Tezbazar 66 sahibkarın dükanı söküldü, bəs “Sumqayıt Mall" niyə tikilmir?

Xatırladaq ki, bu ilin may ayında Sumqayıt şəhərinin 9-cu mikrorayon ərazisində fəaliyyət göstərən “Şərq Bazarı”nda 66 sahibkarın obyekti tamamilə sökülür. Sumqayıt şəhər İcra Hakimiyyətindən vəd verirlər ki, “Şərq Bazarı”nın ərazisi qısa müddət ərzində abadlaşdırılacaq və ərazidə müasir tipli ticarət mərkəzi də tikiləcək. Adı çəkilən qurumdan rəsmən etiraf edirlər ki, “Şərq Bazarı”nın ərazisində çalışan 66 sahibkarın hər birinə məxsus dükanların qanuni mülkiyyət sənədləri var. Hər bir dükan söküldükdən sonra, yeni inşa olunacaq ticarət mərkəzində sahibkarlar təmənnasız olaraq 18kvm-lik yerlə təmin olunacaqlar. Həyata keçirilən söküntü nəticəsində xeyli məbləğdə maddi ziyana düşən sahibkarlar, hal-hazırda işsiz olmaqla bərabər, çətin duruma da düşüblər. Bu gün onlar ümidlərini ərazidə tikilməsi vəd olunan ticarət mərkəzinə dikiblər ki, gələcəkdə fəaliyyətlərini orada davam etdirə biləcəklər. Amma, Sumqayıt ŞİH-dən verilən vədlər hələ ki, vəd olaraq qalmaqdadır. Çünki, söküntünün başlamasından yeddi aydan çox vaxt keçməsinə baxmayaraq, bu gün də bazarın tikintisinə belə başlanılmayıb. Halbuki, icra hakimiyyənin səlahiyətliləri yeddi ay bundan öncə 66 dükanın sahibini tezbazar bazardan çıxarıb söküntüyə başladılar. Əlbəttə ki, abadlaşan şəhərə yamaq olan, başdan-ayağa antisanitariya mənbəyi hesab olunan, müasir standartlara cavab verməyən, sanki orta əsrləri xatırladan “Şərq Bazarı”nın Rəşid Babayevə aid olan hissələrinin, yəni yol kənarındakı cırıq çadırlı, üfunətli meyvə-tərəvəz bazarının və alış-veriş aparılan hissəsinin sökülməsi, sanki bütün sumqayıtlıların ürəyincə oldu. Amma, ortada “qurunun oduna yaş da yandı”. Belə ki, abadlaşma bəhanəsi ilə sənədləri tam qaydasında olan 66 sahibkara məxsus dükanlar da söküldü. Onu da xatırladaq ki, adı çəkilən bazarın bazarkomu ilə 66 sahibkar arasında baş verən mübahisə, 2011-ci ildən söküntü aparılan vaxta kimi davam etmişdi. Bütün məhkəmə instansiyalarında sahibkarların qalib gəlməsinə baxmayaraq, sənədləri qaydasında olmayan Rəşid Babayev, həmin vaxta kimi hər vəchlə sənədləri qaydasında olan 66 sahibkara məxsus dükanları sökdürmək istəyirdi.

Bu gün bütün ərazi yeni ticarət mərkəzinin tikilməsi üçün tam şəkildə təmizlənsə də, təkcə Rəşid Babayevə məxsus ərazi təmizlənməyib. Onu da vurğulayaq ki, Rəşid Babayev hər vəchlə söküntüyə mane olduğundan, o, bu gün də icra başçısı Zakir Fərəcova qarşı dirəniş göstərməkdə davam edir. Tikintinin ləngiməsinə bir səbəb də, Rəşid Babayevə məxsus inzibati binanın sökülməməsi bildirilir. Belə ki, keçmiş bazarkoma məxsus binanın biri demontaj olunub sökülsə də, "mehmanxana" məqsədilə istifadə olunan binanın söküntüsü isə dayanıb. Düzdür, bu şəxsin söküntünü tam dayandırmaq üçün məhkəməyə müraciət etdiyi də bildirilir. Əgər məhkəməyə müraciət etmək söküntünün dayandırılmasına səbəb olsaydı, o halda 66 sahibkarın dükanına heç cür yaxın durmaq olmazdı. Çünki, qanunun tələbinə görə dükanların söküntüsü üçün ortada məhkəmə qərarları olmalı idi. Amma, sahibkarlara məxsus dükanların söküntüsü həyata keçirilsə də, ortada hər hansı məhkəmə qərarı olmayıb. Belə bir səbəbdən də sual olunur ki, icra başçısının bu binanı sökməyə gücü çatmırdısa, o halda niyə 66 sahibkarın sənədli-sübutlu dükanlarını teztələsik sökdürdü. Əgər ərazi şəhərin ümumi gözəlliyinə xələl gətirirdisə, indi zir-zibil içində olan və sanki xarabazarlığı xatırladan ərazi yenə də xələl gətirməkdədir. Bəs onda bunun nə fərqi oldu?! Əgər yeni bazar tikilməyəcəkdisə, niyə 66 dükan söküldü və sahibkarlara xeyli məbləğdə ziyan vuruldu?!

Deməli Əmlak Komitəsi tərəfindən 66 sahibkara verilmiş mülkiyyət sənədlərinin varlığına baxmayaraq, (ölkə qanunlarına görə mülkiyyət hüququ müəyyən hallar istisna olmaqla toxunulmazdır) onlara məxsus dükanları Sumqayıt şəhər İcra Hakimiyyəti heç bir məhkəmə qərarı olmadan, heç bir kompensasiya ödəmədən sökməyə gücü çatır, amma deyilənlərə görə içki həvəskarı olan Rəşid Babayevə gücü çatmır. Deyilənlərə görə bu şəxs binasının sökülməməsi üçün, müəyyən şəxslərin köməyi ilə hətta RF-nın prezidenti Putinə, Dağıstanın keçmiş başçısı Ramazan Abdulatipova, Rusiyadakı ləzgi cəmiyyətlərindən birinə də müraciət edir. Belə bir müraciətlərdən sonra Rəşid Babayevə məxsus binanın söküntüsü tam dayandırılır. Digər tərəfdən ona lazım olan dəstəyin Dövlət Sərhəd Xidmətinin rəisi Elçin Quliyevin qardaşı, Sumqayıt şəhər icra hakimiyyəti başçısının müavini Akif Quliyev tərəfindən verildiyi də iddia olunur. Bu şəxsin Akif Quliyevə arxalanaraq müəyyən mənada icra hakimiyyətinə qalib gəldiyi də bildirilir.

Bir müddət bundan əvvəl internet kanalların birinə müsahibə verən Rəşid Babayev, məhz ölkə rəhbəri cənab İlham Əliyevdən imdad istəyirdi ki, icra başçısı Zakir Fərəcovun əməllərinə son qoya bilsin. 66 sahibkar da Rəşid Babayevin belə bir açıqlamasını təkzib etmişdilər. Keçmiş bazarkom ətrafında olan bir neçə şəxslə (katibəsi, baldızı, gecə gözətçisi, pulyığanı Ərəbxanla və başqaları ilə) Prezident Administrasiyasına şikayətə gedərək, sahibkarların adından sui-istifadə etdiyinə görə, sahibkarlar internet kanalı vasitəsilə onun fikirlərini təkzib edirlər. Deyilənlərdən belə başa düşmək olur ki, deyəsən vətəndaşı olduğu, yaşadığı ölkənin məhkəmlərinin qərarlarını tanımaq istəməyən Rəşid Babayev, indi də kömək məqsədilə başqa ölkəyə müraciət edir, oradakı havadarlarına ümid bəsləyir. Verilən məlumatlarda o da bildirilir ki, sökülmüş ərazidə inşa olunacaq "Sumqayıt Mall" icra başçısına yaxın sahibkarlardan biri tərəfindən tikiləcək. Araşdırmamız davam edəcək.

“Gündəm Xəbər”