Şəmsəddin Hacıyevin bacıoğlu fiaskosu

Bir müddət əvvəl Azərbaycan Dövlət İqtisad Universitetinin rektorluğundan uzaqlaşdırılan millət vəkili, Şəmsəddin Hacıyevin «vurulması»nın əsl səbəbləri ortaya çıxıb. Əslində rektorun tutduğu vəzifədən azad edilməsinin səbəbi onun yaxın qohumları, ailə üzvləri ilə bağlı olaraq narazılıqların pik həddə çatması olub. «Gündəm xəbər»in redaksiyasına daxil olan məlumatlara əsasən, rektoru işdən həm də bacısı oğluna görə çıxarıblar. Hələlik kiçik bir xatırlatma edək ki, rektor postundan uzaqlaşdırıldıqdan sonra Şəmsəddin Hacıyevin qızı və qudası da işdən kənarlaşdırıldı. Aprelin 29-da Dövlət İqtisad Universitetinin yeni rektoru Ədalət Muradov Şəmsəddin Hacıyevin qudası, daha dəqiqi, qardaşının qudası olan Beynəlxalq İqtisadi münasibətlər fakültəsinin dekanı Müzəffər Məmmədovu da vəzifəsindən azad etdi. Yeni rektor keçmiş rektorun qudası ilə yanaşı, onun bir neçə həmyerlisini və universitetdəki istedadlar qrupuna rəhbərlik edən qızı Çeşmi xanımı da işdən uzaqlaşdırdı.
Lakin rektorun «vurulması»na əsl səbəb olan bacısı oğlu Sosial Müdafiə Nazirliyinin Balakən şöbəsinin müdiri Elxan Rəhimovun iş adamlarını aldadaraq onların külli miqdarda pulunu mənimsəməsi səbəb olub. 2013-cü ilin prezident seçkiləri ərəfəsində Ucar rayon Lək kəndinin sakini, iş adamı Əhədov İlham Əliyar oğlunun şikayəti artıq hüquq mühafizə orqanları tərəfindən də nəzarətə götürülüb. Daxil olan informasiyaya əsasən, Elxan Rəhimov iş adamına 188 min manat borcu var və indiyə qədər müxtəlif bəhanələr gətirərək həmin borcu qaytarmır.
Apardığımız araşdırmalar zamanı bəlli olub ki, E.Rəhimov əslində 188 min manatı iş adamından Azərbaycana araq gətirmək üçün alıbmış.
Şikayətçinin yazdıqlarını olduğu kimi təqdim edirik. İş adamı yazır ki, o, 1995-ci ildə Rusiyanın Kalininqrad şəhərində "Ankora" şirkətinin direktoru vəzifəsində çalışıb. Sözü gedən şirkət ərzaq məhsullarının topdan satışı ilə məşğul olub. İlham Əhədov Moskvada işgüzar səfərdə olarkən Şəmsəddin Hacıyevin baçısı uşaqları Əli və Elxan Rəhimovlarla rastlaşıb. Az sonra deputatın bacısı uşaqları İlham Əhədova biznesini daha da genişləndirməyi təklifi ediblər. Təklif olunan biznes o zaman Moskvada sığınacaq tapmış keçmiş prezident Ayaz Mütəllibova məxsus Lyubers şəhərindəki "Almaz" Şərab Zavodunun spirtli içkilərinin satışını təşkil etməkdən ibarət olub. Əvəzində isə qardaşlar İlham Əhədovla şirə barteri ediblər: "Mən bu iki qardaşa Əli və Elxan Rəhimovlara inanıb 188 min manat dəyərində Polşadan bütün gömrük və nəqliyyat xərclərini çəkərək 7 adda litr yarımlıq meyvə şirələri Moskvaya göndərdim. Yaşadığım Kalininqrad şəhərində isə spirtli içkilərin topdan satışı üçün 40 milyon rubul ödəməli oldum. Barter müqaviləsinə görə, mənə Əli və Elxan Rəhimovlar 75 min şüşə spirtli içki göndərməli idiliər. Lakin bu baş vermədi. Sonradan mənə məlum oldu ki, Əli və Elxan Rəhimovların külli miqdarda borcları olduğuna görə, mənim göndərdiyim 188 min manat dəyərində olan şirə içkilərini dəyər-dəyməzinə borclu olduqları şəxlərə verib Bakıya qaçıblar. Bundan sonra mənim Kalininqradda ciddi problemlərim baş qaldırdı. 1995-ci ildən 2004-cü ilə qədər mənə qardaşların "atdıqları" külli miqdarda pullu qaytarmaq üçün işləyib borc qaytarmalı oldum. Çünki həmin pulları qaytara bilmədiyim üçün bu müddət ərzində Azərbaycana gələ bilmirdim. 2004-cü ildə Azərbaycana qayıtdım. Bakıda Elxan Rəhimovla görüşdüm və ondan pulumu geri tələb etdim. O isə mənə söz verdi ki, pulumu hissə-hissə düzəldib valideyinlərimə çatdıracaq. Yenidən işimlə ələqədar Kalininqrada qayıtmalı oldum. Amma Əli və Elxan Rəhimovlar pulumu ödəməkədən yenə də boyun qaçırdılar. Yenidən məcbur olub 2009-cu ildə Bakıya gəldim. Elxanla görüşüb sonuncu dəfə pulumu ondan tələb edəndə o mənə bildirdi ki, 100 min dollar verib Balakən rayon Əhalinin Sosial Müdafiəsi Mərkəzində direktor vəzifəsinə təyin olunub və bir az səbirli olub pulumu qaytaracağına yenidən söz verib cəmi mənə 5500 manat pul verdi. Lakin bu söhbətin üstündən uzun müddət keçməsinə baxmayaraq, Elxan Rəhimov pulumu verməkdən boyun qaçırır. İndi isə o, mənə müxtəlif bəhanələrlə pulu verməkdən boyun qaçırır. Mənə deyir ki, Dövlət Sosial Müdafə Fondunun sədri Səlim Müslümovun bu yaxınlarda evində olub və Səlim Müslümov da Elxan Rəhimova güya söz verib ki, prezident seçkisindən sonra onu icra başçısı edəcək. Elxan Rəhimov icra başçısı təyin olunduqdan sonra isə mənim pullarımı artıqlaması ilə qaytaracaq. Lakin mən bu bəhanələrə inanmayıb bir müddət sonra Elxanla telefon əlaqəsi yaradıb pulumu tələb etdim. O isə mənə bildirdi ki, sənin MMC var. Məni Şamaxının icra başçısı Asif müəllimə tapşıracaq. Orda təmir-tikinti, abadlıq işləri aparıb iştirak etsəm külli miqdarda pul qazana bilərəm. Bunun da bir bəhanə olduğunu anlayıb Elxana bildirdim ki, səndən müvafiq instansiyalara şikayət edəcəm. Elxan Rəhimovun isə cavabı mənə belə oldu ki, mən də istənilən yerə şikayət edə bilərəm. Onsuz da ona gözün-üstə qaşın var deyən olmayacaq. Çünki onun rəhbərlik etdiyi qurum hər ay Heydər Əliyev Fonduna külli miqdarda pul ödəyir. Elə bu baxımdan da Elxan Rəhimova kimsə söz deməyə cürət edə bilməz və onun Şəmsəddin Hacıyev kimi dayısı var. Amma bunlara baxmayaraq Elxan Rəhimovun bu cür cəfəng və uydurma fikirlərinə inanmıram. Bu səbəbdən də mənə külli miqdarda ziyan vurmuş Elxan Rəhimov barəsində Prezident İlham Əliyedən, Heydər Əliyev Fondunun rəhbəri Mehriban xanım Əliyevadan, Prezident Administrasiyasının rəhbəri cənab Ramiz Mehdiyevdən, Daxili İşlər naziri Ramil Usubovdan, Milli Təhlükəsizlik naziri Eldar Mahmudovdan, Baş prokuror Zakir Qaralovdan ölçü götürülməsini xahiş edirəm".
İndi isə qaydaq Elxan Rəhimova. Səlim Müslümovun bu kadrı artıq Şəmsəddin Hacıyev kimi dayısının imkanlarından yararlana bilmir. Çünki dayısı ən yaxın ailə üzvlərini belə vəzifədə saxlayacaq imkanlarda deyil. Bununla belə bir rayonun idarə rəisinin barəsində apardığımız araşdırma zamanı olduqca ilginc informasiyalarla rastlaşdıq. Bəlli oldu ki, əslində Şəmsəddin Hacıyevin bacısı oğlu olan Elxan Rəhimov sən demə Prezident Administrasiyasının sabiq şöbə müdiri Elnur Aslanovla da əlaqələr yarada bilibmiş. Və bəlli olub ki, Elnur Aslanovun məlum nurçu olaylarından sonra işindən uzaqlaşdırılmasından sonra Şəmsəddin Hacıyevin də Balakəndəki bəzi müəmmalı fəaliyyəti ilə bağlı ortaya müdhiş faktlar çıxıb. Hələlik bir sıra dəqiqləşmələr aparırıq. Bununla belə sabiq rektor, deputat Şəmsəddin Hacıyev artıq bacısı oğlunu qorumaq fikirində deyil. O, hətta bu mövzu ilə bağlı müraciət edən jurnalistlərə «mən artıq onun əlindən bezmişəm, onunla bağlı suallarınıza da cavab vermək istəmirəm» deyə cavab verir. Elxan Rəhimov özü isə dayısının işdən çıxarılmasına, Elnur Aslanovun nurçularla bağlı «vurulmasına» baxmayaraq Əmək və Əhalinin Sosial Müdafiə Nazirliyində yüksək post tutacağını iddia edir. O, ətrafındakı adamlara deyir ki, yaxın günlərdə Səlim Müslümov onu nazirlikdə yüksək vəzifəyə təyin edəcək. Hər halda Səlim Müslümovun bunu edib-etməyəcəyi məlum deyil. Amma Elxan Rəhimov bu günə qədər mətbuatda Şəmsəddin Hacıyevə, Elnur Aslanova güvənərək kifayət qədər zaman qazanıb.
Xatırladaq ki, Elnur Aslanov əslən Balakən rayonundandır. Bununla belə ortada olan əsas məqamlardan biri də ondan ibarətdir ki, Balakəndəki mühim faktlarla bağlı olaraq hələlik araşdırmalarımızı təqdim etmirik.
Eyni zamanda Elxan Rəhimovu, həmçinin də Şəmsəddin Hacıyevi dinləməyə hazırıq.
RÜFƏT