İyunun sonunadək Müsavat başqanının namizədliyi elan olunacaq

Milli Şurada vahid namizəd müzakirəsi yekunlaşmaq üzrədir.

Daxil olan məlumata görə, artıq MŞ-in vahid namizədi artıq demək olar ki, müəyyənləşib. Bu şəxs hər kəsin gözlədiyi kimi Rüstəm İbrahimbəyov yox, Müsavat başqanı İsa Qəmbərdir.

Qeyd edək ki, MŞ-in sədri Rüstəm İbrahimbəyov son müsahibəsində bildirib ki, iyunun 18 və 28-də qurumun növbəti toplantıları keçiriləcək və hər iki toplantıda vahid namizəd məsələsi müzakirəyə çıxarılacaq. Böyük ehtimalla da bu ayın sonunda Milli Şuranın vahid namizədinin kimliyi elan olunacaq.

Onu da bildirək ki, İctimai Palatanın son sessiyasında müxalifətin vahid namizədi ilə bağlı məsələdə bir çox kartlar açıldı. Müxalifətin əsas güc mərkəzləri olan AXCP və Müsavat partiyalarının rəhbərlərinin açıqlamaları vahid namizədi məsələsinin böyük ölçüdə razılaşdırıldığını göstərdi.

Bildirək ki, İP-in son toplantısında AXCP sədri Əli Kərimli vahid namizəd kimi İsa Qəmbəri dəstəkləyə biləcəyini açıqlayıb. İsa Qəmbərlə şəxsi münasibətinin çox yaxşı olduğunu deyən AXCP sədri bildirib ki, əgər İ.Qəmbər keçid dövründə iki illiyə prezident olmaq istəsə, buna razılıq verə bilər: “İsa bəy keçid dövrü üçün namizəd şəxsə olan tələbləri özü üçün məqbul bilsə və digər Milli Şura təmsilçilərinin razılığını ala bilsə, hesab edin ki, mənim də İsa bəyə razılığım var”.

Kərimlinin sözlərinə görə, vahid namizəd elə bir kompromis fiqurun ətrafında ola bilər ki, onun siyasi iddiaları və uzun müddətli hakimiyyət qurmaq planları olmasın.

Elə bu açıqlamadan bəlli olan ştrixlər vahid namizəd məsələsinin həll edildiyini göstərir. Mənbə bildirir ki, əslində R.İbrahimbəyov özü də vahid namizədlik üçün Müsavat başqanının adını çəkməyi planlayır. Burada narahatlıq doğuran əsas məqam isə MŞ-dəki İsa Qəmbər əleyhdarı olan qüvvələrin də Müsavat başqanını dəstəkləməyə razı salmaqdır.

Əslində, AXCP sədrinin də İ.Qəmbərin yox, R.İbrahimbəyovun namizədliyini dəstəkləməsinin səbəbi məhz bu məqamdır. Ə.Kərimli bu barədə İP-in son sessiyasında deyir: “Mən İsa bəyə o dəstəyi ona görə vermərəm ki, Milli Şura bölünsün iki yerə - bizimkilər və digərləri. Sonra oradan da “El” hərəkatı, ACP, ALP və başqaları da bir namizəd çıxarsın və biz Milli Şuranı bölək. Kiminsə belə arzusu varsa, mən belə projedə iştirak etmərəm”.

Ə.Kərimlinin Müsavat başqanına mesajları çox netdir: MŞ daxilində ümumi razılıq əldə et, səni dəstəkləyim.

Mənbə bildirir ki, bu razılıq böyük ölçüdə əldə edilib. Belə ki, məlumata görə, əslində R.İbrahimbəyovun özünün alternativ namizədi də məhz İsa Qəmbərdir.

Vahid namizədin müəyyənləşdirilməsi üçün əsas fiqurlar olan Ə.Kərimli və R.İbrahimbəyovun Müsavat başqanına dəstək verməsinin səbəbi isə sonuncunun İP-in axırıncı sessiyasındakı açıqlamasında görünür: “Milli Şuranın 2 illik dövr ərzində seçəcəyi namizədin ölkədə köklü islahatlar aparacaq. Həmin dövr ərzində prezident respublikasından parlament respublikasına keçiləcək. 2 il sonra isə parlament seçkilərində qalib gələn partiya hökuməti formalaşdıracaq” – İ.Qəmbər deyir.

Açıqlamadan görünür ki, AXCP sədrinin “vahid namizəd elə bir kompromis fiqurun ətrafında ola bilər ki, onun siyasi iddiaları və uzun müddətli hakimiyyət qurmaq planları olmasın” şərti Müsavat başqanı tərəfindən qəbul edilib. Mənbənin sözlərinə görə, artıq Kərimli, İbrahimbəyov və Qəmbər arasında sonuncunun 2015-ci ildə siyasi iddialarından əl çəkəcəyi və prezidentliyə namizəd olmayacağı ilə bağlı centlmen razılaşması da əldə edilib. Bütün bu şərtlər isə MŞ daxilində qəbul ediləcək rəsmi sənədlərdə öz təsdiqini tapacaq. Bu barədə isə Müsavat başqanı özü açıqlamasında demişdi. O, vahid namizəd olacaq şəxsin qəbul edəcəyi şərtlərin öncədən imzalanacaq razılaşdırma sənədi ilə müəyyənləşdirilməsinin vacibliyini bildirmişdi.

Mənbə bildirir ki, İ.Qəmbər həmçinin, prezident seçiləcəyi halda səlahiyyətlərinin məhdudlaşdırılması ilə bağlı da razılığa gəlib və bir sıra güzəştlərə getməyi qəbul edib. Məhz bu məqam da onun namizədliyinin Ə.Kərimli və R.İbrahimbəyov tərəfindən dəstəkləməsi variantını gücləndirib.

Adı çəkilən fiqurların, həmçinin, MŞ-dəki digər qüvvələrin İ.Qəmbəri dəstəkləməyə razılıq verməsinin digər bir sıra səbəbləri var. Belə ki, siyasilər hakimiyyətin R.İbrahimbəyovun vurulması və namizədliyinin qeydə alınmamağı ilə bağlı xeyli kartlarının olduğunu nəzərə alaraq, onun namizədliyi üzərində israr etməkdən vaz keçiblər. Mənbə deyir ki, MŞ sədrinin ikili vətəndaşlığının olduğu iddiası, həmçinin, onun Azərbaycanda davamlı yaşamamağı ilə bağlı məqamlar hakimiyyətin yekunda R.İbrahimbəyovun namizədliyini qeydiyyata almaqdan imtina etməsinə yol aça bilər. Bu isə müxalifətin 2013-cü il seçkilərində fiaskoya uğramasına və öz sonuna imza atmasına səbəb olar. Bu baxımdan da, MŞ-dəki qüvvələr İbrahimbəyovun vahid namizəd olması barədə qərarlarında israrlı deyillər.

Qaynağın sözlərinə görə, başqa AXCP sədri olmaqla, MŞ-dəki bütün siyasilər yaxşı bilir ki, hakimiyyətin Müsavat başqanı ilə bağlı bütün kartları ortadadır və onun hər hansı yeni ittihamlarla küncə sıxışdıra bilməz. R.İbrahimbəyovla bağlı bu məqam isə tamamilə qaranlıqdır və iqtidarın tanınmış dramaturqu hansı ittihamlarla vura biləcəyi heç bir şəkildə bilinmir.

Mənbə bildirir ki, MŞ-də İsa Qəmbərin vahid namizədliyinin dəstəkləməyə istəkli görünməyən “El”, ALP, ACP kimi İsa Qəmbər düşməni olan siyasi qüvvələri yola gətirmək isə R.İbrahimbəyova tapşırılıb. Belə ki, vahid namizəd kimi İbrahimbəyovu dəstəkləyən adı çəkilən qüvvələri İ.Qəmbərin vahid namizədliyinə inandırmaq məhz tanınmış dramaturqun öhdəsinə buraxılıb.

MŞ-in vahid namizəd olaraq İ.Qəmbərə “stavka” etməsinin digər bir səbəbi isə maliyyə məsələləri ilə bağlıdır. Bildirilir ki, hazırda MŞ-də olan ən pullu fiqur kimi görünən R.İbrahimbəyovun quruma maliyyə yardımını ölkədən kənarda etməsi daha optimal variant kimi görünür. Liderlər razılaşdırıb ki, İbrahimbəyov ölkədən kənarda qalaraq, MŞ-ə beynəlxalq siyasi dəstək və maliyyə yardımı məsələlərinin həlli ilə məşğul olur, İ.Qəmbər isə ölkə daxilində siyasi dəstək qazanmaq və xalqın siyasi passivliyini aradan qaldırmaq üçün fəaliyyət göstərir.

Məlumatda bildirilir ki, MŞ-in vahid namizədinin açıqlamasının ləngidiyini dərk edən siyasilər bu məsələnin bu ayın sonuna qədər həll edilib, elan olunmasını qərarlaşdırıblar. İyunun sonuna qədər İ.Qəmbərin vahid namizəd elan olunmasının ardınca isə müxalifət siyasi aktivliyi artırmağa və kütləvi mitinqlər keçirməyə başlayacaq. R.İbrahimbəyovun ölkəyə gəlişi isə yayın sonuna qədər ertələnəcək. Seçki təbliğatının rəsmi qaydada başlayacağı müddətə qədər isə R.İbrahimbəyovun ölkədən kənarda beynəlxalq birlikdən MŞ-ə dəstək toplamağa çalışacağı bildirilir.