Rayonda tətbiq olunan ifrat idarəçilik, çoxsaylı sakinləri ayağa qaldırır

Bu gün dövrü mətbuatda daha çox sosial problemlər məngənəsində boğulan, sadə sakinlərinə divan tutulan, sahibkarlıq fəaliyyəti ilə məşğul olan sahibkarları gözümçıxdıya salınan Gədəbəy rayonu haqda silsilə tənqidi məqalələr işıq üzü görməkdədir. Rayonda tətbiq edilən ifrat idarəçilik, bir daha onu söyləməyə əsas verir ki, Ramiz Yediyarov icra başçısı təyin olunduqdan sonra, sanki bütün sahələrə nəzarət bir əldə cəmləşdi. Əslinə baxsan bunun da bir çox səbəbləri var ki, bu səbəblər içərisində Ramiz Yediyarovun xarakterik xüsusiyyətinin göstəriciləri, daha çox gəlir əldə etmək istəyinin varlığıdır.
Diqqəti bir məqama da yönəldək ki, Gədəbəyin tarixində bu günə qədər neçə-neçə rəhbər şəxslər olublar. Düzdür, onlardan hər biri Gədəbəydə müəyyən mənada iz də qoyublar. Kimisi gədəbəyli olmasa da qurub yaradıb, kimisi də olanı vurub dağıdıb. Yəqin ki, Ramiz Yediyarovun adı da, Gədəbəyin bugünkü tarixinə vurub dağıdan rəhbər şəxs olaraq yazılacaq. Həmin şəxslərdən tam əksəriyyəti gədəbəylilərə zaman-zaman hörmətlə yanaşıblar, onların qürurlu adları ilə də öyünüblər. Amma, bu gün rayona rəhbərlik edən Ramiz Yediyarov, gədəbəyliləri dilənçi adlandırır, onları bu yolla alçatmaqdan da çəkinmir. Amma, bir həqiqəti dərk etmir ki, hələ sovet dönəmində də bəlkə Gədəbəy rayonu yeganə rayon olub ki, ərazisində bir kimsə dilənçiliklə məşğul olmayıb.
Əslinə baxsan bu cür yanaşma, heç bir vəzifə sahibinə yaraşmayan yanaşmadır. Amma, nə etmək olar! Bu gün Gədəbəydə icra başçısı vəzifəsini daşımaqla, polisin, digər hüquq-mühafizə orqanlarının gücünə arxayın olan bu şəxs, nəinki atdığı addımlara, hətta danışdıqlarına da fikir vermir.
Bütün bu kimi addımlarının nəticəsidir ki, bu gün Ramiz Yediyarov idarəçiliyinə qarşı rayon sakinlərinin narazılığı durmadan artır, obyektləri darmadağın edilmiş sahibkarların ara-sıra Prezident Administrasiyasına yürüşləri də baş tutur. Buna səbəb onlara məxsus obyektlərin heç bir məhkəmə qərarı olmadan, dövlət əhəmiyyətli layihələrin həyata keçirilməsi olmadan sökülmələridir. Məsələn bir-iki gün bundan öncə redaksiyamıza üz tutan və Gədəbəy şəhəri Nizami küçəsi ev-42 ünvanında yaşayan Abdullayev Rusif Əli oğlu bildirir ki, “1997-ci ildə mərhum atam Əli Abdullayevə 5x12-ə, yəni 60kvm olan torpaq sahəsinin verilməsi barədə, Gədəbəy icra İcra Hakimiyyətinin başçısı olmuş Ramiz Bağırov 258 nömrəli sərəncamı imzalayır. Ayrılmış torpaq sahəsinə aid sərəncamda göstərilir ki, həmin ərazidə kafe və mağaza tikilə bilər. Elə ki, 60kvm-lik sahədə mağaza və kafe tikilib başa çatdırılır, həmin obyektə bitişik 14x12,5=168,5kvm-ə yaxın torpaq sahəsi də, 30 aprel 1999-cu il tarixdə icra başçısı tərəfindən Əli Abdullayevə 62 saylı sərəncam əsasında verilir. İkninci dəfə verilmiş sərəncam əsasında, inşaası başa çatdırılmış obyektin 2-ci və 3-cü mərtəbələrində də tikinti işləri başa çatdırılır. Elə ki, tikinti işləri tam başa çatdırılır, həmin obyektə dair sənədlər Azərbaycan Respublikasının Dövlət Statistika Komitəsinin 31 may 1994-cü il tarixli 4/9 saylı qərarı ilə də təsdiq edilir.
Onu da qeyd edim ki, Heydər Əliyev prospektində atamın tam mülkiyyətində olan kommersiya obyektinin yaxınlığında, yəni 20 Yanvar küçəsində 76kvm-lik torpaq sahəsi də, 27 avqust 2007-ci il tarixdə Gədəbəy şəhər bələdiyyəsinin alqı-satqısı ilə atama verilir. O, bununla bağlı “Kapital Bank”ın Gədəbəy filialına tələb olunan dövlət rüsumunu da ödəyir. Verilmiş torpaq sahəsinin üstündə o, kommersiya məqsədilə obyekt də tikdirir. Obyektin inşası tam başa çatdırıldıqdan sonra, Əli Abdullayev 07 may 2010-cu il tarixdə reystr nömrəsi 505013000869-06301, qeydiyyat nömrəsi isə 3110001171 olan, Azərbaycan Respublikası Əmlak Məsələləri Komitəsi Yanında, Daşınmaz Əmlakın Dövlət Reystri Xidmətindən çıxarış da alır. Əldə olunmuş çıxarış DƏDRX-də 1 nömrəli reyestr kitabının 34 nömrəli vərəqində qeydiyyata da alınır. Obyektin fəaliyyətinə dair 23 dekabr 2005-ci il tarixdə 14 saylı ərazi vergilər idarəsinin rəisi olmuş Ramiz Yediyarovun imzası ilə 5900092572 saylı vöen-də alınır.
Obyekt həmin vöenlə 2008-ci ilin aprelinə qədər fəaliyyətini davam etdirir. Həmin vaxtdan sonra, obyekti notarial qaydada 2008-ci ildə 5 illik etibarnamə ilə atam mənə verdi. Mən də 14 saylı Ərazi Vergilər İdarəsindən 06 may 2008-ci il tarixdə 5900143232 saylı vöen alaraq, çox keçmədən fəaliyyətə başladım. Vergini də vaxtlı-vaxtında ödədim. 2011-ilin sonlarında adıma açdırdığım vöeni bağlatdırdım. 2012-ci ildə atam Əli Abdullayev, vaxtilə bağlatdırmış olduğu vöenini açdırdı.
Elə ki, 2012-ci ilin fevral ayında Ramiz Yediyarov Gədəbəy rayon İcra Hakimiyyətinə başçı təyin edidi, çox keçmədi ki, 10 mayda yəni, Ulu Öndər Heydər Əliyevin doğum günü icra hakimiyyəti aparatından iki əməkdaş atama məxsus obyekti ölçürlər. Obyekti ölçüb qurtardıqdan sonra, 21 mayda təqribən axşam saatlarında səbəbi açıqlanmadan atama çatdırılır ki, “səhər bayıra çıxma”. Dolayısı yolla olsa da, ona belə bir tapşırıq verilir. Atam çox götür-qoy etsə də, çatdırılan tapşırığın mahiyyətini dəqiqləşdirə bilmir. 22 mayda səhər saatlarında, təqribən 11.30 radələrində evdən bayıra çıxarkən görür ki, ağır texnika ilə ona məxsus obyekti yerlə-yeksan edirlər. Onu da qeyd edim ki, atama məxsus obyektin sökülməsinə dair nə Nazirlər Obyektdə dağıntı işləri aparılarkən, baş verəcək hansısa hadisənin qarşısını almaq üçün əraziyə polis qüvvələri də səfərbər olunur. Elə ki, obyekt tamamilə darmadağın edilir, çox keçmir ki, atam icra hakimiyyəti aparatına ərizə ilə də müraciət edir. Ünvanlanmış müraciətə icra hakimiyyəti tərəfindən heç bir münasibət bildirilmir və birbaşa sayğısızlıq göstərilir. Belə olan halda o, məcbur olur ki, Gəncə İnzibati-İqtisad Məhkəməsində baş verən olayla bağlı iddia qaldırsın. Bu belə də olur və 2013-cü il tarixdə məhkəmə olduqca ədalətsizliyə söykənən qərar çıxarır. Çıxarıılmış qərarla bağlı atam Gəncə Apelliyasiya Məhkəməsinə müraciət etmək məcburiyyətində qalır. 17 sentyabr 2013-cü il tarixdə məhkəmə prosesi keçirilməli olduğu halda, proses təxirə salınır. Belə olan halda atam bərk əsəbləşir və o, 19 sentyabr 2013-cü il tarixdə, səhər saat təqribən 06.15 radələrində dünyasını dəyişir. Onun ölmünə sözsüz ki, baş verən hadisələr, atılmış qanunsuz addımlar, çıxarılmış ədalətsiz məhkəmə qərarı da təsir edir.
Bu gün onun hüquqi varisi üç oğluvə həyat yoldaşı olduğundan, hal-hazırda yarımçıq qalmış məhkəmə proseslərini, onun övladları başa çatdırmaq əzmindədirlər. Hal-hazırda Gədəbəydə qanun şah olduğundan, məhkəmələr də verilmiş sifarişləri yerinə yetirir. Belə olan halda da, heç bir nəticəyə də nail olmaq mümkün olmur. Düz üç il doqquz aydır ki, Ramiz Yediyarovun vermiş olduğu qanunsuz tapşırığa görə dağıdılmış obyektimizə görə nə kompensasiya ala bilirik, nə də ki, icra hakimiyyəti tərəfindən obyektimiz tikdirilir.
“Gündəm Xəbər”ə üz tutan sahibkarlardan biri də, əslən Gədəbəy rayonundan olan Məmmədov Qasım Nəriman oğludur. O da redaksiyamıza ünvanladığı müraciətində bildirir ki, “artıq Ramiz Yediyarovun tətbiq etdiyi zorakı idarəçilik, bir çox sahibkarlar kimi məni də Prezident Administrasiyası ilə Gədəbəyin arasında qoyub. Buna səbəb, ötən ilin noyabr ayında heç bir məhkəmə qərarı, Nazirlər Kabinetinin hər hansı tapşırığı olmadan, Gədəbəy şəhəri Məmmədəmin Rəsulzadə adına küçədə mənə məxsus 51kvm-lik torpaq üstündə tikili, yəni çayxana kimi istifadə etdiyim obyek, bir neçə nəfər icra hakimiyyəti işçilərinin iştirakı ilə darmadağın edildi. Hal-hazırda dağıdılmış obyektimin yerində dövlətə aid heç bir tikili yoxdur və bugünkü gündə yerlə yeksan edilmiş obyektimin yerləşdiyi yerdən, yaxınlıqda yerləşən “Vüsal” şadlıq sarayına pilləkan tikiblər. Məqsəd nə idi ki, mənə məxsus obyekt heç bir dövlət əhəmiyyətli plana düşmədən viran edildi. Əgər ərazi ilk öncə mənə təklif olunsaydı, o halda həmin yerdə müəyyən qədər təmir işləri aparardım ki, şəhərin ümumi gözəlliyinə xələl gəlməsin”.
Diqqəti cəlb edən hal odur ki, Qasım Məmmədovun obyekti darmadağın edildikdən sonra, ona 51kvm-lik obyektin müqabilində, yeni tikilmiş ticarət mərkəzində heç bir sənədi olmayan, standartlara cavab verməyən 17kvm-lik obyekt təklif olunur. O, edilmiş təklifdən birmənalı şəkildə imtina edir və üzləşdiyi problemlə bağlı icra hakimiyyətinə ərizə ilə müraciət etsə də, təəssüflər olsun ki, bir kimsə onunla maraqlanmır, etdiyi müraciətinə də heç bir halda cavab verilmir. Bu günədək dağıdılmış obyektinə görə kompensasiya almayan Qasım Məmmədovovun tələbi odur ki, ya uçurulmuş obyektini tikib özünə qaytarsınlar, ya da ki, rayonun mərkəzi hissələrindən birində ona 51kvm-lik obyekt versinlər.
Daha böyük iztirabın, haqsızlığın, bənzəri olmayan ədalətsizliyin qurbanı olan Səfərov Vaqif Qara oğlu da, artıq xeyli müddətdir ki, Gədəbəy rayon rəhbərliyinin qol qoyduğu əməllərdən ziyan çəkməkdədir. Bəzi sahibkarlar kimi, o da redaksiyamıza təqdim etdiyi müraciətində yazır ki, “mənə 16 iyun 1998-cildə icra başçısı olmuş Ramiz Bağırov tərəfindən 143 saylı sərəncama əsasən 26 sot, yəni 2600kvm-lik torpaq sahəsi verilmişdi. 30 sentyabr 1998-ci ildə verilmiş sərəncam əsasında Ədliyyə Nazirliyinin 8/1-98 saylı nizamnaməsini və 8/1-98 saylı şəhadətnaməsini də almışdım. Qanun-qayda ilə verilmiş sahəni tam hasara aldım və 2004-cü ildə Gədəbəy şəhər bələdiyyəsinin qərarı ilə, 2564000 manat pulu kassaya da ödədim. Verilmiş ərazidə tikinti işləri apararaq, həmin yerdən bazar kimi də istifadə etdim. Vaxt keçdikcə mənim fəaliyyətim Gədəbəy rayon rəhbərliyinin xoşuna gəlmədi və həmin ərazinin zor-xoş məndən almaq haqda planlar cızdı. Çox keçmədi ki, o, ərazidən keçən yüksək gərginlikli elektrik xətlərinin varlığını bəhanə edərək,tikintisini başa çatdırdığım, yaxud da yarımçıq qalmış tiklilərimi darmadağın etdirdi və 2012-ci ildə həmin yeri əlimdən aldırdı”.
Faciəli hal odur ki, qanuni sənədləri əlində olan Vaqif Səfərova yüksək gərginlikli elektrik naqillərinin varlığı bəhanə gətirilsə də, çox keçmir ki, rayon rəhbərliyinin tapşırığı ilə həmin yerdə yeni bazar inşa olunur. Belə olan halda sual oluna bilər ki, əgər yüksək gərginlikli elektrik naqilləri təhlükə törədirdisə, bəs bu gün nə baş verdi ki, həmin naqillər təhlükə törətmir? Belə bir sualın cavabını kim bilməsə də, yəqin ki, Gədəbəyə qənim kəsilən Ramiz Yediyarov çox gözəl bilər. Təəssüf doğuran digər hal da odur ki, 26 sot torpaq sahəsi əlindən alınan, inşa etdirdiyi tikliləri yerlə-yeksan edilən Vaqif Səfərova heç 50 kvm-lik olsun belə yer təklif olunmur. Belə bir addımlar da onu söyləməyə əsas verir ki, Gədəbəydə sahibkarlara divan tutmağı, Ramiz Yediyarov ən yaxın hədəflərindən biri olaraq qarşısına məqsəd qoyub.
Gədəbəyin iztirabları təkcə icra başçısının bədniyyətli əməlləri ilə yekunlaşmır. Çünki, bu gün rayonunn problemlər məngənəsində boğulmasında, saysız-hesabsız qarşıdurmaların yaranmasında səbəbkar olanlardan biri də, rayonun maliyyə idarəsinə rəhbərlik edən Namiq Məmmədovdur. Məsələn, ona sual etmək yerinə düşər ki, rayonun mərkəzi küçəsində plana düşən aptek niyə sökülmədi? Maliyyə idarəsinə rəhbərlik edən Namiq Məmmədovun, digər yollarla gəlir əldə etməsi məsələsinə gəlincə isə, onu da deyə bilərik ki, bu şəxs rayondakı poliklinikadan xəstələrə verilən forma-88 müqabilində əldə olunan pullara da şərik olur. Rayonun mərkəzində fəaliyyət göstərən aptekin plana düşməsinə baxmayaraq, bu gün həmin aptekdə satılan dərmanlar da, “maliyyə şefi”nə gündəlik gəlir gətirməkdədir. Bu haqda məlumatı verən mənbə onu da bildirir ki, həmin aptekdə rayonun imtiyazlı sakinlərinə pulsuz verilməli olan dərmanlar da satdırılır. Əgər aptekə giriş əvvəl ön hissədən idisə, bu gün isə yan tərəfdən də giriş qapısı açılıb. Bu da aptekdə müştəriləri dərman almalarına və.s geniş imkanlar açır.
Aptekin plana düşüb niyə sökülməməsi məsələsinə gəlincə onu deyə bilərik ki, problemin həllini Namiq Məmmədov rayon rəhbərliyi ilə zamanında çözə bilib. Bu zaman ortada nə qədər “haqq-hesab”ın olmasını, sahibkarlıq fəaliyyəti ilə məşğul olan və Yediyarov-Məmmədov ittifaqının iztirabından zülm çəkənlər də bilirlər. Təqribən 100 ədəd şam ağacının ömrünə, hansı vəzifə sahibi “hökm oxutdurub. Şəhərin Heydər Əliyev parkında inşa olunan və dəyəri orta hesabla 200 min manata qiymətləndirilən “Çay Evi”nin də, Namiq Məmmədova bağlılığı haqda, hələ bir müddət bundan əvvəl dövrü mətbuatda açıqlamalar da dərc etmişdik. Bu haqda məlumatı verən mənbə bildirir ki, “Çay Evi”nin inşaası zamanı 40-50 illik təqribən 100 ədəd şam ağacının ömrünə “hökm”də oxunur. Bu gün isə Namiq Məmmədovun əsas amalı, rayonun Slavyanka kəndində Ramiz Yediyarova tikdirdiyi villanın inşaasına köklənib. Villanın ön hissəsində tikilən “kotejlər”in “maliyyə şefi”nə məxsus olduğu da bildirilir. Namiq müəllimin Zəhmət kəndi ilə Slavyankanın ayrıcında tikdirdiyi evin isə, icra başçısının sürücüsünə məxsus olduğunu söyləyənlər də var.
Bütün bunlar Gədəbəydə yaşananların görünən tərfləridir. Bu günədək görünməyən addımlardan biri də, gədəbəyli sahibkarlardan bir neçəsinin aclıq aksiyalarına başlamaları olacaq. Bu haqda fikirlərini bizimlə bölüşən və vaxtilə sahibkarlıq fəaliyyəti ilə məşğul olan Əliyev Oqtay Qara oğlu bildirdi ki, “biz mübarizənin yeni qaydalarına, yəni aclıq aksiyasına başlayacağıq. Bu mübarizə yolunda öldü var döndü yoxdur. Bəlkə belə olan halda, daha geniş ictimaiyyət haqq səsimizi eşitdi və bizə lazım olan dəstəyi də verdi. Odur ki, haqq işimiz uğrunda mübarizəyə başlamaqda qərarlıyıq.

Cəfər

gundemxeber.az