Məhkəmə ölümlə nəticələnən yanğınla bağlı “Azəriqaz”ı 2800 manat cərimələdi

Təhlükəsizlik qaydalarını pozmaqda təqsirli bilinən Tovuz rayon sakinləri – İsmayıl İsmayılov, Bayram Tağıyev və Ələddin Məmmədovun cinayət işi üzrə məhkəmə prosesi başa çatıb.

İttihama görə, İsmayıl İsmayılov 15 mart 2013-cü il tarixdən 09 aprel 2015- ci il tarixədək Tovuz Qaz İstismar Sahəsinin qaz kəmərlərinin və avadanlıqlarının istismarı, qəza dispetçer xidmətində növbə rəisi vəzifəsində işləyib. Onun üzərinə yanğın təhlükəsizliyi qaydalarına riayət edilməsi vəzifəsi qoyulmuş şəxs olub. Amma İsmayıl İsmayılov yanğın təhlükəsizliyini təmin etməyib.

15 dekabr 2014-cü il tarixdə, saat 19.00-da Tovuz rayonun Abulbəyli kəndinin Y.Sadıqov küçəsində qaz iyi gəlməsi barədə Tovuz Qaz İstismarı Sahəsinin qəza-dispetçer xidmətinə daxil olub. Məlumat əsasında İsmayıl İsmayılov bərpaçı-çilingər Ələddin Məmmədov ilə birlikdə saat 19.30 radələrində qeyd olunan ünvana gəlib.

Orada kəskin qaz iyi hiss edilməsinə baxmayaraq, İsmayıl İsmayılov Tovuz Qaz İstismarı Sahəsinin balansında və istismarında olan, Y.Sadıqov küçəsindən keçən 57 mm diametrli yeganə qaz kəmərinin qaydalara uyğun yoxlanılmasını təşkil etməyib və onun yerin altına düşən hissəsini cihazla yoxlamayıb, kəmərdən hər iki tərəfə 15 metr məsafədə yerləşən evlərin zirzəmisində, kanalizasiya və başqa

kommunikasiya quyularında qaz olub-olmamasını müəyyənləşdirməyib.

İsmayıl İsmayılov və Ələddin Məmmədov qaz sızma yerini aşkar etmədən və nasazlığın aradan qaldırılması üçün zəruri tədbirlər görmədən ərazini tərk ediblər.

Qaz kəmərinin yerin altına düşən hissəsində korroziya nəticəsində əmələ gəlmiş dəliklərdən sızan qaz torpağın altı ilə Qəribə Həsənovaya məxsus evin otaqlarına dolub. Həmin gün saat 21.15 radələrində əmələ gəlmiş partlayış konsentrasiyalı qaz hava qarışığı ev sakini Ceyran Əmiraslanovanın evə daxil olaraq işığı yandırdığı zaman yaranmış qığılcımın təsirindən alışaraq yanğınla müşayiət olunan partlayış baş verib.

Nəticədə Ceyran Əmiraslanova ümumi bədən xəsarəti ilə xəstəxanaya yerləşdirilib. Ona tibbi yardım göstərilməsinə baxmayaraq 6 yanvar 2015-ci il tarixdə müalicə aldığı xəstəxanada ölüb.

Həmçinin evin və içərisindəki əşyalar yanğın zamanı yararsız hala düşüb. Bu səbəbdən Qəribə Həsənovaya tikinti üzrə 25755,0 manat, əmtəə üzrə 7947 manat 50 qəpik, cəmi 33702 manat 50 qəpik maddi ziyan dəyib.

Həmçinin Tovuz Qaz İstismar Sahəsinin Qaz kəmərlərinin və avadanlıqlarının istismarı, qəza-dispetçer xidmətinin növbə rəisi vəzifəsində işləyən Bayram Tağıyev də eyni iş üzrə məsuliyyət daşıyıb.

Onlar Cinayət Məcəlləsinin 225.2-ci (yanğın təhlükəsizliyi qaydalarını pozma zamanı ehtiyatsızlıqdan zərərçəkmiş şəxsin

ölümünə və ya digər ağır nəticələrə səbəb olma) maddəsi ilə ittiham ediliblər.

Tovuz rayon Məhkəməsinin hökmü ilə təqsirləndirilən şəxslərin hər biri 2 il müddətinə dövlət və yerli özünü idarə etmə orqanlarında rəhbər və maddi məsul vəzifə tutma hüququndan məhrum edilməklə 3 il müddətinə azadlıqdan məhrumetmə cəzası təyin ediliblər.

Onların cəzalarını məntəqə tipli cəzaçəkmə müəssisəsində çəkmələri, barələrində seçilmiş başqa yerə getməmək haqqında iltizam qətimkan tədbirinin hökm qanuni qüvvəsini alanadək dəyişdirilmədən saxlanılması barədə qərar qəbul edilib.

Hökmə əsasən cinayət işi üzrə mülki iddianın qismən təmin olunub və “Azəriqaz” İstehsalat Birliyindən 2800 manat alınaraq mülki iddiaçı Qəribə Həsənovaya verilməsi barədə qərar qəbul edilib. Həmçinin mülki iddianın qalan 5697 manat 50 qəpik hissədə rədd edilməsi müəyyən edilib.

Hökmündən narazı qalan mülki cavabdeh “Azəriqaz” İstehsalat Birliyi apelyasiya şikayəti verib. Mülki cavabdeh hökmün mülki iddia tələbinin təmin olunması hissəsində ləğv edilərək iş üzrə yeni qərar qəbul edilməsini xahiş edib.

“Azəriqaz”ın şikayəti araşdırılması üçün Gəncə Apelyasiya Məhkəməsinə göndərilib. Apelyasiya şikayəti hakim Fikrət Əliyevin sədrlik etdiyi kollegiyada araşdırılıb.

“Azəriqaz” İstehsalat Birliyinin nümayəndəsi Kamran Qasımov apelyasiya şikayətinin dəlilləri üzrə çıxış edib. O, bildirib ki, məhkəmənin hökmü qanunsuz və əsassızdır: “Bakı

şəhəri Xətai rayon İcra şöbəsinin 4 sentyabr 2015-ci il atrixli məktubuna əsasən Tovuz Rayon Məhkəməsinin 14 iyul 2015-ci il tarixli icra sənədi icra edilməsi üçün “Azəriqaz” İstehsalat Birliyinə göndərilib. Lakin hökm 14 iyul 2015-ci il tarixdə elan olunmasına baxmayaraq hələ də “Azəriqaz” İstehsalat Birliyinə göndərilməyib. Bu istiqamətdə olan qanunvericiliyin tələbləri pozulub. Belə ki, iş üzrə mülki cavabdeh olduqlarından qüvvədə olan qanunvericiliyə əsasən hökm “Azəriqaz” İstehsalat Birliyinə göndərilməli olduğu halda göndərilməsi təmin edilməyib. İş üzrə aparılmış icraatda hüquqlarımız pozulub”.

Nümayəndə qeyd edib ki, iş üzrə istintaq aparmış Azərbaycan Respublikası Fövqaladə Hallar Nazirliyinin Əməliyyat-İstintaq idarəsi tərəfindən 18 dekabr 2014-cü il tarixdə ekspertiza təyin olunması haqqında qərar qəbul edilib: “Qərar əsasında Azərbaycan Respubliaksı Məhkəmə Ekspertiza Mərkəzi tərəfindən iş üzrə ekspertiza aparılıb, ekspert rəyləri tərtib olunaraq iş materiallarına əlavə edilib. Məhkəmə Ekspertiza Mərkəzinin 29 yanvar 2015-ci il tarixli, 3 mart 2015-ci il tarixli rəylərinə əsasən Tovuz rayonu Abulbəyli kənd sakini Qəribə Həsənovaya məxsus fərdi yaşayış evində baş vermiş yanğın hadisəsi nəticəsində əmlaka ümumilikdə 27005,00 manat dəymiş ziyan müəyyənləşdirilib. Lakin iş üzrə aparılmış ekspertiza zamanı qanunvericiliyin tələblərinə əməl olunmayıb. İş üzrə təyin edilmiş ekspertiza barədə proses iştiraçısı olaraq məlumatımız olmayıb və beləliklə, ekspertizada iştirakımız təmin edilməyib. Ona görə də, hadisə zamanı yararsız hala düşmüş və məhv olmuş müxtəlif adda maddi qiymətli inşaat materiallarının, məişət əşyalarının

həcminin, dəyərinin müəyyənləşdirilməsində, ekspertizanın gəldiyi nəticədə şübhəli məqamlar var. Odur ki, sözügedən ekspert rəylərinə əsasən 27005,00 manat məbləğində dəymiş ziyanın “Azəriqaz” İstehsalat Birliyi tərəfindən tutulması əsassızdır”.

Kamran Qasımovun sözlərinə görə, “Azəriqaz” İstehsalat Birliyinin Tovuz qaz istismarı sahəsinin əməkdaşları tərəfindən hadisə nəticəsində əmlaka dəymiş ziyanın qarşılığı olaraq əmlak sahibinə 7000,00 manat məbləğində maddi köməklik göstərilib: “Məhkəmə iclasında ev sahibi Qəribə Həsənova ona Tovuz qaz istismarı sahəsinin əməkdaşları tərəfindən 7000,00 manat məbləğində köməklik göstərildiyini etiraf edib. Lakin bunun mənəvi dəstək olduğunu qeyd edib. Məhkəmə icraatı gedişində 7000,00 manat vəsaitin iddiaçıya maddi, yoxsa mənəvi köməklik kimi verildiyi sübuta yetirilməli olduğu halda, bu barədə heç bir icraat aparılmayıb. Beləcə hökm çıxarılarkən sözügedən vəsaitin, dəymiş ziyana köməklik, eləcə də, maddi köməklik kimi qeyd olunmaması iş üzrə aparılmış məhkəmə icraatının qeyri-obyektivliyindən xəbər verir. Odur ki, məhkəmə araşdırması zamanı qeyd olunanlara və eləcə də işinin faktiki hallarına düzgün qiymət verilməyib. Bununla da qüvvədə olan qanunvericiliyin tələbləri pozulub”.

Apelyasiya şikayətinin dəlillərini araşdıran hakim kollegiyası sonda qərar elan edib. Qərara görə, apelyasiya şikayəti təmin edilməyib.

gundemxeber.az