Azərbaycan Respublikası Cinayət Məcəlləsinin 221.1- ci maddəsi ilə təqsirləndirilən Gülalıyev Əlgüşad Oqtay oğlu ilə bağlı 23 sentyabr 2014- cü ildə Xətai rayon məhkəməsində keçirilən məhkəmə prosesində müdafiə tərəfi cinayət işinə bəraətverici əsaslarla xitam verilməsinə dair vəsatətlə çıxış edib. Xatırladaq ki, yetkinlik yaşına çatmayan Əli Gülalıyev tanınmış hüquq müdafiəçisi, Milli Şuranın Mətbuat Xidmətinin rəhbəri Oqtay Gülalıyevin oğludur. Haqqında bəhs edilən cinayət işinin açılmasında siyasi çalarların olması, konkret olaraq olayın arxasında Ə. Gülalıyevin atası Oqtay Gülalıyevin ictimia- siyasi fəaliyyətlə məşğul olması cinayət işinin sifarişli olmasından xəbər verir.
Məhkəmə prosesinin ölkənin ictimai- siyasi gündəmində olduğunu nəzərə vəsatəti olduğu kimi təqdim edirik.
Məhkəmədə vəsatəti təqdim edən Oqtay Gülalıyev bildirib ki,qanuni nümayəndəsi olduğum Gülalıyev Əlgüşad Oqtay oğlu Azərbaycan Respublikası Cinayət Məcəlləsinin 221.1- ci maddəsi (xuliqanlıq) ilə təqsirləndirilir.
Bakı şəhər BPİ İstintaq və Təhqiqat İdarəsinin Ağır Cinayətlər Şöbəsinin XMİÜ baş müstəntiqi polis polkovnik leytinantı Vüqar İsmayılov tərəfindən Gülalıyev Əlgüşad Oqtay oğluna yuxarıda qeyd olunan maddə üzrə 30 iyul 2014- cü il tarixdə ittiham elan olunmuş, onun haqqında təqsirləndirilən şəxs qismində cəlb etmə haqqında qərar elan olunub, polis nəzarətinə verilib.
Aşağıdakılara əsasən hesab edirəm ki, cinayət təqibi üzrə icraata məhkəmə tərəfindən bəraətverici əsaslarla xitam verilməlidir.
Əvvalə qeyd edim ki, təqsirləndirilən şəxs Gülalıyev Əlgüşad Oqtay oğluna qarşı irəli sürülən ittiham qanunvericiliyin tələblərinə zidd olaraq hadisənin baş verdiyi iddia olunan 20 sentyabr 2013- cü il tarixdən təxminən 11 ay sonra elan olunub. Bu faktın özü cinayət işi ilə bağlı ittihamın irəli sürülməsində müəyyən məqsədlərin olmasına dair əsaslara və bir sıra suallara yol açır.
Digər tərəfdən zərərçəkmiş şəxs hesab edilən, Xətai rayonu NZS qəsəbəsi 165 saylı məktəbin 9- cu sinifində oxuyan Bayram Sultanlı Elxan oğlunun Gülalıyev Əlgüşad Oqtay oğlu tərəfindən döyüldüyü iddia olunan, hətta bu iddia gerçək olduğu halda belə ən pis halda iki məktəblinin dalaşması kimi xarakterizə oluna bilən hadisənin araşdırmasını adı çəkilən məktəbin təlim- tərbiyə şurasından tutmuş ərazi üzrə sahə müvəkili, 37- ci polis bölməsi deyil, birbaşa Bakı şəhər BPİ İstintaq və Təhqiqat İdarəsinin Ağır Cinayətlər Şöbəsinin araşdırması təəccüb doğurmaqla yanaşı şübhəli məqamlardan və maraqlardan xəbər verir.
Yuxarıda qeyd olunan hər iki məqam göstərir ki, Gülalıyev Əlgüşad Oqtay oğluna qarşı elan olunan ittiham obyektiv və ədalətli deyil, müəyyən siyasi maraqlardan və qərəzdən doğur.
Cinayət təqibi üzrə materiallarla tanış olarkən məlum oldu ki, Bakı şəhər BPİ İstintaq və Təhqiqat İdarəsinin Ağır Cinayətlər Şöbəsinin XMİÜ baş müstəntiqi polis polkovnik leytinantı Vüqar İsmayılovun təqsirləndirilən şəxs qismində cəlb etmə haqqında 30 iyul 2014- cü il tarixli qəbul etdiyi qərarda göstərilir ki, Gülalıyev Əlgüşad Oqtay oğlu 20 sentyabr 2013- cü il tarixdə saat 12:10 radələrində ictimai yerdə, yəni Bakı şəhəri Xətai rayonu NZS qəsəbəsi ərazisində yerləşən 165 saylı orta məktəbin 3- cü mərtəbəsində ictimai qaydanı kobud surətdə pozan, cəmiyyətə açıqca hörmətsizlik ifadə edən, vətəndaşlar üzərində zor tətbiq edilməsi ilə müşayət olunan qərəzli hərəkətlər edib əl zərbələri ilə Soltanlı Bayram Elxan oğlunu vuraraq ona sağ gözətrafı nahiyyəsinin qançırı kimi sağlamlığa zərər vurmayan xəsarət olduğu üçün dərəcəsi təyin edilməyən xəsarət yetirməklə xuliqanlıq etmişdir.
Qərarda daha sonra qeyd olunur ki, Gülalıyev Əlgüşad Oqtay oğlunun təqsirləndirilən şəxs qismində cəlb edilməsinə kifayət qədər sübutlar olmasını nəzərə alaraq ona qarşı Azərbaycan Respublikası CM- nin 221.1- ci maddəsi ilə nəzərdə tutulan ittiham elan edilsin.
Müdafiə tərəfi iş materialları ilə tanış olaraq bu qərara gəlir ki, Gülalıyev Əlgüşad Oqtay oğluna qarşı irəli sürülən ittiham absurddur və qərəzlidir.
Belə ki, iş materiallarında qeyd olunduğu kimi Gülalıyev Əlgüşad Oqtay oğlunun özü 22 sentyabr 2013- cü il tarixdə Xətai rayonu NZS qəsəbəsində naməlum şəxslərin hücumuna məruz qalaraq əvvəl döyülmüş, daha sonra isə bıçaqlanaraq ağır bədən xəsarəti almışdır. Hadisə ilə bağlı Xətai rayon 37- ci polis bölməsinə, DİN- in 102 qaynar xəttinə müraciət olunduqdan və həmin ərəfədə keçirilən prezident seçkilərində Demokratik Qüvvələrin Milli Şurasının prezidentliyə vahid namizədi, professor Cəmil Həsənlinin İctimai Televiziyanın canlı yayımında cinayətkarların tapılıb cəzalandırılması tələbi ictimailəşdikdən sonra hadisəni törədən şəxslər haqqında əməliyyat axtarış tədbirləri həyata keçirilməyə başlanmışdı. Daxili İşlər Nazirliyinin rəhbərliyi səviyyəsində qəbul edilən müvafiq qərardan sonra hadisə ilə bağlı müxtəlif versiyalar irəli sürüldü. Hətta bu versiyalardan birini gerçəklik kimi təqdim edən DİN Mətbuat Xidmətinin 25 sentyabr 2013- cü ildə yaydığı açıqlamada qurumun şöbə rəisi Orxan Mansurzadəyə istinadən qeyd olunub ki, "sentyabarın 20- də Əlgüşad Gülalıyev öz sinif yoldaşı Bayram Sultanlını döyüb və ona göz nahiyəsindən xəsarət yetirib. Bayram Sultanlıya yaxın şəxslər də Əli Gülalıyevlə bu məsələ ətrafında mübahisə ediblər. Nəticədə onlardan biri Əlini döyərək ona yüngül dərəcədə xəsarət ediblər ( bura bax; http://www.mediaforum.az/az/2013/09/25/%C6%8Fli-G%C3%BClal%C4%B1yev%C9%99-x%C9%99sar%C9%99t-niy%C9%99-yetirilib-Atas%C4%B1n%C4%B1n-015642012c00.html#.U-ItOvl_u8E)”

26 sentyabr 2013- cü ildə ev sahibləri evdə olmadığı təqdirdə Xətai rayon Polis İdarəsinin əməkdaşları evə daxil olaraq Əlgüşad Gülalıyevdən onun Bayram və Rüstəm adlı şəxslər tərəfindən döyülüb bıçaqlanmasına dair ondan zorla etiraf edici ifadələr almağa çalışmışdılar. Hər iki hadisə onu göstərir ki, 22 sentyabr 2013- cü ildə Əlgüşad Gülalıyevin döyülərək bıçaqlanması ilə bağlı baş vermiş hadisəsinin üstünün açılmasına hüquq- mühafizə orqanları, xüsusən Xətai RPİ əməkdaşları qeyri- peşəkar, qərəzli və yanlış istiqamətdə yanaşmışdılar. Çünki DİN Mətbuat Xidmətinin yaydığı açıqlamada deyilənlərdən fərqli olaraq istintaqın sonrakı gedişində məlum oldu ki, Əlgüşad Gülalıyevi 22 sentyabr 2013- cü ildə döyüb bıçaqlayanlar Bayram Sultanlı və onun qohumları deyil, Rəşad Şirinov və onun dostlarıdır. Təəssüflə qeyd etmək lazımdır ki, məhz bu qeyri- dəqiq yanaşmanın nəticəsi olaraq istintaq Əlgüşad Gülalıyevin bıçaqlanması məsələsində Bayram Sultanlının döyülməsi faktorunu sonadək qüvvədə saxladı. Bu faktor Əlgüşad Gülalıyevin bıçaqlanması məsələsini arxa planda saxlamaq və onun zərərçəkmiş statusunu təqsirləndirilən şəxsə çevirmək məqsədi daşımışdır. Şübhəsiz ki, zərərçəkmişin döyülüb bıçaqlanması ilə bağlı aidiyyatı orqanlara müraciət edilməsəydi və məsələ ictimai əhəmiyyət qazanmasaydı Bayram Sultanlının "döyülməsi” faktı gündəmə gəlməyəcəkdi. Buna misal kimi aşağıdakı suala cavab axtarmaq yetərlidir. Nəyə görə Bayram Sültanlının 20 sentyabr 2013- cü ildə "döyülməsi” ilə bağlı hüquq- mühafizə orqanlarına "hadisə”-dən 4 gün sonra, Əlgüşad Gülalıyev döyülüb bıçaqlanandan dərhal sonra "müraciət edilir”?
İş materialları ilə tanış olarkən məlum oldu ki, Bayram Sültanlının döyülməsi ilə bağlı əksər "şahidlər” öz ifadələrində hadisənin baş verməsini öz gözləri il görməyiblər, yalnız bu barədə kimdənsə "eşitdiklərini” bildiriblər. Məsələn, iş materiallarının 35- ci səhifəsində Əliquliyev Ceyhun Elqam oğlu, səhifə 37- də Qədirli Natiq Afiq oğlu, səhifə 39- da Mehrəliyev Elnur Arif oğlu və digərləri öz izahatlarında qeyd edirlər ki, onlar bu hadisə barədə yalnız eşidiblər və eşitdiklərini bildirirlər. Hadisəni görməyiblər və hadisə barədə məlumatsızdırlar.İstintaqın hadisəni görməyənlərə bu qədər geniş yer verib onların fikirlərini iş materiallarına əlavə etmək problemə qeyri- peşakar və qərəzli yanaşmanın göstəricisidir.
Hadisənin "şahidi” olanlar isə Bayram Sultanlının döyülməsi ilə bağlı öz ifadələrində hadisənin baş vermə faktını "zərərçəkmiş”- in öz izahatında qeyd etdiyi kimi saat 11 radələrində deyil, saat 12: 10 dəqiqədə baş verdiyini bildiriblər. Maraqlıdır ki, hadisənin bütün "şahidləri” olayın saat 12: 10 dəqiqədə baş verdiyini bildirir və bütün izahatların hamısı eyni ssenari ilə yazılmaqla demək olar ki, tam oxşardır. Bu faktın özü onu göstərir ki, məhdud fəaliyyət qabiliyyəti olan, yetkinlik yaşına çatmayan orta məktəb şagirdlərindən götürülmüş izahatlar öncədən onları təlimatlandırılaraq müəyyən bəlli bir istiqamətə yönəldilib və ya hazır izahatlara onlara qol çəkdirilib. Məqsəd isə nəyin bahasına olursa olsun Bayram Sultanlının Əlgüşad Gülalıyev tərəfindən döyülməsinə hüquqi don geyindirmək olub.
Maraqlıdır ki, iş materiallarının 43- cü səhifəsində Xətai RPİ- nin İŞ- nin müstəntiqi polis baş leytinantı Həsənəliyev Məmmədşah B. Sultanlının "döyülmə” saatını 11: 48 göstərmişdir. Bu faktın özü də "şahidlərin” verdikləri izahatlarla bağlı yuxarıda deyilənlərə sübut ola bilər.
Təəssüflə qeyd etmək lazımdır ki, istintaq yalnız "zərərçəkə”nin və istintaqın maraqlarına uyğun tərəflərin ifadələrini alıb, müdafiə tərəfinin təqdim etdiyi şahidləri dinləməyib.
Hər hansı bir hadisənin baş vermə vəziyyətini göstərən əsaslı vasitələrdən biri şübhəsiz ki hadisə məkanına yaxın ərazidə quraşdırılmış müasir video kameralardır. Maraqlıdır ki, hadisə baş verdiyi iddia olunan saatda NZS qəsəbəsi 165 saylı orta məktəbin 3 mərtəbəsində dəhlizin yuxarı hissəsində quraşdırılmış video kamerada olan görüntülər Bayram Sultanlının Əlgüşad Gülalıyev tərəfindən döyüldüyünü təsdiqləmir və ya bu barədə hər hansı görüntü yoxdur. İş materiallarına əlavə olunmuş həmin məlum video görüntü də B. Sultanlının Əlgüşad Gülalıyev tərəfindən döyülməsinə dair hər hansı məqam yoxdur. Bununla bağlı iş materiallarının 43- cü səhifəsində video görüntüyə baxış keçirilməsi barədə Xətai RPİ- nin İŞ- nin müstəntiqi polis baş leytinantı Həsənəliyev Məmmədşahın tərtib etdiyi protokolda da qeyd olunur ki, koridorun sonunda bir neçə şəxs bir yerə toplaşıb mübahisə etsələr də onların şəxsiyyətini və üzlərini müəyyən edə bilməyib. Müdafiə tərəfi işin ilkin istintaqını aparan Xətai RPİ- nin İŞ- nin müstəntiqi polis baş leytinantı Həsənəliyev Məmmədşahla birgə video görüntüyə baxış keçirərkən hadisə zamanı olay yerində Əlgüşad Gülalıyevin olduğuna dair hər hansı görüntü, məqam aşkar olunmadı. Baxmayaraq ki, video kamera hadisənin baş verdiyi iddia olunan məkanı və şəxsləri tam əhatə edir.
Bayram Sültanlı ilə Əlgüşad Gülalıyevin üzləşdirmə epizodunda müstəntiqin B. Sultanlıya Əlgüşad Gülalıyevi göstərərək "Qarşınızda oturan şəxsi tanıyırsınızmı?” sualına çiyinlərini çəkərək öncə, "yox, tanımıram” deməsi, sonradan kənar müdaxilədən sonra "tanış gəlir” deməsi də Əlgüşad Gülalıyevin Bayram Sultanlını döymədiyini və ümumiyyətlə sonuncunun onu tanımadığını və xatırlamadığını bir daha ortaya qoyur. Təəssüf ki, bu qeydlər üzləşdirmə protokolunda olduğu kimi əks olunmayıb.
Bayram Sültanlı ilə Əlgüşad Gülalıyevin üzləşdirmə epizodunda məlum oldu ki, iddiaçı tərəf Bayram Sultanlı idmanın qaydasız döyüş növü ilə məşğuldur, Rusiyada yarışlarda iştirak edib və fərqlənib. O eyni zamanda yaşca Əlgüşad Gülalıyevdən böyük, bədəncə ondan cüssəlidir. Belə olan halda sual oluna bilər. Idmanın heç bir növü ilə məşğul olmayan, yaşca və bədəncə B. Sultanlıdan kiçik olan Ə. Gülalıyev 4- 5 dəqiqə onu necə döyə bilərdi?

Beləliklə:
Müdafiə tərəfi hesab edir ki, Gülalıyev Əlgüşad Oqtay oğlunun əməlində cinayət tərkibi olmadıından, həmçinin hər hansı cinayətin törədilməsində iştirakı olmadığından və ya təqsirliliyi sübuta yetirilmədiyindən barəsində başlanmış cinayət işinə bəraətverici əsaslarla xitam verilməli, onun yerli və beynəlxalq müqavilələrlər təminat verilən təməl hüquqlarının (azadlıq, toxunulmazlıq, təqsirsizlik prezumsiyası hüququ, mənzil toxunulmazlığı və s.) qorunmalıdır.

Tələbin hüquqi əsasları
Azərbaycan Respublikasının da yurisdiksiyasında olduğu kimi İnsan Hüquqlarının və Əsas Azadlıqların Müdafiəsi Haqqında Konvensiyanın 7- ci maddəsində qanunsuz cəzalandırmamaq, həmin Konvensiyanın 5- ci maddəsində isə Azadlıq və Toxunulmazlıq hüququ nəzərdə tutulmuşdur.
Azərbaycan Respublikası Cinayət Prosessual Məcəllənin 39- cu maddəsində cinayət təqibini istisna edən hallar nəzərdə tutulmuşdur.
Həmin maddənin 39.1.2- ci (əməldə cinayət təqibi olmadıqda) və 39.2 (Hər hansı şəxs barəsində başlanmış cinayət təqibinə həmçinin onun cinayət törədilməsinə aidiyyatı olmadıqda və ya təqsirliliyi sübuta yetirilmədikdə xitam verilir) maddələrinə əsasən cinayət təqibi başlanıla bilməz, başlanılan cinayət təqibinə isə xitam verilməlidir.

Azərbaycan Respublikası CPM- in 10.1- ci maddəsində deyilir ki, Məhkəmələr və cinayət prosesinin iştirakçları Azərbaycan Respublikası Konistitusiyasının, bu Məcəllənin, Azərbaycan Respublikasının digər qanunlarının, habelə Azərbaycan Respublikasının tərəfdar çıxdığı beynəlxalq müqavilələrin müddəlarına ciddi əməl etməlidir.

Göstərilənləri nəzərə alaraq və Azərbaycan Respublikası CPM- in 39.1.2, 39.2 və 41.1- ci maddələrini əsas tutaraq

Xahiş edirəm:

·Gülalıyev Əlgüşad Oqtay oğlunun Azərbaycan Respublikası Cinayət Məcəlləsinin 221.1- ci maddəsi ilə təqsirləndirilməsinə dair cinayət işinə əməldə cinayət tərkibi olmadığına (CM- nin 39.1.2-ci maddəsi) və ya təqsirliliyi sübuta yetirilmədiyinə görə (CM- nin 39.2- ci maddəsi) görə bəraətverici əsaslarla xitam verilsin.