Səyyad Arandan sonra vəzifə ilə mükafatlandırılacaq növbəti şəxs sabiq İqtisadi İnkişaf Naziri olacaq

gundemxeber.az Məşhur yapçı Səyyad Aranın yenidən vəzifəyə gətirilməsi hakimiyyətin “sabiqlər” projesi üzərində düşündüyünü bir daha təsdiqlədi. Xatırladaq ki, bundan əvvəl keçmiş baş prokuror Eldar Həsənovun, Bakı Şəhər Baş Polis İdarəsinin rəisi Məhərrəm Əliyevin, sabiq Sosial Müdafiə naziri Əli Nağıyevin və qeyrilərin yenidən vəzifə alacağı deyilirdi. Redaksiyamıza daxil olan məlumata görə Səyyad Arandan sonra vəzifə ilə mükafatlandırılacaq növbəti sabiq Heydər Babayev olacaq.
2008-ci ilin oktyabrın 30-da-da iqtisadi inkişaf naziri vəzifəsindən istefaya göndərilən Heydər Babayevin bir çox biznes subyektləri kimi “Bank Standart”ın da onun əlindən alındığı və Paşayevlərin nəzarətinə keçdiyi xəbəri yayılmışdı. Bu məlumat məhşur “WikiLeaks” saytının yayımladığı gizli sənədlərdə əksini tapmışdı. Bu istiqamətdə apardığımız araşdırmalar zamanı konkret faktlar əldə edə bilməsək də, bəzi maraqlı məlumatlarla rastlaşdıq. İlk növbədə qeyd edək ki, “Bank Standart”ın səhmdarı kimi “AB Standard” QSC” Şirkətlər Qrupu çıxış edir (nizamnamə kapitalı 100% bu şirkətə məxsusdur).
“AB Standard» QSC” Şirkətlər Qrupu Heydər Babayev tərəfindən yaradılıb və ölkənin ən böyük maliyyə-sənaye qruplarından biridir. Qrupa maliyyə, sənaye, ticarət, turizm, tikinti və sair sahələrdə fəaliyyət göstərən 10-dan artıq şirkət və müəssisə daxildir. “AB Standard» QSC” Şirkətlər Qrupunun Müşahidə Şurasına Oruc Heydərov rəhbərlik edir. Ancaq QSC-nin İnternet səhifəsində onun səhmdarları və İdarə Heyəti barədə hər hansı məlumat yerləşdirilməyib.
Hökumətə yaxın mənbə isə adıçəkilən Şirkətlər Qrupunun nəzarət paketinin Heydər Babayevdən alındığını, ancaq özünün də müəyyən payının saxlandığını bildirir. Dəqiq məlumat olmasa da, Babayevin Şirkətlər Qrupunun İdarə Heyətinin sədri kimi biznesin idərəçiliyində iştirakının da saxlanması mümkün sayılır.
Mənbənin daha bir məlumatı isə Heydər Babayevin hakimiyyətlə münasibətləri barədə oldu. Onun iddiasına görə, Babayev özündən əvvəlki iqtisadi inkişaf nazirindən fərqli olaraq, bağışlanmaz «siyasi səhv» buraxmadığından, ona qarşı heç vaxt xüsusi gərgin münasibət olmayıb. Mənbə iddia edir ki, Babayevə nazir postundan uzaqlaşdırıldıqdan sonra vəzif də təklif edilib: «Məndə olan məlumata görə ona Əli-Bayramlı (indiki Şirvan-müəl.) rayonuna icra başçsı getmək təklif edilib. Ancaq Heydər Babayev bundan imtina edib.»
Qeyd edək ki, bir müddət əvvəl sabiq nazirin özü ilə əlaqə saxlayan modern.az saytının ona ünvanladığı ”hansısa vəzifəyə təyinatınız mümkündürmü, bunu gözləyirsinizmi” sualına Heydər Babayev “perspektivdə heç nə gözləmirəm” deyə cavab verərək dəstəyi asmışdı. Görünür, icra başcısı postuna təklifdən imtina edən Heydər Babayevdə yenidən yüksək dövlət vəzifəsinə gətirilməyəcəyinə yəqinlik yaranıb.

Pərviz