Təhsil Nazirliyinin Peşə Sektorunun müdiri daha da gücləndi

Təxminən iki həftə əvvəl Təhsil Nazirliyinin Peşə Sektorunda baş alıb gedən qanunsuzluq və korrupsiya faktları ilə bağlı yazı dərc etmişdik. Azərbaycan təhsilinin ən qaranlıq və ən çox korrupsiyalaşmış, eyni zamanda təhsilin adının belə çəkilmədiyi bir sektor olan Peşə sektorundakı vəziyyət doğurdan da son dərəcə acınacaqlıdır. Qeyd edək ki, Azərbaycanda 113 peşə məktəbi fəaliyyət göstərir. Daha doğrusu, bunu fəaliyyət adlandırmaq belə mümkün deyil. Çünki, burada təhsil alan şagirdlər peşə məktəbinin yolunu tanımadıqları kimi, orada onlara «peşə öyrədən» müəllimlərini də tanımırlar. Bunun müqabilində isə hər bir peşə məktəbində hər il dövlətin on min manatlarla vəsaiti silinir. Bu vəsaitlər isə başda Təhsil Nazirliyinin Peşə Sektorunun müdiri Namiq Məmmədov olmaqla peşə məktəblərinin direktorları və sektorda çalışan məmurlar tərəfindən kütləvi şəkildə mənimsənilir. Alınan rüşvət pullarını bir kənara qoysaq belə dövlət büdcəsindən ayrılan vəsaitlər milyonlarla manatı əhatə edir.
Təhsil Nazirliyinin Peşə Sektorunun fəaliyyətindəki kütləvi korrupsiya faktları ilə bağlı redaksiyamıza yeni daxil olan məlumatda göstərilir ki, təkcə ötən il peşə məktəblərinin maddi bazasının genişləndirilməsi məqsədi ilə 3 milyon manat sərf olunub. Ammma sərf olunan vəsaitin demək olar ki, hamısı mənimsənilib.
Məlumata əsasən, hazırda ölkə ərazisində yerləşən və nazirliyə tabe olan bütün peşə məktəblərində özbaşınalıq baş alıb gedir. Bu təhsil ocaqlarında şagirdlərə peşə təhsilinin sirləri öyrədilmir. Onların adı jurnalda getsə də, pul verib dərsə gəlmirlər. Bəzi peşə məktəblərinin binası və ya əraziləri kimlərəsə satılıb. Direktorlar sektor müdiri Namiq Məmmədovun tapşırığı əsasında şagirdlərə dərsdən yayınmağa şərait yaradırlar. Ona görə ki, dərs ilinin sonunda həmin şagirdlər pul verib növbəti kursa keçirlər.
Bildirilir ki, peşə məktəblərinin direktorlarının əksəriyyəti şöbə müdirinin kadrlarıdır və onlar tutduqları vəzifəyə görə hər ay sektor müdirinə haqq verirlər. Qeyd olunur ki, Namiq Məmmədov peşə məktəblərinin maddi-texniki bazasının möhkəmləndirilməsi üçün mütəmadi şəkildə nazirliyin büdcəsindən vəsait alır. Araşdırma aparılsa məlum olar ki, bu pullar başqa işlərə sərf olunur, şöbə müdirinin biznesinə gedir.
Göstərilir ki, danılmaz faktlardan biri də əksər peşə məktəblərində ixtisaslı kadr çatışmazlığıdır. Sektor müdiri peşə məktəblərinə müəllimlərin qəbulunu öz bildiyi şəkildə həyata keçirir və rüşvət qarşılığında müəllim işləyənlər bu sahədən tamamilə xəbərsizdirlər.
Bundan başqa daxil olan məlumatda göstərilir ki, Peşə Sektorunun nəzdində olan, Bakı şəhərində fəaliyyət göstərən peşə liseylərinə qəbul zamanı rüşvət faktoru hər zaman önə çəkilir və bu bir başa sektor müdiri Namiq Həsənovun “xeyir duası” ilə həyata keçirilir.
Bildirilir ki, sektor müdiri ödənişli qəbulla bağlı daxil olan şagirdlərin hesabını şəxsən özü direktorlara təyin edib. Belə ki, 1 Nömrəli Bakı Peşə Liseyinin kimyəvi analiz loborantı, texnoloji qurğuların operatoru ixtisasına daxil olmaq üçün 250-300 manat, 6 nömrəli Bakı Peşə Liseyində Bosman, Motros, Kapitan Mexanik (dalğıc, xilasedici gəminin, motorlu katerin) ixtisaslarına qəbul üçün 300-400 manat, Dövlət Dəmir Yolu Liseyində isə Elektrik qatarının maşinist köməkçisi ixtisası üçün 500 manat rüşvət alındığı bildirilir.
Məlumatlı mənbə bildirir ki, Bakı şəhərindəki 17 Peşə Liseyinin çoxsunda faktiki şagird sayı Namiq Məmmədovun göstərdiyi kvotadan qat-qat aşağıdır. Sektor müdiri liseylərdə şagirdlərin sayını süni şəkildə çoxaldaraq qazanc əldə edir. Məlumatlı mənbə bildirir ki, Peşə Sektorunun Bakı şəhərində 1, 2, 3, 5, 6, 7, 10, 13, 14 nömrəli Peşə məktəblərində təhsil alan şagirlərin əksəriyyəti məcburi köçkün rayonlarından olan vətəndaşlardır. Bu şagirdləri peşə direktorlarınınn göstərişi ilə peşə müəllimləri tapıb gətirirlər. Səbəbi isə çox sadədir, peşə məktəbində şagird olmasa təhsil ocağı bağlanacaq. Peşə müəllimləri isə işlərini itirməmək üçün qohum-əqraba, tanış-biliş, məcburi köçkün yataqxanalarına düşərək şagird “ovuna” çıxırlar. Həmin şagirdlərin ancaq adlarını peşə məktəbinə yazırlar və şagirdlər demək olar ki, heç vaxt məktəbə gəlmirlər. Məlumatda göstərilir ki, şagirdlərin çoxusu adlarının peşə məktəblərində getməsində maraqlıdırlar. Çünki, təhsili bitirəndə həm diplom alacaqlar, həm də hər ay onlara yazılan müavinətin yarısını alırlar. Mənbə bildirir ki, Bakı peşə məktəblərində şagirdlərə verilən 35 manat müavinətin yarısı direktorlara yarısı isə adları məktəbdə gedən şagirdlərə çatır. Bir çox şagirdlər var ki, onlar ümumiyyətcə müaviənt almırlar.
İddiaya əsasən, Bakı şəhərindəki peşə məktəblərinin bir çoxunda valideynini itirmiş şagirdlərin adlarına yazılan 95 manat müavinət isə direktorlar tərəfindən götürülür. Mənbəmiz bildirir ki, müavinatlərin mənimsənilməsində sektor müdiri Namiq Həsənovun şəxsi payı var.
Bundan başqa Peşə Sektor müdiri hesabatında 1, 2 nömrəli Şəki Peşə məktəblərində 220, Kəlbəcər peşə Məktəbində 90, Göygöl peşə Məktəbində 100, Ağdam 2 və 4 Nömrəli Peşə Məktəblərində 160, Goranboy Peşə Məktəbində 110, Şabran Peşə Məktəbində 80, Balakən 1 və 2 nömrəli Peşə məktəbində 180 şagirdin oxuduğu qeyd edilir. Halbuki, bu peşə məktəblərində oxuyan şagirdlərin sayı hesabatdakı rəqəmlərin yarısı qədərdir. Bu şagirdlərə dövlətdən ayrılan vəsaitlər və müavinətlər isə direktorlar və sektor müdiri tərəfindən mənimsənilir.
Bundan başqa, peşə məktəblərinin maddi bazaları və torpaq sahələri də məktəb direktorlarının və sektor müdirinin şəxsi biznesinə çevrilib. Qeyd edək ki, cəza müəssisələrində də peşə məktəbləri fəaliyyət göstərir ki, bu peşə məktəblərində həyata keçirilən maxinasiyalar barədə araşdırmamızı başa vurduqdan sonra oxucularmıza məlumat verəcəyik.
Qarşı tərəfin də mövqeyini dərc etməyə hazırıq…
Kərim