İstanbulun Taksim meydanı ətrafında yenidən gərginlik yaranıb. Diyarbəkirdə 1 nəfərin ölümü, 9 adamın yaralanması ilə nəticələnən hadisələrə etiraz edən kütlə Qalatasaray liseyinin binası qarşısına toplaşıb və Taksim meydanına doğru yürüş edib.

Yürüşdə Barış və Demokratiya Partiyasından olan millət vəkilləri Sırrı Sürəyya Öndər və Səbahat Tuncel də iştirak ediblər. Onlar Diyarbəkirdəki hadisəyə görə məsuliyyət daşıyanların məsuliyyətə cəlb olunmasını tələb ediblər.

Polis qüvvələri Taksim meydanı, Gəzi parkı və Cümhuriyyət mavzoleyi ətrafında yüksək təhlükəsizlik tədbirləri görüb.

Ankarada eyni motivlə keçirilən aksiyada isə qarşıdurma yaranıb. Polis aksiya iştirakçı Qızılay meydanına yürüş etməsinə imkan verməyib. Polisin dağılışmaq tələbinə məhəl qoymayan kütləyə qarşı su şırnaqları və gözyaşardıcı qazdan istifadə edilib.