“Naxçıvan xanı” ilginc kadr islahatlarına start verəcək?

Redaksiyamıza Naxçıvan yerli hakimiyyətinə yaxın mənbələrdən maraqlı məlumat daxil olub. Məlumata görə, MR Ali Məclisin sədri V.Talıbov MR Daxili İşlər Naziri Əhməd Əhmədovu nazir postundan yola salmaq üçün hazırlıqlar görür.
Artıq bununla bağlı Ali Məclis sədrinin hərəkətə keçdiyi də vurğulanır. Məlumatda bildirilir ki, ayın əvvəlində V.Talıbov heç kimin xəbəri olmadan Bakıya səfər edib və daxili işlər naziri Ramil Usubovla görüşüb. Birinci təyyarə reysi ilə Bakıya uçan Talıbov elə həmin gün də geri qaydıb. Səfər zamanı onunla birlikdə gələcəkdə Əhməd Əhmədovun yerinə gətiriləcək şəxs də olub. Ali Məclisin sədri həmin şəxsi Ramil Usubova təqdim edib.
Məlumatda həmim şəxsin kimliyi də qeyd edilir. Bildirilir ki, bu şəxs hazırda MR Ədliyyə Nazirinin müvini olan Elnur İsmayılovdur. Şərur rayonundan olan və talıbovlara etibarlılığı ilə tanınan Elnur İsmayılov əvvəllər Naxçıvan Hava Limanında işləyib. Məlumatda nazir postuna gətiriləcək bu şəxsin hətta hərbi xidmətdə olmadığı da bildirilir.
Əlavə olaraq qeyd edilir ki, V.Talıbov növbəti seçkilərdə MR Ali Məclisin sədri olmaq istəmir və bu posta kiçik oğlu Seymur Talıbovu gətirmək istəyir. Bu məsələdə ona mane ola biləcək, güvənmədiyi məmurları uzaqlaşdırmağa çalışır.
Talıbov və Əhmədova yaxın adamlar arasında qarşıdurma, gərginlik və güvənsizlik uzun illər bundan əvvəl yaranıb. Qarşıdurma hətta 2003-2007-ci illərdə pik nöqtəsinə çataraq hər iki şəxsin yaxınları arasında dava müstəvisinə qədər yüksəlib. Qarşıdurmalarda öndə olan V.Talıbovun bacısının əri, Naxçıvan Şəhər Polis İdarəsinin keçmiş rəisi Səbuhi Novruzov 2007-ci ildən sonra formal olaraq polis rəisi saxlansa da, Əhməd Əhmədov tərəfindən bütün səlahiyyətləri əlindən alınıb, Naxçıvan şəhərində polisin apardığı bütün əməliyyatlar birbaşa MR DİN-in əməkdaşlarına həvalə edilib. 2013-cü ilin payızında gözlənilmədən S.Novruzov DİN-ə müavin təyin edilib. Novruzov DİN-ə müavin təyin olunduqdan sonra onun ətrafını təmizləmə əməliyyatı başladılıb və S.Novruzova yaxın olan polislər işdən çıxarılıblar. Hətta Şahin adlı polis zabitinə narkotik ittihamı ilə cinayət işi də açılıb.
Əks tərəfdən isə qarşıdurmalarda fəal iştirak edən nazirin yaxınlarından bir neçəsi isə Naxçıvanı tərk etmək məcburiyyətində qalıblar.
Məlumatda əlavə olaraq bildirilir ki, Əhməd Əhmədov Bakıdakı hansısa güclü qruplaşma tərəfindən himayə edilir və onun postundan uzaqlaşdırılması bir o qədər də asan görünmür. Talıbov buna nail olacağı təqdirdə isə heç şübhəsiz, təmizləmə işi davam edəcək və güvənini itirən və şübhəli bilinən şəxslərin hamısı vəzifələrindən uzaqlaşdırılacaq...
Yazıda adları çəkilən şəxslər əlçatmaz olduğundan münasibət öyrənməyə cəhd etmədik, istəsələr, mövqelərini işıqlandırmağa hazırıq.
R.ƏLİCANLI