Etibar Hüseynov köçkünlərdən üzr istədi

Milli Məclis Azərbaycanda insan alverinə qarşı mübarizəni müzakirə edib

Milli Məclisin yaz sessiyasının növbəti iclası keçirilib. Cari məsələləri müzakirəsi zamanı Etibar Hüseynov çıxış edib.
Etibar Hüseynov üzr istəyib
Deputat deyib ki, sosial mediada təxribatla üz-üzə qalıb: “Neçə gündür ki, mənim çıxışım konteksdən çıxarılaraq yayılır, insanları qıcıqlandırırlar. Mən üç gündür ki, mətbuata və TV-lərə müsahibə vermirəm. Amma buna baxmayaraq, yenə də adımdan açıqlamalar verilir. Guya mən deyirəm ki, qarabağlılar Suriyada müharibə də iştirakı öyrənsinlər. Mən elan edirəm ki, çıxışım zamanı heç bir təhqirim olmayıb. Yeganə etiraf edirəm ki, bir qədər ehtiyatlı olmalıydım. Mən əgər kiminsə qəlbinə dəymişəmsə üzr istəyirəm. Hesab edirəm ki, bu böyüklük əlamətidir. Eləcə də istintaq bitməyənə qədər bu haqda açıqlama verməyəcəyəm”.
Spiker Oqtay Əsədov: “Yaxşı ki, siz daha çox danışmırsınız. Mən dünən intizam komissiyasının sədri ilə birgə Etibar Hüseynovu qəbul etdim, o səhvini etiraf etdi. Millət vəkillərindən xahiş edirəm ki, bu məsələni şişirtməsinlər”.
İsmayıllı məhbuslarına ağır cəza verilib
Ümid Partiyasının sədri, deputat İqbal Ağazadə isə İsmayıllı hadisələrinə görə, həbs edilən şəxslərə ağır cəza verilməsini deyib və bu məsələnin qanun çərçivəsində həllinə çağırıb.
Ağazadə həmçinin bələdiyyələrin statusunun artırılmasını təklif edib və bu haqda təkliflər hazırladığını elan edib.

Minə yaxın QHT hesabat verə bilməyib

Deputat Azay Quliyev Milli Məcclisdə çıxışı zamanı BMT-də Azərbaycanın Ukraynanın ərazi bütövlüyünə səs verməsindən danışıb: “Bu Azərbaycanın milli maraqlarımızı üstün tutması, siyasi konyukturadan kənar addım atmasını göstərir. Azərbaycan beynəlxalq hüquqa əməl edib. İstər Kosova, istərsə də Gürcüstan məsələsində bu mövqeyini ifadə edib”.
Quliyev daha sonra deyib ki, deputatlar beynəlxalq münasibətlərdə mühüm rol oynayır: “Əlbəttə bu Xarici İşlər Nazirliyi ilə məsləhətləşdirilir. Mən hesab edirəm ki, işçi qrupu səviyyəsinə nazirliklə məsləhətləşmələr aparılmalıdır. Heç olmasa ildə bir dəfə bu həyata keçirilməlidir”.
Deputat minə yaxın QHT-nin hesabat vermədiyini və buna görə cərimə ödəyəcəyini bildirərək: “Üç həftə vaxtımız var, mən QHT-lərdən xahiş edirəm ki, Maliyyə Nazirliyinə hesabatlarını versinlər”.
Deputat Qənirə Paşayeva isə cəbhədə intensiv atışmalar haqda danışıb və beynəlxalq qurumları tənqid edib.

Boş qalan 3 deputat yerinə seçkilər keçirilməlidir

Ədalət Partiyasının sədri, deputat İlyas İsmayılov isə çıxışı zamanı Milli Məclisdə boş qalan deputat yerlərinə seçkilərin keçirilməsi məsələsini qaldırıb. Deyib ki, 116 saylı Zaqatala seçki dairəsindən seçilən Hikmət Atayev vəfat edib: “Eləcə də Gülər Əhmədova məlum hadisələrdən sonra mandatdan imtina edib. Həmçinin Əli Əhmədovun baş nazirin müavini təyin olunması səbəbindən deputat mandatından imtina edib. Hesab edirəm ki, vətəndaşların seçmək və seçilmək hüququ təmin olunmalı və bu dairələrdən təkrar seçkilər keçirilməlidir.

Ağamalı Jirinovskiyə qarşı

Milli Məclisin deputatı Fəzail Ağamalı isə Vladimir Jirinoviskinin Azərbaycana və azərbaycanlılara qarşı iddiaları barədə danışıb. Bildirib ki, bunun bir cavabı verilməlidir.
Spiker Oqtay Əsədov isə bildirib ki, Jirinoviskinin dedikləri cavabsız qalmayıb: “Milli Məclisin birinci sədri ona tutarlı cavab verdi və bundan sonra onun səsi çıxmır. Bu məsələni Milli Məclisə çıxartmağa ehtiyac yoxdur. Bir adam ki, əslini danır, ona baş qoşmaq mənasızdır”.

Krım hadisələrindən sonra Azərbaycan üçün vəziyyət çəitndir

“Krım hadisələrindən sonra Azərbaycan üçün olduqca ciddi vəziyyət yaranıb. Təklif edirəm ki, hakim partiya bir memoroundum irəli sürməli və bütün siyasi partiyalar buna qoşulmalıdır. Ölkənin təhlükəsizliyi məsələsində bir araya gəlməliyik”. Bu təkliflə deputat Fazil Mustafa çıxış edib. Deputat daha sonra dərsliklərin pulsuz alınması məsələsini qaldırıb. Bildirib ki, dərsliklər pulsuz paylanmalı olduğu halda bu gün pul verib dərslik alan valideynlər var.

YAP milli məsələlərdə bütün siyasi qüvvələrlə bir araya gəlməyə hazırdır

YAP icra katibinin müavini, deputat Siyavuş Novruzov isə deyib ki, hakim partiya ümummili məsələlərdə bütün siyasi partiyalarla bir araya gəlməyə həmişə hazırdır: “Amma təəssüflər olsun ki, bəzi siyasi partiyalar bu məsələdə heç də konstruiktiv mövqe tutmur. Elə partiyalar var ki, Azərbaycanın MDB-dən çıxmasını istəyirlər. Eləsi də var ki, komanda yaradıb Krıma döyüşməyə gedir. Bu qəbul olunmazdır və belə siyasi partiyalarla nəyi müzakirə edə biləcəyimiz sual altındadır”.
S. Novruzov bələdiyələrlə bağlı qaldıran məsələyə də münasibət bildirib. Deyib ki, bələdiyyə seçkilərini təkimlləşdirməkdən öncə bələdiyyələrin səlahiyyətlərinin artırılması və digər məsələlərə diqqət yetirmək lazımdır.

Biz Türkiyənin daxili siyasətinə qarışmırıq

Deputat Zahid Oruc isə Türkiyədə son bələdiyyə seçkilərinin ölkə daxili məsələ olmadığını deyib: “Bu bir sıra hallarda Ərdoğana etimad referendum hesab olunurdu. Ərdoğanın hakimiyyəti dönəmində 8-ci dəfə xalqdan dəstək alması Türkiyənin uğurudur. Biz Türkiyənin daxili işlərinə qarışmırıq. Amma bu illər ərzində İlham Əliyevin və sayın Ərdoğanın hesabına münasibətlər bir qədər də irəli gedib. Sayın Ərdoğanın Azərbaycana səfəri mühüm dövrə təsadüf edir. Türkiyə Azərbaycanın təhlükəsizlik məsələsində vacib rol oynayır. Azərbaycan da Türkiyənin düşmənləri ilə düşməndir. Hesab edirəm ki, tərəflər münasibətlərini hərbi müttəfiqlik sazişi ilə başa çatdıra bilər”.
Spiker Oqtay Əsədov: “Zahid müəllim yaxşı danışdınız. Bir şeydə səhv buraxdınız. Əlbəttə, biz müsəlman ölkəsiyik. Amma biz həm də dünyəvi dövlətik”.

Milli Məclis insan alverinə qarşı mübarizəni müzakirə edib

İclasda İnsan alverinə qarşı mübarizə üzrə Milli Koordinatorun illik hesabatı dinlənilib. Daxili işlər nazirinin müavini, Milli Koordinator Vilayət Eyvazov bildirib ki, 2004-cü ildə qəbul olunan Milli Fəaliyyət Proqramına uyğun olaraq xüsusi polis qurumu yardılıb, bir sıra işlər həyata keçirilib, beynəlxalq əlaqələr yaradılıb: “Ölkəmiz Avropa Şurasının konvensiyasına qoşulub, iki qanun qəbul edilib, prezident tərəfindən 4 sərəncam imzalanıb. Eləcə də insan alveri qurbanlarına verilən konpensasiya 10 dəfə artırılaraq 400 manata çatdırılıb. Bildirim ki, uşaqlar üçün hər bir avadanlıqla təhciz olunan sığınacaq yaradılıb. Bu müddətdə 30 QHT-yə QHT-lərə Dövlət Dəstəyi Şurası tərəfindən maliyyə ayrılıb”.

5 cinayətkar dəstə zərərsizləşdirilib

Nazir müavini deyib ki, ötən il Azərbaycanda insan alveri ilə məşğul olan 12 nəfərdən ibarət 5 cinayətkar qrup zərərsizləşdirilib: “Həyata keçirilən əməliyyat-axtarış tədbirləri nəticəsində ötən il 80 insan alveri və 4 cinayət işi üzrə 4 məcburi əmək cinayət faktı qeydə alınıb, insan alveri qurbanı olan 56 şəxs müəyyən edilib. Qurbanlardan 37 nəfəri sığınacaqlarda yerləşdirilib. Azərbaycanda son 10 il ərzində insan alverinə qarşı kompleks mübarizənin hüquqi müstəvidə aparılmasına dövlət, hökumət və parlament səviyyəsində xüsusi diqqət yetirilib. İnsan alveri cinayətində təqsirləndirilərək axtarışa elan olunmuş 17 şəxsdən 5-i tutularaq istintaq və məhkəmə orqanlarına təqdim edilib. Müəyyən olunmuş 56 qurbandan (41-i qadın, 15-i kişi) 19-u Türkiyəyə, 16-sı Birləşmiş Ərəb Əmirliklərinə, 15-i Rusiya Federasiyasına və 1-i İran İslam Respublikasına aparılıb, 5 qurban isə ölkə daxilində istismara məruz qalıb. Qurbanlardan 37-si sığınacağa yerləşdirilib və hər birinə zəruri yardımlar edilib. O cümlədən, 22-si işlə təmin edilib, 21-i peşə kursuna göndərilib, 50 qurbana birdəfəlik müavinət verilib, 13-nə Kömək Fondu maddi yardım ayırıb. Həyata keçirilmiş profilaktik tədbirlərlə 12 qurban ailəsinə qayıdıb, dövlət vəsaiti hesabına 3 nəfərin cərrahi əməliyyata, 1 nəfərin müalicəyə olan ehtiyacı, habelə 3 əcnəbi qurbanın ölkə ərazisində qanuni yaşamaq hüququ təmin edilib. İbtidai istintaq və məhkəmə prosesi dövründə isə hər bir zərərçəkənə müdafiəçi ayrılıb. Sığınacaqda yerləşdirilmiş insan alveri qurbanlarının himayəsində olan 23 azyaşlı uşaq “Azərbaycan Uşaqlar Birliyi” İctimai Təşkilatının xətti ilə məktəbdənkənar təhsil, məntiqi təfəkkür, səhiyyə və peşə proqramlarında istiqamətləndirilib. Baxımsız qalmış və risk qrupuna aid olan 52 nəfərə şəxsiyyət vəsiqəsi və doğum haqqında şəhadətnamə alınmasında köməklik göstərilib. İnsan alveri cinayətlərinin profilaktikası çərçivəsində ictimai mənəviyyat əleyhinə olan 170 cinayət faktı da aşkarlanaraq 118 nəfər məsuliyyətə cəlb edilib. İnsan alveri, əxlaqsızlıq yuvaları saxlama, xarici ölkələrdə işə və təhsilə düzəltmə halları, əcnəbilərlə nikahdan ortaya çıxan və s. məsələlər ilə əlaqədar “Qaynar Xətt” telefon xidmətinə daxil olmuş 14 minə yaxın müraciət araşdırılıb və hər biri üzrə qanunla müəyyən edilmiş qaydada zəruri ölçülər götürülüb”.

580 insan alveri və məcburi əmək faktı aşkarlanıb

Milli Koordinator əlavə edib ki, bu müddət ərzində hüquq-mühafizə orqanları ilə sıx qarşılıqlı əlaqədə həyata keçirilən istintaq hərəkətləri və əməliyyat-axtarış tədbirləri ilə 580 insan alveri və məcburi əmək faktı aşkarlanaraq 385 nəfər cinayət məsuliyyətinə cəlb edilib, 5 mütəşəkkil dəstə, 152 cinayətkar qrup zərərsizləşdirilib: “İnsan alverinin qurbanı olan 529 şəxs cəmiyyətə reinteqrasiya olunub. Ötən il icrası başa çatan ikinci Milli Fəaliyyət Planının əhatə etdiyi 2009-2013-cü illərdə insan alverinin doğurduğu təhlükələr barədə ictimaiyyətin məlumatlandırılması prioritet vəzifələrdən olmaqla bu işdə vətəndaş cəmiyyəti nümayəndələrinin və KİV-in imkanlarından istifadə edilərək respublikanın bütün şəhər və rayonlarında ümumilikdə 274 mədəni-kütləvi tədbir, o cümlədən çoxsaylı treninq və seminarlar keçirilib. Profilaktik iş həm də respublikanın 78 məktəbini, litseyini, kollec və uşaq evlərini əhatə edib. İkinci Fəaliyyət Planının icrası dövründə qeydə alınmış 400 insan alveri və məcburi əmək cinayəti üzrə 176 şəxs cinayət məsuliyyətinə cəlb edilib. Müəyyən edilmiş 263 qurbandan 173-ü təhlükəsiz sığınacağa yerləşdirilib. Reinteqrasiya dövründə 232 qurbana birdəfəlik müavinət, 133 nəfərə Kömək Fondundan yardımlar verilib. Həmçinin 48 nəfər işlə təmin edilib, 90 nəfər peşə kurslarına cəlb olunub, bir çox Əmək və Əhalinin Sosial Müdafiəsi Nazirliyi yanında Yardım Mərkəzlərinə istiqamətləndirilib. Səhiyyə Nazirliyi tərəfindən 155 insan alveri qurbanına və 579 potensial qurbana tibbi yardımlar göstərilib və bu məqsədlər üçün ayrılmış 5 tibb müəssisəsi zəruri avadanlıqlarla təchiz edilib.

Hər il 27 milyon şəxs insan alverinin qurbanı olur

Beynəlxalq ekspertlərinin hesabladığına götə, hər il 27 milyon şəxs insan alverinin qurbanı olur. Cənab prezident insan alverinə qarşı mübarizənin səmərəli həyata keçirilməsi üçün tapşırıqlar verir. Artıq üçüncü Fəaliyyət Proqramı hazırlanır. Cari ildə qarşımızda duran məsələlər bu istiqamətdə mübarizənin daha effektiv aparılması, beynəlxalq və QHT-lərin dəstəyindən istifadə etməkdir. Milli Koordinator çıxışının sonunda deputatlara və mətbuat nümayəndələrinə onlara verdiyi dəstəyə görə, təşəkkürünü ifadə edib.

Müzakirəsiz hesabat qəbul olunsun

Daha sonra hesabatın müzakirəsinə başlanılıb. Deputat Çingiz Qənizadə gözlənildiyi kimi təklif edib ki, hesabat müzakirəyə qoyulmadan qəbul edilsin. O, əsas kimi bu istiqamətdə geniş məlumatın olduğunu deyib.
Elmira Axundovadan: “Niyə nəqliyyatda və iaşə obyektlərində monitorinq keçirmirsiniz?”
Deputat Elmira Axundova isə deyib ki, əgər kimsə müzakirəyə qoşulmaq istəmirsə, bura gəlməsin, öz işləri ilə məşğul olsun. “Biz məruzəni dinlədik. Mən də onu qənaətbəxş hesab edirəm. Amma bəzi məsələləri Vilayət müəllimin nəzərinə çatdıraq. Bir sualım var: bu uşaqların və yeniyetmələrin məcburi əməyə cəlb edilməsi ilə bağlıdır. Demisiniz ki, sizin əməkdaşlarınız 45 monitorinq həyata keçirib. Amma nədənsə ictimai nəqliyyatda və məişət obyektlərində belə reydlərin keçirilməsi haqda bir informasiya yoxdur. Ötən dəfə bu məsələlə parlamentdə qaldırılıb. Mən bilmək istəyirəm ki, bu sahədə niyə reydlər keçirilmir? Avto servislərdə, restoranlarda, şadlıq saraylarında bu problem qalır. Bu restoranlar və şadlıq evləri nüfuzlu şəxslərə məxsusdur və QHT nümayəndələri ora buraxılmır. Amma avtoritetə baxmayaraq, bu məsələ yoluna qoyulmalıdır. Mən hələ hər gün avtomobillərin qabağına atılan yeniyetmələri qeyd etmirəm. Yaxşı olardı ki, biz bu haqda açıq və prinsipial danışaq. Mən Vilayət müəllimdən xahiş edirəm ki, bu məsələləri nəzərə alsın”.

“Flippindən bura dayələr dəvət edirlər”

VHP sədri, deputat Sabir Rüstəmxanlı hesabatı dəstəkləyib. Deyib ki, Koordinator QHT-lərlə, media ilə uğurlu iş birliyi yarada bilib: “Məni narahat edən bir məsələ var. Necə olur Azərbaycanda imkanlı ailələr öz uşaqlarının tərbiyəsi üçün Flippindən bura şəxsləri dəvət edirlər. Məgər Azərbaycanda işsiz qadınlar tapmaq mümkün deyilmi? Məncə, bu istiqamətdə də mübarizə gücləndirilməlidir”.
Samir