“Bu çox ciddi məsələdir. Milli Məclisdə, komitələrin iclaslarında bu məsələ ilə bağlı hər zaman müzakirələr gedir. Amma məhəl qoyan yoxdur, özbaşınalıqdır”.
Bunu modern.az-a açıqlamasında Milli Məclisin İqtisadi siyasət komitəsinin üzvü Vahid Əhmədov son zamanlar Xəzərin sahilboyu zolağının hasara alınması məsələsinə münasibət bildirərkən deyib.

Millət vəkili bildirib ki, qanunu sayan yoxdur: “Qanun çərçivəsində hərəkət etmək əvəzinə müəyyən imkanlı şəxslər istədiklərini edir, istədiyi hasarı çəkir. Rayon icra hakimiyyətlərinin başçıları bu işə səhlənkar yanaşırlar. Bu yolverilməz haldır. Xəzərin sahilboyu zolağının hasara alınmasına son qoyulmalıdır. Çünki dəniz hamınındır. İnsanlar orada istirahətə gedir, dincəlmək istəyir. Millət vəkilləri Zeynəb Xanlarova, Sabir Rüstəmxanlı da bu məsələ ilə narahatlıqlarını bildiriblər. Mən də bunun qarşısının alınmasının tərəfdarıyam. Qanunda nə nəzərdə tutulubsa, qanuna da uyğun hərəkət edilməlidir”.

Xatırladaq ki, 2003-cü il yanvarın 13-də mərhum prezident Heydər Əliyev Xəzər sahilində şəxsi evlərin və qurğuların tikintisini qadağan edən “Azərbaycan Respublikasında Xəzər dənizinin sahilindən istifadəyə dair bir sıra tədbirlər haqqında” sərəncamı imzalayıb.



Həmin sənəddə deyilir ki, sərəncam son vaxtlar vətəndaşların Prezidentin İcra Aparatına daxil olan çoxsaylı müraciətlərilə bağlı qəbul edilib. Həmin müraciətlərdə göstərilir ki, bir sıra yerlərdə Xəzər dənizinin sahilboyu zolaqları altında olan torpaqlar yerli əhalinin maraqları və ictimai ehtiyacları nəzərə alınmadan ayrı-ayrı fiziki və hüquqi şəxslərin istifadəsinə və icarəsinə verilib.

Həmin torpaq sahələrində bağ evləri və digər obyektlər inşa edilib, dənizin içinədək hündür hasarlar çəkilib. Bununla da əhalinin dəniz sahilinə gediş-gəlişi xeyli dərəcədə məhdudlaşdırılıb.

Mərhum dövlət başçısı Heydər Əliyevin sözügedən sərəncamı ilə Nazirlər Kabineti, Ekologiya və Təbii Ehtiyatlar Nazirliyi, Dövlət Torpaq və Xəritəçəkmə Komitəsi, Bakı və Sumqayıt şəhərlərinin, həmçinin Xaçmaz, Dəvəçi, Siyəzən, Xızı, Abşeron, Salyan, Neftçala, Lənkəran, Masallı və Astara rayonlarının icra başçılarına tapşırılıb ki, Xəzər dənizi sahilinin 130 metrlik zolağında yerləşən torpaqların Azərbaycan Respublikasının qanunvericiliyilə müəyyən edilmiş inzibati və ya məhkəmə qaydasında huquqi və fiziki şəxslərin istifadəsindən və icarəsindən geri alınması təmin edilməlidir.

2003-cü il avqustun 4-də isə prezident “Azərbaycan Respublikasının Torpaq Məcəlləsinə dəyişikliklər edilməsi haqqında” Azərbaycan Respublikası qanununun təsdiqi barədə fərman imzalayıb. Bu dəyişikliklərə görə, Xəzərin Azərbaycan sektorunun sahil zolağından 80-130 metrlikdə yerləşən torpaqlar dövlət mülkiyyətinə aid edilir və onlar dövlətsizləşdirilə bilməz. Bu zolaqda yerləşən torpaq sahələri müvafiq icra hakimiyyəti orqanlarının qərarı ilə yalnız dövlət məqsədləri üçün istifadəyə, yaxud icarəyə verilə bilər. Sahil zolağının 80-130 metrliyində istifadəyə və ya icarəyə verilən torpaq sahələrində aparılan tikinti dənizə ümumi yolu məhdudlaşdırmamalıdır. Bu ərazilərdən dənizə çıxış yalnız dövlətin iqtisadi maraqlarının və ya təhlükəsizliyinin qorunması ilə bağlı icra hikimiyyəti orqanlarının qərarı ilə məhdudlaşdırıla bilər.

Lakin sonradan Milli Məclis “Torpaq islahatı haqqında” qanuna dəyişiklik edərək Xəzərsalili zolağın dövlətə məxsus hissəsinin enini 20-50 metr müəyyənləşdirdi.

Dəyişikliyə əsasən, 20-50 metrlik sahil zolağının altında qalan torpaqlar dövlətin mülkiyyətində qalmaqla özəlləşdirilə bilməz.