Ədalət Quliyev: “Həmin vaxtdan bir-iki il keçdikdən sonra mənzil problemim ilə maraqlandım, o halda “darıxma, adın siyahıdadır, sənə də mənzil veriləcək” deyə cavab verdilər”

Son illər bir çox vəzifə sahibləri tərəfindən şəhid ailələrinə, müharibə veteranlarına, əllilərə və digər imtiyazlı şəxslərə bəslənən ögey münasibətin varlığı, çoxsaylı sosial problemlərin əmələ gəlməsinə də səbəb olmaqdadır. Düzdür, bu səpkili problemləri “Gündəm Xəbər” olaraq bir neçə dəfə ictimailəşdirsək də, aidiyyəti qurumları baş verənlərlə bağlı dəfələrlə məlumatlandırsaq da, nədənsə imtiyazlı şəxslərlə bağlı problemlər lazımınca həll olunmur ki, olunmur. Son anda baş verənlər o olur ki, onlar problemlərinin həlli ilə bağlı aidiyyəti qurumlara silsilə müraciətlərini ünvanlayır, ayrı-ayrı media qurumlarında onların ictimailəşdirilməsinə də qərar verirlər. Bir neçə gün bundan əvvəl Tovuz rayonu, Qovlar şəhəri M.Ə.Sabir küçəsi ev-14 ünvanda yaşayan Quliyev Ədalət Məmməd oğlu tərəfindən “Gündəm Xəbər”ə ünvanlanan təkrar müraciət də, oxşar problemlərdəndir. Belə ki, bu şəxs ünvanladığı müraciətində yazır ki, “mən 1980-cı ildə Tovuz rayonunun Qovlar şəhərində anadan olmuşam və 1999-cu ildə könüllü həqiqi hərbi xidmətə getmişəm. Həmin ilin 4 oktyabr günü Füzuli rayonundakı “N” saylı hərbi hissədə xidməti borcumu yerinə yetirən zaman, qəflətən erməni tərəfi ilə şiddətli atışma başladı. Həmin atışmada cəmi 10 nəfər iştirak etsək də, çox keçmədi ki, səngərdə mənimlə birlikdə olan 3 nəfər döyüşçü yoldaşlarım, o cümlədən mən də qolumdan ağır yaralandım. Baş verən atışma zamanı səngərdə iki saat təkbaşına qalsam da, heç bir halda səngəri tərk etmədim. Həmin an mənə ilk kömək əlini uzadan və yaralı vəziyyətdə səngərdən çıxaran, əslən Yevlax şəhərindən olan Ruslan Orucov adlı əsgər yoldaşım oldu. Qolumdan ağır yaralandığımdan iki litr qan itirdim və dörd gün Füzuli rayonundakı hospitalda “narkoz” altında qaldım. Elə ki, vəziyyətim günü-gündən pisləşdi, o halda ləngimədən məni Bakı şəhərinə göndərdilər və üç dəfə cərrahiyyə əməliyyatı olundum. Bir müddət müalicə olunduqdan sonra isə, mənə TSEK-in qərarı ilə 2-ci qrup əlillik dərəcəsi verdilər. Təqribən on il bundan öncə Tovuz TSEK-da təkrar müayinədən keçən zaman, komissiyanın üzvü Çingiz həkim məndən 1500 manat rüşvət istəyib “sən bu məbləği çatdır, sənədlərini necə lazımsa yazaq ki, alacağın pensiya yüksək məbləğdə olsun” dedi. Onun belə bir tələbinin qarşılığında bildirdim ki, axı mən Vətən uğrunda sağlamlığımı itirmişəm, digərləri kimi qaçıb gizlənməmişəm,1500 manat rüşvəti niyə verməliyəm desəm də, Çingiz həkim israrından dönmədi. O, sənədlərimi elə düzüb-qoşdu ki, az məbləğdə pensiya almağa möhtac qaldım. Bu da onu söyləməyə əsas verir ki, Tovuz rayonunda dərəbəylik baş alıb getdiyindən, rüşvət amili rayonda, Qovlar şəhərində və digər ərazilərdə tüğyan etməkdədir. Hal-hazırda dövlətdən 120 manat pensiya alıram ki, bununla da dolanışığımı heç cür təmin edə bilmirəm. Bu gün mənə o məsələ qaranlıq qalır ki, digər şəxslər kimi, niyə mənə də Prezident təqaüdü verilmir? Vaxtilə baş nahiyəmdən “travma” aldığımdan, çox zaman özümü huşsuz vəziyyətdə hiss edirəm. Yaralandığımdan bir neçə dəfə cərrahiyyə əməliyyatı olundum və buna görə də mənə dörd dəfə “narkoz” verildi. Bu da həm gözlərimin zəifləməsinə, həm də nitqimin qüsurlu olmasına səbəb oldu. Bundan əlavə onu da bildirim ki, 2-ci qrup əlil olduğum vaxtdan 17 il ötüb. Buna baxmayaraq, İlqar Qurbanovun rəhbərlik etdiyi TSEK-də həkimlər beş ildənbir müayinədən keçməyimi tələb edirlər. Mən 17 ildir ki, əliləm və qanunun tələbinə görə 10 il ərzində komissiyadan keçən şəxsə, 10 ildən sonra ömürlük əlil statusu verilir. Təəssüflər olsun ki, bu gün qanunun belə bir tələbi mənə şamil olunmur.
Bundan əlavə onu da vurğulayım ki, 2-ci qrup əlil olduğumdan təqribən 17 il bundan əvvəl mənzil verilməsi məqsədilə Tovuz rayon İcra Hakimiyyətinin başçısı Tofiq Zeynalova rəsmi qaydada müraciət etmişdim. Düzdür, həmin vaxt məni ümumi siyahıya yazdılar və mənzil veriləcəyi vədini də bildirdilər. Həmin vaxtdan bir-iki il keçdikdən sonra bu məsələ ilə maraqlandım, o halda “darıxma, adın siyahıdadır, sənə də mənzil veriləcək” deyə cavab verdilər. Bir sözlə, nə vaxt bu məsələ ilə maraqlanıramsa, o zaman oxşar cavabı verirlər, bu gün də həmin cavabı təkrar etməkdədirlər. Bu günə kimi yaşayış evimin olmaması mənə çoxsaylı problemlər yaradıb ki, onlardan biri də ailəmin dağılması olub.
Onu da qeyd edim ki, 2-ci qrup əlil olduğumdan daim səhhətimdə ciddi problemlərim əmələ gəlir. Buna baxmayaraq ayrı-ayrı şəxslər tərəfindən mənə bəslənilən ögey münasibət, bu gün də davam etməkdədir. Belə ki, hələ bir neçə ay bundan əvvəl səhhətimdə ciddi problemlərim əmələ gəlmişdi və müalicə olunmağıma ehtiyac duyuldu. Həmin vaxt pulum olmadığından, “Beynəlxalq Bank”ın Tovuz rayon şöbəsindən 1000-1500 manat məbləğində kreditə pul götürmək istəsəm də, şöbənin 30 yaşında olan və adını dəqiqləşdirə bilmədiyim rəhbərliyi etdiyim müraciətimə məhəl qoymadı. Eyni zamanda şöbənin Emin və Elvin adlı əməkdaşları minbir bəhanə danışmaqla, mənə kreditə pul vermədilər. Amma şöbənin elə əməkdaşları da var ki, onlar 72 yaş həddinə çatmış şəxslərdən müəyyən məbləğdə “şirinlik” əldə etməklə onlara kreditə pul verirlər. Bu da hüquqi nöqteyi-nəzərdən yolverilməz haldır. Həmin vaxtlarda mənə “Beynəlxalq Bank”ın Tovuz rayon şöbəsindən kreditə pul verməsələr də, bir müddət bundan əvvəl həmin məbləğ krediti Nəsimi rayon şöbəsindən ala bildim. İndi sual edirəm ki, əgər mən və mənim kimi oğullar zamanında torpaqlarımızın bütövlüyü uğrunda vuruşmasaydıq, o halda “Beynəlxalq Bank”ın Tovuz rayon şöbəsində çalışan əməkdaşları “kreslo”larında rahat oturub pul qazana biləcəkdilərmi?
Bütün bunlardan əlavə, dolanışığımı müəyyən mənada yaxşılaşdırmaq məqsədilə yaşadığım Qovlar şəhəri üzrə icra nümayəndəsinə, qəsəbə bələdiyyəsinin rəhbərinə və digər vəzifə sahiblərinə mənə hər hansı kiçik bir köşkün verilməsi, yaxud da bir neçə kvm-lik torpaq sahəsinin ayrılması məqsədilə dəfələrlə müraciətlər etmişəm. Məqsədim həmin yerdə ticarətlə məşğul olmaq və yaşayışımı qismən yaxşılaşdırmaq idi. Çox təəssüf hissi qeyd edim ki, etdiyim müraciətlərimin hər biri bu günə kimi nəticəsiz qalıb. Ölkə rəhbəri cənab İlham Əliyevə, millət vəkili Qənirə xanım Paşayevaya və digər vəzifə sahiblərinə ünvanladığım müraciətlərimlə bağlı bir kimsə maraqlanmayıb. Baxmayaraq ki, adı çəkilən vəzifə sahiblərinə ünvanladığım müraciətlərimə verilən cavablarda “bu şəxsə köməklik edin” deyə cavablar verilsə də, bu günə kimi Tovuz RİH Aparatında rəsmi vəzifə sahibi olanlar, onlara ünvanlanmış cavablara sayğısızlıq etməkdə davam edirlər. Belə bir halın varlığı da, həm mənə, həm də mənim kimi imtiyaz sahibi olanlara bəslənilən ögey münasibətin, sayğısızlığın varlığıdır. Bu gün mən nə edəcəyimi bilmirəm. Çünki, Tovuz rayonundakı vəzifə sahibləri etdiyim müraciətlərimin hər birini qulaqardına vururlar, boş-boş vədlər verməkdən başqa hansısa addımlarını atmırlar.
Yəni, uzun illərdir ki, üz-üzə qaldığım mənzil problemim həll olunmur, pensiyam artırılmır, mənə də verilməli olan təqaüdüm verilmir və digər problemlərimin heç biri həll olunmur. 2-ci qrup əlil olsam da, bu gün Vətənimizin hər qarış torpağı uğrunda vuruşmağa və torpaqlarımızın bütövlüyü uğrunda şəhid olmağa belə hazıram”.
Belə bir açıqlama Quliyev Ədalət Məmməd oğluna məxsus olduğundan və adı çəkilən şəxs tərəfindən səsləndiyindən, hələlik nəsə deyə bilmərik. Deyəcəyimiz yalnız o olacaq ki, sağlamlığını torpaqlarımızın bütövlüyü uğrunda qurban verən və 2-ci qrup əlil olan bir şəxsə qarşı bəslənilən ögey münasibət, heç də bizlərə başucalığı gətirməz. İnanırıq ki, Tovuz RİH-nin başçısı başda olmaqla digər vəzifə sahiblərinin atacaqları ədalətli addımlar, yəqin ki, Ədalət Quliyevin, hətta neçə-neçə imtiyaz sahibi olan şəxslərin də problemlərinin həlli ilə nəticələnəcək.

Mövzu diqqətimizdədir.

Həsən
gundemxeber.az