RTŞ müdiri Leyla İsayeva üç aptek, bir villa, iki yüz min manat da pula nurçuluğun təbliği sayəsində nail olub

“Bizim Dovr”ün 30.07.2016-cı il tarixli sayında “Ağstafa təhsili nurçuların hədəfində” sərlövhəli tənqidi material dərc olunmuşdu. Məqalədə bu təriqətinin getdikcə aktivləşən fəaliyyəti mövzusuna toxunulmuş, qeyd olunmuşdu ki, bu gün ölkəmizin təhsil sistemi son illər ərzində bütün digər problemlərdən daha ciddi bir təhlükə ilə üz-üzə qalmışdır. Həmçinin biz vurğulamışdıq ki, əslində bu təhlükəni bir virus yoluxması kimi qəbul etmək lazımdır. Çünki təcrübə göstərir ki, bir tərəfdən bu problemlə başqa yanaşma tərzi ilə heç cür mübarizə aparmaq olmur. Digər tərəfdən isə, ölkənin təhsil sisteminə daxil olmaqla, bu virus on minlərlə uşaq və gənclərimizin milli-vətənpərvər ruhda formalaşmaları işini əngəlləyir, yetişməkdə olan gənc nəslin düşüncə tərzini bizə yad ideologiyalara tabe etdirir.

Deyilənləri təsdiq etmək üçün isə, biz nümunə kimi, bu yaxınlarda redaksiyamıza Ağstafa rayonundan təqdim olunmuş açıqlamalara istinad etmişdik. Məlum olduğu kimi, ötən ilin oktyabr ayında Ağstafa Rayon Təhsil Şöbəsinin müdiri vəzifəsinə Leyla İsayeva təyinat almıdır. Hərçənd, rayondan aldığımız məlumatlara görə, rayon ictimaiyyətinin böyük əksəriyyəti bu təyinata qətiyyən haqq qazandırmır. Bu barədə bizimdovr.az-a daxil olmuş açıqlamada deyilir: “Ötən ilin sonlarında Ağstafa Rayon İcra Hakimiyyətinin başçısı Məhərrəm Quliyevə nurçuların Gəncə-Qazax regional mərkəzindən müəyyən bir təklif gəlib. Elə bir təklif ki, Məhərrəm Quliyev ondan imtina edə bilməyib. Belə ki, nurçular Leyla İsayevanın Ağstafa RTŞ-yə müdir təyin olunması üçün başçıya çox böyük məbləğdə pul təklif ediblər. Bundan sonra başçı asanlıqla olmasa da, hər halda keçmiş müdir, mərhum Fərhad Vəliyevin işdən azad olunmasına və Leyla İsayevanın təyinatına nail ola bilib. Bütün bu qalmaqallar, haqsızlıqlar və təhdidlər nəticəsində Fərhad Vəliyev ürək çatışmazlığına məruz qalaraq, dünyasını dəyişib. Leyla İsayeva isə, vəzifəyə gələn gündən öz ideoloji rəhbərlərinin tapşırıqlarına əsasən Ağstafa təhsilində köklü islahatlara başlayıb. Qısa müddət ərzində rayonun əksər məktəblərinin direktorları dəyişdirilərək nurçularla əvəzlənib. Eyni proses həmçinin orta məktəb müəllimləri arasında da aparılır. Ağstafa məktəblərində nurçuluq təriqətinin təbliğindən son dərəcə narahat olan valideynlər isə, öz dərdlərini demək üçün nə təhsil şöbəsinə, nə də rayon icra hakimiyyətinə üz tuta bilmirlər”. Qeyd edək ki, redaksiyamıza yeni daxil olmuş məlumatda bu təyinatla bağlı daha maraqlı açıqlamalar təqdim olunur. Məlumatda deyilir: “Sizin yazdığınız məqalədə icra başçısına Leyla İsayevanın təyinatı ilə bağlı təqdim olunmuş böyük məbləğin məhz hansı rəqəmlərdə ifadə olunmasına RTŞ müdiri özü aydınlıq gətirib. Leyla xanımın deməyinə görə, bu məqsəd üçün Məhərrəm Quliyevə 200 min manat məbləğində “şirinlik” verilib. Amma bu da bütün reallığı tam əks etdirmir. Məsələ bundadır ki, Leyla İsayeva nurçulara qarşı münasibətlərin ketdikcə kəskinləşməsinin fonunda, icra başçısının da riskinin artmasını bəhanə edərək, hər ay ondan külli-miqdarda pul aldığını iddia edir. Soruşa bilərsiniz ki, bəs adi təhsil şöbə müdirində bu qədər vəsait hardandır? Amma Leyla İsayeva heç də adi təhsil işçisi deyil. İlk növbədə unutmayın ki, o, nurçular kimi varlı bir hərəkat tərəfindən dəstəklənir. Digər tərəfdən isə, Leyla xanımın təkcə Ağstafada fəaliyyət göstərən üç aptekindən, banka icarəyə verdiyi binadan aldığı gəlirləri də hesabdan atmaq olmaz. Vəzifəyə gəldiyi hələ heç bir il olmasa da, rayon mərkəzində tikdirdiyi villasına da böyük məbləğdə vəsaitlər sərf olunub... ”

Bir daha xatırladaq ki, bizimdovr.az-a daxil olan məlumatda mənbə, Leyla İsayevanın arxasında hələlik adını açıqlamaq istəmədiyi bir millət vəkilinin də durduğunu iddia edir.

Materialda adı keçən bütün tərəflərin məsələyə münasibətini öyrənə bilərik.