Avropanın enerji təhlükəsizliyi prosesində iştirakı Qərbi qane edir, əsas problem insan haqları ilə bağlıdır.

“Azərbaycan hakimiyyəti illərdir ki, siyasi məhbus məsələsini, siyasi rəqiblərin təqib olunması problemini Qərb institutları üçün əsas prioritetə çevirə bilib. Bu səbəbdən də, demokratik prosesin digər vacib amilləri arxa plana keçib”. Bu sözləri “Gündem Xəbər”ə açıqlamasında Demokratik İnteqrasiya Assosiasiyasının sədri Qabil Əliyev bildirib. Q.Əliyevin fikrincə demokratiya məsələsinin sırf siyasi məhbus məsələsinə köklənməsi, birbaşa iqtidarın maraqların xidmət edir: “Məsələ burasındadır ki, Avropa strukturları demokratik proseslər, xüsusilə də seçki qanunvericiliyi ilə bağlı digər ölkələrdə də eyni siyasəti yürüdür.
Azərbaycan kimi Ermənistanda da, Belorusiyada da danışıqların prioriteti siyasi məhbusların azad edilməsi məsələsidir. Qərb yalnız Rusiyada seçki məsələsini insan haqları məsələsindən daha çox qabardır. Ancaq bu o demək deyil ki, Avropa strukturları Azərbaycan iqtidarının marağında olmayan digər məsələlərə toxunmaq istəmir. Yaxın günlərdə Avropa Şurasının Venesiya Komissiyası təmsilçilərinin Azərbaycana səfəri nəzərdə tutulsa da, son anda səfər təxirə salındı. Məsələ gündəmdədir. Bizdə olan bilgiyə görə, Azərbaycanda keçiriləcək 2015-ci il parlament seçkilərini Qərbin demokratiya institutları çox ciddi şəkildə gündəmə gətirəcək. Çox ciddi müzakirələrin aparılacağı da gözlənilir. Nəticələr haqqında isə hələlik bir söz söyləmək çətindir, çünki bu bir çox amillərdən asılıdır. Bu sırada postsovet məkanında yaranan geosiyasi durum əsas yerlərdən birini tutur”.
Qərbin əsas siyasi maragları ilkin hansı təsüratları yaradır?
Qərbin insan haqları məsələsində bu cür israrlı tələbləri, Azərbaycanın üzərinə götürdüyü digər öhdəlikləri yerinə yetirməsi ilə bağlıdır: “Azərbaycan Qərblə əməkdaşlıq anlaşmaları üzrə öhdəliklərini yerinə yetirir. Məsələn, Qərblə enerji layihələrinin icrasında problem yoxdur. Azərbaycanın Avropanın enerji təhlükəsizliyi prosesində iştirakı Qərbi qane edir. Əsas problem insan haqları ilə bağlıdır ki, Azərbaycan da insan haqları, demokratik azadlıqlarla bağlı üzərinə düşən öhdəlikləri yerinə yetirmir. Ona görə də, Qərb davamlı olaraq bu məqamı vurğulayır. Hələlik iqtidar irəli sürülən tələbləri qulaqardına vurur, insan haqları problemlərini neftlə kompensasiya eləməyə çalışır. Əlbəttə ki, Azərbaycan iqtidarı bu durumu bilərəkdən, qəsdən yaradır. Rəsmi Bakı çox yanlış olaraq düşünür ki, dünyada insan haqları heç kimi maraqlandırmır, Avropa strukturları, ümumilikdə Qərb bu problemin yoluna qoyulmasında heç zaman israr etməyəcək. Azərbaycan məmurları düşünürlər ki, Qərb istədiyi qədər danışa bilər, onsuz da heç nə edə bilməyəcək. Bu əslində heç də belə deyil. Ola bilər ki, bu gün Qərbin əlində Azərbaycana təsir imkanları yoxdur, ancaq sabah ola bilər. Azərbaycanın üzərinə götürdüyü öhdəlikləri hansı formada yerinə yetirməsi mütləq masaya yatırılacaq, mütləq müzakirə də olunacaq. Odur ki, iqtidar gələcəkdə öz durumunu çətinləşdirməmək üçün, bu məsələni indidən yoluna qoymalıdır. Bundan yalnız Azərbaycan qazanar”.

Hüseyn Abbasoğlu

gundemxeber.az