb. Bakı Ağır Cinayətlər Məhkəməsində hakim Mahirə Kərimovanın sədrliyi ilə Fazil Qasımov və Anar Əliyevin cinayət işi üzrə məhkəmə prosesi davam edir.

Fazil Qasımov 2024-cü ilin iyunundan həbsdə aclıq aksiyası keçirir, yalnız maye qəbul edir.

Yaxınlarının bildirdiyinə görə, vaxtaşırı bal ilə maye qarışığı qəbul elədiyinə görə orqanizm 6 aydan çox davam edən aclığa tab gətirə bilib./amerikaninsesi.org/