“Məsələnin arxasında təhlükəsizlik orqanları dayana bilər”
Bir neçə gündür Milli Şuranın sonuncu prezident seçkilərində vahid namizədi Cəmil Həsənlinin ötən həftə İstanbulda baş nazirin keçmiş birinci müavini Abbas Abbasovla görüşməsi ilə bağlı xəbərlər ölkənin siyasi gündəminin ən önəmli məsələsi kimi təqdim olunmaqdadır. Professor Cəmil Həsənli belə bir görüşün olmadığını bildirsə də hakimiyyətə yaxın media məsələ ilə bağlı xeyli versiyalar irəli sürməkdə, hətta danışıqların “detalları” ilə bağlı versiyalar irəli sürməkdədir.

APA agentliyinin məsələ ilə bağlı yaydığı geniş məqalədə Cəmil Həsənli-Abbas Abbasov dialoqu az qala Azərbaycanın milli maraqlarına xəyanət ssenarisi kimi təqdim edilir. Sayt yazır ki, seçkilərdən sonra üçün cızılan təlatüm ssenarisi baş tutmadığına görə Əliyevlər iqtidarının getməsində maraqlı olan qüvvələr yeni planlar üzərində işləyir.

APA-nın özəl mənbələrindən əldə etdiyi məlumata görə, görüş Cəmil Həsənli Türk Tarix Qurumunun fəxri üzvlük diplomu alandan bir neçə saat sonra baş tutub: “Görüşdə Azərbaycan baş nazirinin sabiq müavini, hazırda Rusiyada “Azərros” diaspor təşkilatının Ağsaqqallar Şurasına sədrlik edən Abbas Abbasov, onun oğlu, millət vəkili Aydın Abbasov və “LUKoil” şirkətinin Türkiyə nümayəndəliyinin rəhbəri olan digər oğlu Vüsal Abbasov və Milli Şuranın prezidentliyə namizədi olmuş Cəmil Həsənli iştirak ediblər. Görüş çox isti şəraitdə keçirilib. Tərəflər bir-biri ilə xeyli mehriban və çoxdankı tanışlar kimi söhbət edib, yemək yeyiblər. Hətta Cəmil Həsənlinin restorandan məhz Abbasovların avtomobilində ayrıldığı bildirilir”.

Sayt yazır ki, öncə görüşün Rusiya paytaxtında keçirilməsi nəzərdə tutulubmuş. Ancaq bir sıra önəmli məqamlar qərarın son anda dəyişdirilməsinə səbəb olub:“A.Abbasovun yaxın dostu Söyün Sadıqov tərəfindən verilən bu təklif artıq Milli Şura ilə bağlı proseslərdən tamamilə kənarda qalmış Rüstəm İbrahimbəyov tərəfindən etirazla qarşılanıb. O, bu etirazını Milli Şuranın onsuz da “Kremlin layihəsi” kimi dəyərləndirilməsi, Cəmil Həsənlinin bu gəlişinin də həmin ehtimalları daha da gücləndirəcəyi ilə əsaslandırıb. Daxil olan məlumata görə, bundan sonra görüşün məhz İstanbulda baş tutmasına qərar verilib”.

Cəmil Həsənli-Abbas Abbasov görüşünün detalları haqqın iddialar sırasında Orxan Zeynalov olayından sonra Rusiyada azərbaycanlılara qarşı kütləvi təqib məsələsindən istifadə edilərək Azərbaycanda daxili qarşıdurmanı gərginləşdirmək, sosial narazılığı gücləndirmək də var. APA bildirir ki, Abbas Abbasov bu məsələnin reallaşması üçün Rusiyadakı imkanlarını işə salmağa hazırdır.

Saytın iddialarını Cəmil Həsənli ilə yanaşı görüşün digər bir “iştirakçısı” deputat Aydın Abbasov da təkzib edib. Onun sözlərinə görə, nə özü, nə atası Cəmil Həsənli ilə İstanbulda hər hansı görüş keçirməyib.

Diqqət çəkən məqam odur ki, görüş faktı ilə bağlı geniş təhlildə hakimiyyətin belə demək mümkünsə, rəsmi rəqibi olan Cəmil Həsənli deyil, Abbas Abbasov hədəf alınıb. Yazıda rəsmi Bakı ilə münasibətləri “mən daha heç zaman Azərbaycana gələ bilməyəcəm” həddinə qədər soyuyan Abbas Abbasovun yenidən Azərbaycana qayıtmaq, həm də iqtidarla açdığı cəbhənin məğlubu kimi deyil, qalibi kimi qayıtmaq üçün bütün kartları işə saldığı ovqatı yaradılır.

Bu haqda “Yeni Müsavat”a danışan Cəmil Həsənli deyib: “Əgər mən həmin agentliyin rəhbəri olsaydım, bu yazını yazanı işdən qovardım. Bu cür cəfəngiyatı hazırlayıb cəmiyyətə təqdim etmək olduqca bir primitiv mübarizə üsuludur. Yazılanlar gerçəklikdən o qədər uzaqdır ki, mən hətta bununla bağlı şərh vermək istəmirəm. Ola da bilər ki, bu yazı sadəcə agentliyə təqdim olunub və onlar da yayımlayıblar. Söhbət yuxarı instansiyalardan gedir. Ola bilər bu məsələnin arxasında təhlükəsizlik orqanları dayanır”.