Əli İnsanov: “İndi bilmirəm Fərhad Əliyev mənə qarşı nə iddia qaldırır”

Bu gün Bakı Apelyasiya Məhkəməsində hakim Qədim Babayevin sədrliyi ilə sabiq səhiyyə naziri Əli İnsanovun məhkəmə prosesi keçirildi.
Həmişəkindən fərqli olaraq sabiq nazir bu dəfə məhkəmə zalına proses iştirakçılarından və mətbuat nümayəndələrindən öncə gətirilərək şüşə qəfəsə salındı.

Buna səbəb isə ötən məhkəmə iclaslarında zala daxil olarkən ölkə rəhbərliyinin ünvanına səsləndirdiyi sərt və təhqiramiz ifadələrin bir daha eşidilməməsi istəyi idi. Amma Əli İnsanov bu dəfə daha sərt danışdı.

Məhkəmə prosesində İqtisadi İnkişaf Nazirliyinin iki əməkdaşı - Samir Vəliyev və Rüstəm Aslanov şahid qismində dindirildi.Vəkil Ağaveyis Şahverdi şahiddən özəlləşdirmə ilə bağlı neçə aktda iştirak etdiyini soruşdu. Şahid “iki aktla tanış olub sonra imza etmişik” cavabını verdi.

A.Şahverdi:

-3 akt olub.

Şahid:

-Mənim yadıma gəlmir.

-Siz aktların tərtibində iştirak etməmisiniz. Sadəcə imzalamısınız.

-Biz yoxlanılan tərəf idik. Özümüz özümüzü yoxlamalı deyildik ki...

Əli İnsanov:

-Samir müəllimə təşəkkür düşür. Bu adam məsul vəzifədədir. Deyir oradakı aktların heç birindən xəbərim yoxdur. Onun hər şeydən xəbəri var. Faktiki olaraq imtina edir. Deməli, məni müdafiə edir, deyir ki, xəbərim yoxdur. Doğrudan xəbəriniz yoxdur?

Şahid:

-Mənim konkret vəzifə səlahiyyətlərim vardı. Müəyyən hesabatlar aparılırdı. O vaxt özəlləşdirmə departamenti nazirliyin səlahiyyətində idi.

Ə.İnsanov:

-Mən 12 il nazir işləmiş adamam. Çox yaxşı bilirəm aparat rəhbərinin vəzifəsi nədir. Sizin nazirlə mən həbs olunmuşdum. İndi bilmirəm Fərhad Əliyev mənə qarşı nə iddia qaldırır. Başa düşə bilmirəm, siz bütün sənədləri oxumamış imzalayırsınız? Vay bu hökumətin halına...(səs kəsildi).

Vəkil A.Şahverdi:

-Bu nə deməkdir? Nə sual verməyə imkan verirsiniz, nə də cavab verməyə.

Vəkil Toğrul Babayev şahiddən aidiyyəti olmayan bir akta imza atmasının səbəbini soruşdu. Şahid də cavabında “aidiyyəti olanlar da olub, olmayanlar da” dedi.

Ə.İnsanov:

- Samir müəllim bu qondarma ittihamlarla razı deyil. Nə istəyirsiniz? Onu da həbs etmək istəyirsiniz? Yaraşıq kimi imza qoyub... (səs kəsildi).

Məhkəmədə dindirilən növbəti şahid İqtisadi İnkişaf Nazirliyinin maliyyə şöbəsinin keçmiş müdiri Rüstəm Aslanov oldu. O, prokurorun, vəkillərin və Əli İnsanovun suallarını cavablandırdı.

Əli İnsanov şahiddən aktı oxuyub-oxumadığını soruşdu. Şahid aktı oxuduğunu, ona aid məsələ olmadığına görə bununla bağlı rəyini bildirdiyini açıqladı.

Əli İnsanov:

-Bütün İqtisadi İnkişaf Nazirliyinin maliyyəsinə rəhbərlik etmisiniz. Bütün özəlləşdirilmədən dövlət büdcəsinə 0,5 milyard pul ödənilib...(səs kəsildi).

Vəkil A.Şahverdi sabiq nazirin hüquqlarının pozulması, səs buraxmayan kameradan çıxarılaraq müdafiəçilərinin yanında əyləşdirilməsi ilə bağlı vəsatət qaldırdı. Hakim Ə.İnsanovdan vəsatətə münasibət bildirməsini xahiş etdi.

Ə.İnsanov:

-Niyə imkan vermədiniz maliyyə şöbəsinin müdirindən soruşum, görüm 30 milyard hara gedib.

Məhkəmə kollegiyası vəsatəti əsassız hesab edərək təmin etmədi.

Vəkilin növbəti vəsatəti Əmlak Məsələləri Dövlət Komitəsinin sədri Kərəm Həsənov, səhiyyə naziri Oqtay Şirəliyev və təhsil naziri Mikayıl Cabbarovun məhkəmədə iştirakının təmin edilməsi ilə bağlı oldu. Məhkəmə kollegiyası bu vəsatəti də təmin etmədi.

Ə.İnsanov:

-Bu şüşə qəfəsə mənşəyi məlum olmayan tüstülü hava gəlir, boğur məni.

Hakim ona havatənzimləyici ilə bağlı heç bir problemin olmadığını dedi.

Ə.İnsanov:

-Burada əsl dağ havasıdır, keçiləsi deyil. Cəmiyyətə belə təqdim etmişdilər ki, guya mənim evimdən qızıl külçələri tapılıb. Əgər doğrudan da qızıl külçələri tapılıbsa, buraya gətirsinlər, məhkəmədə nümayiş etdirsinlər. Əgər mümkün deyilsə, deməli...(səs kəsilir).

Hakim onun sözünü kəsərək əgər bir də belə ifadələr işlədərsə, məhkəmə zalından çıxarılacağını və prosesin onun iştirakı olmadan keçiriləcəyini bildirdi.

Daha sonra Əli İnsanov həbs olunan zaman tərtib olunmuş protokolun ikinci hissəsini 9 ildir ki, tapa bilmədiyini məhkəmə heyətinin nəzərinə çatdırdı:

-Həbsimlə bağlı protokolu 9 ildir istəyirəm, tapıb gətirmirlər. Bu, mənim hansı şəraitdə saxlandığım, mənə verilən suallar barədə idi. Ona istinad etmək, istifadə etmək üçün axtarıram, tapmıram. Bu hissəni yoxa çıxarıblar. Möcüzədir. Mənim sözümdən bu qədər qorxan hökumət mənim özümü görəndə neynəyəcək?

Hakim:

-Siz ibtidai istintaq zamanı ifadə vermisiniz, dindirilmisiniz. Mahiyyətdən kənara çıxmayın.

Ə.İnsanov:

-Bu, mənim son çıxışımdır? Mən uzun illər nazir olmuşam. Milli Məclisin deputatı, YAP-ın qurucularından olmuşam. Bəs mən də ətrafımdakı insanlardan danışmalıyam. Küçə süpürən adamdan danışası deyiləm ki. Siz mənə siyahı verin, kimlərin adını çəkmək olmaz, mən də onların adını çəkməyim (zalda gülüşmə). Guya mən bilmirəm ki, siz nə demək istəyirsiniz?! Mən iki qondarma ittihamla həbs olundum - dövlət çevrilişində və korrupsiyada. Avropa Məhkəməsi mənim günahsız olduğumu sübut etdi. 5 il ərzində sübut elədim ki, nə onu etmişəm, nə də bunu. MTN-də müstəntiq mənə dedi ki, sizin işlə bağlı 5 min adam ifadə verib. Heç biri də mənə pul verdiklərini və yaxud mənim onlardan rüşvət istədiyimi deməyib. Məhkəmədə də 20 nəfərə yaxın adam ifadə verdi. MTN-də onlardan mənim əleyhimə ifadə almaq istəsələr belə ifadə verməmişdilər. Dediyim kimi, həbsimlə bağlı protokol işin içindən itib.

Hakim:

-Biz sizə şərait yaratdıq ki, ifadə verəsiniz. Amma siz bundan istifadə edərək mahiyyətə uyğun olmayan şeylərdən danışırsınız.

Ə.İnsanov:

-Mən sizə söz verirəm ki, qorxduğunuz adamın adını çəkməyəcəyəm (səs kəsildi və zalda gülüş səsləri eşidildi).

Məhkəmədə fasilə elan olundu. Günün ikinci yarısında davam etdirilən məhkəmə prosesi Əli İnsanovun iştirakı olmadan keçirildi. Belə ki, sabiq nazir hüquqlarının pozulması ilə bağlı məhkəməyə etiraz əlaməti olaraq prosesdə iştirak etməkdən imtina etdi.

Məhkəmə prosesi fevralın 25-də saat 11-də davam edəcək.

İnarə Rafiqqızı