“Total” və “Statoil” şirkətləri kəmərdə pay almaqda tərəddüd edir; 10 milyard dolları kimin yatıracağı hələ məlum deyil; ARDNŞ Türkiyəyə payını artırmağı təklif edib

Azərbaycanla Türkiyə arasında yeni nəhəng enerji layihəsi olan TANAP ətrafında yaranmış qeyri-müəyyənlik davam edir.

Virtualaz.org saytı Türkiyə qaynaqlarına istinadən xəbər verir ki, Fransanın “Total” və Norveçin “Statoil” şirkətləri “Şahdəniz” qazını Türkiyəyə nəql edəcək bu kəmərdə pay almaq, beləliklə də kəmərin investorlarına və səhmdarlarına çevrilmək barədə qərar verməyə tərəddüd edir. Nəticədə Azərbaycan tərəfi kəmərdəki payının bir hissəsini Türkiyəyə təklif edib.



Azərbaycan qazını Avropaya daşıyacaq kəmərin Türkiyəyə qədər olan hissəsini təmin edəcək TANAP kəmərində Ankaranın daha artıq paya sahib olması üçün danışıqlar gedir.

Fətullah Gülən təriqətinə bağlı “Yeni Şafak” qəzetinin yazdığına görə, əgər danışıqlar nəticə versə, Türkiyə TANAP-ın davamı olan Transadriatik Qaz Kəmərində (TAP) də müəyyən paya sahib olacaq. Qəzetin bildirdiyinə görə, “Röyter” agentliyinə açıqlama verən mənbə deyib ki, Türkiyə TANAP-dakı payını artırmaqla yanaşı TAP-da da pay sahibi ola bilər.

“Lakin Türkiyənin payının artması əlavə öhdəliklər də gətirəcək. Ona görə də qərar verməzdən əvvəl bu öhdəliklər nəzərdən keçiriləcək” - deyə mənbə "Yeni Şafak"a bildirib.



Digər mənbə isə deyib ki, Azərbaycan Dövlət Neft Şirkəti (ARDNŞ/SOCAR) “Total” və “Statoil” şirkətlərinin TANAP-da gözləniləndən az pay alması, yaxud ümumiyyətlə almaması halında Türkiyənin hazırda malik olduğu 20 faizlik payı artıra biləcəyini bu ölkənin Enerji Nazirliyinə rəsmən çatdırıb.

Mənbənin bildirdiyinə görə, layihə ilə bağlı investisiya qərarının tez bir zamanda verilməsi lazımdır. Əks halda “Şahdəniz” yatağının 2-ci fazasında hasilat işlərinin başlaması və beləliklə də Azərbaycan qazının Türkiyə üzərindən Avropaya nəqli də gecikmiş olacaq.

Qeyd edək ki, TANAP kəmərinin çəkilməsi üçün 8-10 milyard dollarlıq investisiya tələb olunur. Kəmərə dair müqavilə bağlananda TANAP-da 80 faizlik pay Azərbaycan tərəfinin üzərində qalıb. SOCAR bu payın bir hissəsini - 29 faizini “Şahdəniz” konsorsiumunun iştirakçıları olan BP, “Total” və “Statoil” şirkətlərinə təklif etmişdi.

Təklifə görə, BP kəmərdə 12, “Statoil” 12, “Total” isə 5 faiz pay ala bilərdi. Lakin indiyədək ancaq BP kəmərdə pay sahibi olmağa rəsmən razılaşıb və müvafiq müqavilə bağlanıb. Əgər “Total” və “Statoil” kəmərdə təklif olunan payı almaqdan imtina etsələr, o zaman onların da payını BP ala bilər.