“Əldə etdiyim məlumatlara görə Aydanı müxtəlif yollarla aldadırlar və 34 gündən sonra onu xərəkdə Zərdab rayonunda yaşadıqları ünvana da göndərirlər”

Nəqliyyat vasitələrinin və piyadaların hərəkət təhlükəsizliyinin təmin olunması, fasiləsiz və rahat hərəkətlərinin qaydaya salınması, optimal hərəkət sürətinin təmin olunması və s. məqsədilə atılan addımlar dövlət hakimiyyət orqanlarının hər zaman diqqət mərkəzində olmuş və olduqca da əhəmiyyət kəsb etmişdir. Düzdür, bu yöndə zaman-zaman təkmil qanunlar qəbul olunmuş və vaxt keçdikcə də dövrün tələbinə uyğun təkmilləşdirilmişdir. Ümumi şəkildə götürdükdə ölkəmizin nəqliyyat sahəsi strateji əhəmiyyət kəsb edən sahələrdən biri olduğu üçün, bu sahədə yaşanan problemlər, həlli vacib olan məsələlər hər zaman əksəriyyəti düşündürmüş və əməli addımların atılmasını zəruri də etmişdir.
Atılan addımların varlığına baxmayaraq, nəqliyyat vasitələri və onların hərəkətlərinin tənzim olunması istiqamətində qəbul olunmuş Qanunların tələbinə məhəl qoymayan elə sürücülər var ki, bu gün də onlar atdıqları addımları ilə çoxsaylı problemlərin əmələ gəlməsinə səbəb olmaqdadırlar. Bu haqda “Gündəm Xəbər”in redaksiyasına ərizə ilə müraciət edən və Bakı şəhəri, Yasamal rayonu Şərifzadə küçəsi-1, Azərbaycan Texniki Universitetinin (əvvəlki Politexnik İnstitu) yataqxanası 5-ci korpus, 1-ci mərtəbə ev-110 ünvanında yaşayan, həmçinin Zəngilan rayonundan məcburi köçkün düşən, 2-ci qrup Qarabağ müharibəsi əlili, Prezident təqaüdçüsü Cəfərov Yusif Salman oğlu yazır ki, “25 mart 2017-ci il tarixdə, saat təqribən 21:00-da “FİOD DOBLA” markalı, dövlət nömrə nişanı 99-KN-159 olan nəqliyyat vasitəsinin sürücüsü Qurbanov İbrahim Tofiq oğlu sürət həddini aşaraq, Yasamal rayonu Şərifzadə küçəsi-1 ünvanında piyada keçidində saxlanmış və Orucov Şəhriyar Arif oğluna məxsus “MERSEDES BENZ” markalı, dövlət nömrə nişanı 90-FL-916 olan nəqliyyat vasitəsini arxadan vurmuşdur. O, eyni zamanda yolu təsadüfən keçən Zərdab rayon sakini, təqribən 23-24 yaş həddində olan Aydan adlı xanımı da vurmuş və ona ağır bədən xəsarəti yetirdiyindən, adı çəkilən xanımın bud çanaq-sümüyü sınmış və o, ağır kəllə-beyin travması da almışdır. Bütün bunlardan əlavə, İbrahim Qurbanov əlavə iki ədəd nəqliyyat vasitəsini də vurmuşdur. Onlardan biri mənə məxsus “MERSEDES BENZ” markalı, dövlət nömrə nişanı 99-FL-942 olan nəqliyyat vasitəsi, digəri isə Cəfərov Elçin Rasim oğluna məxsus “MERSEDES BENZ” markalı, dövlət nömrə nişanı 99-KR-942 olan nəqliyyat vasitəsidir. Yaşanan olay içərisində daha çox diqqəti cəlb edən hal oldur ki, yol-hərəkəti qaydalarını pozan, bir neçə nəqliyyat vasitəsini yarasız hala salan, hətta Aydan adlı xanımın bud çanaq-sümüyü sındıran İbrahim Qurbanov hadisə yerindən qaçsa da, ətrafda olan insanlar dərhal yaralı Aydanı təcili tibbi-yardımla Nəsimi rayonundakı Trovmatologiya Xəstəxanasına çatdırırlar. Adı çəkilən səhiyyə müəssisəsində Şahin adlı həkim Aydana ilk tibbi yardım göstərdiyi vaxtlarda, hadisə yerinə Yasamal RPİ-nin müstəntiqi Yanar adlı əməkdaş gəlir və o, toplanmış iş materiallarını səhəri gün adı çəkilən qurumun baş müstəntiqi, polis mayoru Seymur Hidayətzadəyə təhvil verir.
Faciə odur ki, Aydan 25 mart-28 aprel 2017-ci il tarixə kimi, yəni 34 gün ərzində Trovmatologiya Xəstəxanasında yatsa da, Yasamal RPİ-nin heç bir əməkdaşı baş verən hadisə ilə bağlı ondan hansısa izahatı almırlar və belə bir yolla da, baş verən olay müəyyən səbəblər üzündən istintaqdan gizlədilir. Əldə etdiyim məlumatlara görə çox keçmir ki, Aydanı müxtəlif yollarla aldadırlar və 34 gündən sonra onu xərəkdə Zərdab rayonunda yaşadıqları ünvana da göndərirlər. Bu gün də xəstə olduqca ağır durumdadır. Baş verən olaylara diqqət yetirməklə o qənaətə gəlmək olur ki, Travmotologiya Xəstəxanasının həkimi və Yasamal RPİ-nin müstəntiqi əlbir olduqlarından, baş verən cinayət işi hər iki şəxs tərəfindən ört-basdır edilir. Amma, hər iki şəxsi təqribən 23-24 yaş həddində olan Aydanın bugünkü durumu və gələcək taleyi heç cür düşündürmür. Baş verən cinayət hadisəsi hər iki şəxsin günahı ucbatından gizlədildiyindən, yarasız hala salınmış üç nəqliyyat vasitəsinin sahibi “NBASK”sığorta şirkətindən də, vurulmuş zərərə görə pulumuzu ala bilmirik. Bu da onu söyləməyə əsas verir ki, yol hərəkəti qaydalarını pozmaqla Aydanın bud-çanaq sümüyünü sındıran, onu yataq xəstəsi edən, eyni zamanda üç nəqliyyat vasitəsini yararsız hala salan İbrahim Qurbanovu hansısa “görünməz əllər” müdafiə edir ki, bu cür olaylar da yaşanmaqda davam edir. Onu da vurğulayım ki, baş verən hadisə ərazidəki TS-2-040 saylı nəzarət kamerası vasitəsi ilə qeydiyyata alınmış və araşdırılması Yasamal RPİ-nin müstəntiqi tərəfindən həyata keçirilmişdir. Amma, bütün bunların qarşılığında ortada aparılmış araşdırmanın nəticəsi yoxdur. Buna da səbəb, yuxarıda qeyd etdiyim kimi hər iki vəzifə sahibinin baş verən cinayət hadisəsini hansısa maraqları çərçivəsində ört-basdır etmələridir”.
Bəli, olub-keçənlərə diqqət yetirdikdə ortaya çoxsaylı məqamlar da çıxır. Əvvəla onu qeyd edək ki, şikayətçi Yusif Cəfərovun yazdıqlarında əsasən İbrahim Qurbanovun günahı ucbatından böyük bir cinayət hadisəsi baş verir. Amma, baş verən cinayət hadisəsi araşdırılmaq və cinayəti törədən şəxs cəzalandırılmaq əvəzinə, çox keçmir ki, onun əməlləri hansısa maraqlar çərçivəsində ört-basdır edilir. Belə bir halın varlığı da, nəinki qanunçuluğun keşiyində durmağa borclu olan polis əməkdaşlarına, həmçinin “Hippokrat Andı”na and içən həkimlərə qarşı həddən-ziyadə inamsızlıq hissinin formalaşmasına da səbəb olur. İnanırıq ki, 1994-cü ildən DİN vəzifəsini daşıyan cənab Ramil Usubov, baş verən olayın varlığını diqqətdə saxlayıb, təqribən 23-24 yaş həddində olan Aydanı yataq xəstəsi edən İbrahim Qurbanovun əməllərinin araşdırılması üçün, aidiyyəti üzrə müvafiq tapşırıqlarını verəcək. Qarşı tərəfin də mövqeyini dinləyə bilərik. Araşdırmamız davam edəcək.

Cəfər
gundemxeber.az