RİH başçısının vermiş olduğu tapşırıqlardan sonra, 73 nəfər stomoloqdan 69-nun fəaliyyətinə “embarqo” tətbiq olunur

Son vaxtlar ayrı-ayrı şəhər və rayonlarda, digər iri yaşayış məntəqələrində stomotoloq fəaliyyəti ilə məşğul olanlarla bəzi vəzifə sahibləri arasında yaşanan, hətta qarşıdurma həddinə qədər yüksələn problemlərin varlığı, hal-hazırda gündəmi zəbt edən mövzulardan birinə də çevrilməkdədir. Görəsən problemlərin kökündə nələr durur və onların əmələ gəlməsinə səbəb olan amillər hansılardır? Bu yöndə müəyyən araşdırmalar apardıqda o da məlum olur ki, yaşananlarda tərəflərdən biri deyil, hər iki tərəf müəyyən günahın sahibidirlər. Çünki müfəssəl məlumatlara malikik ki, bölgələrdə stomotoloq fəaliyyəti ilə məşğul olan bir çox şəxslər tibbi təhsilə malik deyillər, göstərdikləri fəaliyyət növünə görə çox zaman vergidən yayınırlar, iş yerlərində lazımi gigiyenik qaydalara əməl etmirlər, vaxtlı-vaxtında tibbi müayinədən keçmirlər, hətta stomotoloq fəaliyyəti ilə məşğul olmaları üçün aidiyyəti qurumlardan lisenziya belə almırlar və s. vəilaxır. Bu cür qanunsuzluqlar və bir çox çatışmazlıqların varlığı, əksər vəzifə sahiblərinin əllərinə girəvə də verir. Məsələn, adicə bir faktı qeyd edək ki, bu gün Bərdə şəhəri də belə qarşıdurmaların yaşandığı bölgələrdən biridir. Bu haqda məlumatları “Gündəm Xəbər”ə çatdıran mənbənin bildirdiyinə görə, əgər 10 mart 2017-ci il tarixə kimi adı çəkilən şəhərdə 73 nəfər stomotoloq fəaliyyəti ilə məşğul olurdusa, RİH başçısının vermiş olduğu tapşırıqdan sonra, onlardan 69-nun fəaliyyətinə “embarqo” tətbiq olundu. Yalnız indi şəhərin mərkəzi ərazisində fəaliyyət göstərən “Ömürdən pay” klinikasında, hansı ki, bu günə kimi çoxsaylı insanların ömürünə “qənim kəsilən” ünvanda və özəl diş poliklinikasının yaxınlığında Mahir adlı şəxsə məxsus stomotoloji mərkəz fəaliyyət göstərməkdədir.



Xoşagəlməz hal odur ki, Bərdə RİH-nin başçısı stomotoloqların fəaliyyətinə düşünülmüş “embarqo” tətbiq edərkən, heç də əsas amilləri nəzərə almayıb. Yəni, icra başçısı addımını atarkən dövlətin, xalqın mənafeyini deyil, daha çox şəxsi maraqlarını güdüb. Baş verənlərlə bağlı “Gündəm Xəbər”i məlumatlandıran mənbə bildirir ki, bu gün icra başçısı hər stomotoloqun qarşısında belə bir şərt qoyub ki, “kim fəaliyyətini davam etdirmək istəyirsə, o halda on gün ərzində 5 min manat “haqq-hesab”ı ünvan üzrə çatdırmalıdır. Kim də “haqq-hesab”ı çatdıra bilməyəcəksə, o halda həmin şəxsə fəaliyyətini davam etdirməyə imkan verilməyəcək” deyə tapşırıqlarını verib. Belə bir şərt fantastik məbləğ olduğundan, çox keçmir ki, icra başçısının tətbiq etdiyi idarəçilikdən və zorakı addımlarından “cana doyan” stomotoloqlar, üz-üzə qaldıqları problemlərin varlığını bəzi xəbər portallarına ötürülər və ictimailəşməsinə də nail olurlar.
Baş verən olaylardan sonra ortaya incə məqamlar da çıxır. Əgər RİH-nin başçısı cənab Vidadi İsayev xalqının, dövlətinin mənafeyini düşünürsə, stomotoloqların fəaliyyətini qanunsuz fəaliyyət növü hesab edirsə, yəni onların fəaliyyətlərinin dayandırılması haqda göstəriş verirsə və az sonra “5 mini çatdırın ki, fəaliyyətinizi davam etdirə biləsiniz” şərtini qoyursa, deməli icra başçısının məqsədi tələb olunan “haqq-hesab”ları əldə etməkdir. Belə olan halda, günahın daha çox hansı tərəfdə olması mübahisə predmetinə də çevrilir. Çünki, yaşanan ab-havanın varlığı göstərir ki, bir tərəfdə işsizlərin sayı artır və yeni narazılıq hissi baş qaldırır. Digər tərəfdən isə, icra başçısına qarşı ictimai inam azalır və stomotoloq fəaliyyəti ilə məşğul olanlar, qarşı tərəfi korrupsiyaya şərait yaradan tərəf kimi də qəbul edirlər.
Baş verənlərdən görünür ki, RİH-nin başçısı stomotoloqların fəaliyyətini iflic etməklə, əslində onun məqsədi rayon ərazisində qayda-qanunu bərpa etmək deyik, daha çox pərdəarxası maddi maraqlarını təmin etməkdir. Vəziyyətin belə bir macəraya yönəlməsi onu sübut edir ki, tərəflər arasında əmələ gələn narazılıq hissi, gec-tez hansısa xoşagəlməz olayların baş verməsi ilə də nəticələnəcək. Daha yaxşı hal olar ki, rayon rəhbərliyi ona verilmiş səlahiyyətlərindən istifadə etməklə, qanun-qaydanın bərpa edilməsi yöndə müvafiq addımlarını atsın. Mövzunu diqqətdə saxlayacağıq. Qarşı tərəfin də mövqeyini dinləyə bilərik. Ətraflı növbəti saylarımızda.

Mirzə