İcra Hakimiyyətinin başçısı Əhəd Abıyev rayonu dəhşətli duruma salıb

Azərbaycan bu gün məmurlar arasında bölgə-bölgə, mahal-mahal parçalanaraq amansızcasına talanır, qarət olunur. Rayonlarda məmur özbaşınalıqları kuliminasiya nöqtəsinə çatıb. İcra hakimiyyəti başçıları özlərini rəhbərlik etdikləri rayonların sahib-ixtiyarı kimi apararaq demək olar ki, bütün sahələrdə nəzarəti tamamilə ələ alaraq şəxsi monopoliyalarını yaradıblar. Sosial-iqtisadi problemlər baş alıb getsə də, rayon rəhbərləri bunlara biganəlik göstərir, öz maraqlarını təmin etməkdən qeyri iş prinsipi bilmirlər.
“Azərbaycanın Uralı” adlandırılan Daşkəsən rayonu da rəhbərlərin yarıtmaz fəaliyyəti nəticəsində öz əvvəlki şan-şöhrətini itirib. Daşkəsənin problemlərinin həlli daşa dirənib. Rayona rəhbərlik edən Əhəd Abıyev burada elə bir vəziyyət yaradıb ki, bunun misalı nə indiyə qədər olmayıb, nə də Allah etməmiş bundan sonra olmasın. Xatırladaq ki, Milli Məclisin sabiq deputatı Əhəd Abıyev Azərbaycan Respublikası prezidentinin 23 fevral 2011-ci il tarixli sərəncamı ilə Daşkəsən rayon İcra Hakimiyyətinin başçısı təyin olunub.
Daşkəsənin bu gün addımbaşı reklam olunan sürətli inkişafdan xəbəri yoxdur. Rayon adi məişət problemləri içərisində batıb. Rayonda qaz, işıq, su, yol problemləri gündəlik yaşam tərzidir. Rayondaxili yollarda hərəkət etmək mümkünsüz vəziyyətdədir. Bayan, Çovdar, Qaraqullar, Qabaqtəpə kəndlərinə gedib çıxmaq böyük igidlik tələb edir. Kənd sakinləri evdən çıxanda sağ-salamat geriyə dönmək üçün Allaha yalvarırlar. Çünki, bu yollar hər gün ölüm saçır. Amma, statistikaya nəzər salsaq məlum olar ki, Daşkəsənin yolları dünyanın ən modern yollarından da üstündür. Əhəd Abıyevin sevimli sahələrindən olan yol çəkilişi icra başçısına bir xeyli “xeyir” gətirib. Daşkəsən şəhər İcra Nümayəndəliyi şəhərdaxili yolların təmir işlərini həyata keçirmək üçün 369 min manat pul ayırıb.”Gəncə Körpü-Tikinti-2” ASC tərəfindən həyata keçirilən işlər isə yalnız kağız üzərində mövcuddur. Bu qədər vəsait “sərf” olunsa da, yollarda yamaqvurma işlərindən başqa heç bir iş görülməyib. Amma, təbii ki, bu məbləğ yenə də “kifayət” etmədiyi üçün büdcədən ikinci dəfə pul ayrılıb. Bu dəfə isə təkcə təmir işləri deyil, həmçinin “abadlıq” işləri də nəzərdə tutulub. Yenidən büdcədən 1 998 499 manat vəsait əldə edilib. Düzdür, ortada elə də ciddi bir iş olmasa da “kağız üzərində” təmir-abadlıq işləri yekunlaşıb. Daşkəsən şəhərində Heydər Əliyev prospekti və ona bitişik yollarda təmir-tikinti işləri üçün ayrılmış 2 milyon manatın da aqibətindən Əhəd Abıyevdən başqa kimsənin xəbəri yoxdur. Adı yolların təmiri və yenidən qurulması olsa da bu işlərin nəticəsi mövcud yolların dağıdılmasından o tərəfə keçmir. “Yol əhvalatı” Zağalı-Kollu-Çıraqlı avtomobil yolunun əsaslı təmiri zamanı da davam etdirilib. Bu layihəyə 1, 3 milyon manat ayrıldığı halda vəziyyət hələ də bərbad olaraq qalır. Ayrılmış vəsaitin “azlığından” razı düşməyən Əhəd Abıyev əlavə olaraq daha 140 min manat da almağı bacarıb. Təbii ki, belə “abad və modern” yollarda icra başçısı adına layiq avtomobildə gəzməlidir. Ona görə də rayona avtomobil alınması üçün 34 min 220 manat pul ayrıldığı bildirilir.
Daşkəsən rayon İcra Hakimiyyəti şəhərdəki Heydər Əliyev prospektindəki istinad divarlarının təmir işlərinin satın alınması işlərinə də “xəsislik” etməyib. “Dizayn Construction” MMC tərəfindən həyata keçirilən işlər üçün 349 min 303 manat vəsait sərf olunub.
Ümumiyyətlə, rayona ayrılan büdcə vəsaitlərinin bir qəpiyi belə Əhəd Abıyevin azılığı olmadan və məsləhət bilmədiyi sahələrə xəclənə bilməz. Daşkəsən rayonu üçün təkcə ötən il büdcədən 8 milyon manat pul ayrılıb. Bütün rayonun poblemlərinin həlli məqsədilə ayrılmış bu pulun isə yarısını Əhəd Abıyev özünün “iqamətgahının” inşasına sərf etdirib. Rayon İca Hakimiyyətinin binasının tikintisinə 4, 2 milyon manat səf olunduğu bildirilir. Tikinti işləri “Anar” fiması tərəfindən həyata keçirilir. Maraqlıdır ki, kiçik bir rayonda bu məbləğdə pula inzibati binanın tikintisi nə qədər realdır. Bakıda belə pul ilə çoxmərtəbəli bir bina inşa etdirmək mümkün olduğu halda Əhəd Abıyev Daşkəsəndə özü üçün iqamətgah tikdirir. Rəqəmlərə nəzər saldıqda tikintinin nə qədər “şəffaf” aparıldığının şahidi olmaq mümükündür.
Binanın tikintisi zamanı iş o həddə çatıb ki, hətta fəhlələrə əmək haqqı belə verilməyib və narazılıq yaranıb.
15 illik deputatlıq stajı olan Əhəd Abıyevin Daşkəsənə rəhbərlik etdiyi illər ərzində rayon iqtisadiyyatı tamamilə tənəzzülə uğrayıb. Rayonda bildirirlər ki, onun gəlişinə qədər az-çox fəaliyyət göstərən müəssisələr belə öz işini dayandırmaq məcburiyyətində qalıb. Rayon sakinləri bir parça çörək pulu qazanmaq üçün ətraf rayonlara və paytaxta üz tutmağa məcbur olurlar. Daşkəsəndə iş qurmaq istəyən sahibkarlara isə “göz verilir, işıq verilmir”. İş adamlarına divan tutulduğu üçün baş götürüb rayondan qaçmaqla canlarını qurtarırlar. Rayonda qalan sahibkarlar isə müxtəlif adlar altında yığılan pullardan zinhar olublar. Rayonun sosial-iqtisadi problemlərinin həllindən yaxa qurtarmaq üçün Əhəd Abıyevin özünəməxsus metodları var. İcra başçısı dəfələrlə bildirib ki, Daşkəsən dağlıq rayon olduğu üçün buraya sərmayə yatırmaq sərfəsizdir. Əhəd Abıyev hətta prezident aparatını da təqsirli sanır. Rayon sakinlərinə bildirir ki, çox çalışsa da rayona lazım olan qədər pul ala bilmir. Doğrudan da, dəhşətli faktdır. Kiçik bir rayonun icra hakimiyyətinin inzibati binasının tikintisinə 4 milyon manat pul ala bilən Əhəd Abıyev Daşkəsənin inkişafına görəsən niyə pul tapmır. Yəqin ki, öz dediyi kimi, bura dağlıq ərazi olduğu üçün “sərmayə” yatırmaq sərfəsizdir. Belə olmasaydı, Daşkəsənin inkişafı üçün büdcədən kifayət qədər pullar ayrılmasına baxmayaraq rayon öz tarixinin bəlkə də ən acınacaqlı günlərini yaşamazdı. Rayondan aldığımız məlumata görə, Daşkəsənin icra başçısı statusunu özünə “yaraşdırmayan” Əhəd Abıyevi rayonda tapmaq çox müşkül məsələdir. Şikayətçilər nə qədər cəhd etsələr də, başçını öz iqamətgahında tapa bilmirlər. Rəhbərlik etdiyi rayona biganə münasibət bəsləyən Ə. Abıyev buradakı işləri müavinlərinə və etibar etdiyi adamlara həvalə edərək gününü Bakıda keçirir. Aldığımız məlumatlara əsasən, onun Bakı “səfərləri” heç də adi gəzmək üçün deyil. Bütün vasitələri işə salan Əhəd Abıyev paytaxtın rayonlarından birinə icra başçısı təyin olunmaq istəyir. Mənbə bildirir ki, Abıyevin konkret hədəfi Xətai rayonudur. Hətta bəzi iddialara görə, mətbuat səhifələrində Xətayi rayon icra hakimiyyətinin başçısı haqqında aparılan əks-təbliğat kompaniyasını da Əhəd Abıyev təşkil etdirir. Ucqar dağ rayonun 4 milyonluq icra hakimiyyəti binası belə Əhəd Abıyevi özünə cəlb edə bilmir. Daşkəsənin problemlərini daşa döndərən icra başçısı paytaxtı “abad” etmək üçün tələsir. Daşkəsəndə buna sevinsələr də paytaxtın narahat günləri başlaya bilər.
Nicat MAHMUDOV