Moskva aeroportundakı basqının detalları bəlli oldu

Moskvada dünən səhər törədilmiş səs-küylü soyğunçuluq hadisəsinin yeni təfərrüatları məlum olub. Rusiya mənbələri xəbər verir ki, hüquq-mühafizə orqanlarındakı mənbə “Şeremetyevo-2” aeroportunda milyonlarla dollar nağd pulu oğurlanan şəxsin Azərbaycan vətəndaşı olduğunu açıqlayıb. Xəbər verdiyimiz kimi, hadisə mayın 5-də Moskva vaxtı ilə səhər saat 8 radələrində baş verib. OMON formasında olan və avtomatla silahlanmış bir qrup maskalı şəxs aeroportun E terminalının çıxışında Şimali Qafqaz sakininə hücum edərək onun əllərini qandallayıb. Daha sonra həmin şəxsin daşıdığı çemodanları götürərək yaxınlıqda onları gözləyən mikroavtobusla aradan çıxıblar.
Çemodanlarda 4 milyon dollar nağd pul olduğu bildirilirdi. Basqına məruz qalan şəxsin kimliyi açıqlanmırdı. Bu gün isə hüquq-mühafizə orqanlarındakı mənbə soyğun hadisəsinin bəzi detallarını açıqlayıb. Mənbə bildirib ki, milyonlarla dollar nağd pulu daşıyan şəxs Moskvadakı özəl mühafizə şirkətlərindən birinin əməkdaşı olub. OMON formasında olan silahlılar onun daşıdığı 3 milyon 300 min dollar nağd pulu, habelə üstündəki tapançanı götürərək aradan çıxıblar. Mənbənin bildirdiyinə görə, mayın 5-də saat 08:50-də OMON-çuların formasında olan, avtomatla silahlanmış 7 maskalı şəxs “Şeremetyevo-2” aeroportunun E terminalının qarşısında özəl inkassator formasının və özəl mühafizə şirkətinin əməkdaşlarına basqın ediblər.
“Basqınçılar bu iki şəxsi avtomatlarla hədələyərək döyüblər, əllərinə plastik qandallar keçiriblər və patronları olmayan xidməti “İJ-71” tapançasını, nağd dollarla dolu iki çemodanı götürərək “Kadillak” markalı avtomobillə hadisə yerindən qaçıblar. Müəyyən olunub ki, özəl mühafizə şirkətinin və özəl inkassator firmasının əməkdaşları pulları hücumdan cəmi bir neçə saniyə əvvəl Dubaydan uçan səhər reysi ilə aeroporta gələn Azərbaycan vətəndaşından alıblar”, - deyə mənbə bildirib. Soyğunçuları tapmaq üçün Moskvada və Moskvaətrafı vilayətdə başladılan əməliyyat nəticə verməyib. Hadisə ilə bağlı cinayət işi qaldırılıb.
Xəbərdə bildirilir ki, soyğunçuların Azərbaycan vətəndaşından apardığı pullar Rusiya Mərkəzi Bankının indiki kursu ilə 118 milyon 240 min rubl edir. Xatırladaq ki, anoloji hadisə ötən ilin sentyabrında Sankt-Peterburqun “Pulkovo” aeroportunda da baş vermişdi. Eyni ssenari ilə hərəkət edən, OMON forması geymiş silahlı maskalılar aeroportun çıxışında Türkiyədən gələn Azərbaycan vətəndaşına basqın edərək onun daşıdığı 2 milyon dollar nağd pulu götürmüş və aradan çıxmışdılar.
Bu hadisədən çox keçmədən eyni soyğunçuluq hadisəsi Moskvada baş vermişdi. 2013-cü ilin noyabrında İstanbuldan Moskvaya uçan Azərbaycan vətəndaşı Zaur Qədimov “Şeremetyevo” aeroportunun qarşısında basqına məruz qalmış və onun daşıdığı 2,7 milyon dollar nağd pul qəsb edilmişdi. OMON forması geyimiş 10 nəfər maskalı şəxs əvvəlcə aeroportun qarşısında Z.Qədimovu gözləyən özəl mühafizə xidməti əməkdaşlarının əllərini qandallamış və onları mikroavtobusa mindirərək aeroportdan kənarlaşdırmışdılar. Silahlıların bir neçəsi mühafizəçiləri nəzarətdə saxlamış, qalanları isə aeroportun D terminalının qarşısında Z.Qədimovun çıxmasını gözləmişdilər. Azərbaycan vətəndaşı milyonlarla dollar nağd pulla terminaldan çıxan kimi silahlılar ona hücum etmiş, Z.Qədimovu yerə uzadan və başına silah dirəyən maskalılar onun pulla dolu çemodanını götürmüşdülər. Daha sonra Qədimovu mikroavtobusa mindirərək aeroportun ərazisindən çıxarmış və yola atmışdılar. Heç bir halda bu soyğunçuluq hadisələrinin üstü açılmayıb. Eyni zamanda Dubaydan və Türkiyədən milyonlarla dollar nağd pulu Rusiyaya daşıyan azərbaycanlıların hansı qruplaşmalara bağlı olduğu qaranlıq qalır.
ZAUR