“Milyarderlər İttifaqı”nın üzvü Milli Şuranın yaradılmasına başlanacağını və həbs
olunsa belə Bakıya gələcəyini bəyan etdi: “Təkcə təbiəti deyil, Əliyev rejiminin çoxillik
qışından yorulmuş Azərbaycan cəmiyyətini də qış yuxusundan oyandıran bahar gəlir”

Kreml hakimiyyət üçün “əcəl zəngi”ni çalır və Əliyevlərin sonuncu baharı soyuq şimaldan yaxınlaşır

Dünya şöhrətli kino xadimi Rüstəm İbrahimbəyovun qan daman sonuncu yazısı İlham Əliyevin 2013 seçkilərində alternativi Rusiya olacağına şübhə yeri qoymur. R.İbrahimbəyovun məqaləsini təqdim etməzdən öncə istiqamətləndirici xətti yada salmaq yerinə düşər. Biz “Moskva göz yaşlarına inanmır” sərlövhəli yazıda Kremlin Azərbaycandakı prezident seçkilərinə dair düyməni basdığını vurğulamışdıq. Yazıdan sonrakı siyasi proseslərin gedişi tezislərimizi təsdiqləyir və Əliyevlər üçün şimaldan “əcəl zənginin” çalınmağa başlandığını deməyə əsas verir.

“Qərb rejimin cinayətkar olduğunu anlayır”

Baxmayaraq ki, R.İbrahimbəyovun son müsahibəsi bəzilərində pessimist əhval-ruhiyyə doğurmuşdu. Bir çoxları ehtimal etdi ki, kinorejissor artıq vətənə qayıtmayacaq və ikinci Rəsul Quliyev yetişir. Amma İbrahimbəyov son məqaləsi ilə “ağ inqilab”ın və “azəri baharı”nın anonsunu verdi. Onu da unutmayaq ki, Rüstəm bəy “Milyarderlər İttifaqı” kimi tanınan Ümumrusiya Azərbaycan Təşkilatları İttifaqı üzvüdür və bu xətt bütün proseslərin gedişində bizi izləyir. Ədibin contact.az saytında dərc olunan sözügedən yazısını təqdim edirik:
“2013-cü ilin ilk iki ayında baş verən hadisələr göstərdi ki, Azərbaycanda hakimiyyətlə xalqın qarşıdurması güclənir. Rayonlarda kütləvi çaxnaşmalar, Bakıda gənclərin etiraz nümayişləri hakimiyyətin sərt cavab reaksiyasına səbəb olur. Amma mənasız, kobud şəkildə saxtalaşdırılmış ittihamlar əsasında çoxsaylı həbslər, cinayət təqibləri, kütləvi informasiya vasitələrində böhtan kampaniyaları - bütün bu cəza tədbirləri vəziyyəti daha da ağırlaşdırır və ölkəni nəticələrini proqnozlaşdırmaq mümkün olmayan genişmiqyaslı partlayışa sürükləyir.
Mən bir aya yaxındır ki, xaricdəyəm. ABŞ-da, Rusiyada, Fransada, Gürcüstanda mədəniyyət, incəsənət və siyasət xadimləri ilə görüşdükcə, xaricdə Azərbaycan hakimiyyətinin nüfuzunun çox aşağı olduğundan əmin oluram. Dünya ictimaiyyəti kütləvi informasiya vasitələrində çoxsaylı nəşrlərdən ölkəmizdə nələr baş verdiyi barədə yaxşı məlumatlanıb. Çoxları ölkəmizdə mövcud olan rejimin cinayətkar xarakterli olduğunu anlayır və “Neçə illərdir niyə dözürdünüz? Ziyalılarınız haradadır? Niyə susurdu?” sualları ilə qarşılaşdıqda qeyri-iradi olaraq utanc hissi keçirirəm”.

“Dünya ictimaiyyətinə müraciət etsək, köməklik göstəriləcək”

Kinorejissor ardınca yazır: “Görüşdüyüm bütün insanlar Azərbaycan hakimiyyətinin korrupsiyanın səviyyəsinin azaldılması və rejimin demokratikləşdirilməsi üzrə ciddi addımlar atmaq istəməməsindən (kadr dəyişiklikləri olmadan bu, mümkün deyil), bunun xalq qəzəbinin partlamasına səbəb ola biləcəyindən narahatdırlar. Və hamı başa düşür ki, qarşıda duran prezident seçkiləri bizim üçün ənənəvi olan nəticələrin saxtalaşdırılması ilə keçərsə, hadisələrin bu şəkildə inkişafı ehtimalı daha da artacaq.
Azərbaycan vətəndaşları da gələcəyə olan ümidlərini qarşıda duran seçkilərə bağlayırlar. Bu seçki, şübhəsiz, seçicilərin daha çox fəallığı ilə keçəcək.
Amma başqa ölkələrin təcrübəsi göstərir ki, beynəlxalq dəstək olmadan seçkilərdə şəffaflığı və ədalətliliyi təmin etmək çətindir. O da aydındır ki, beynəlxalq dəstək yalnız çağırıldığı yerə verilir. Əminəm ki, dünya ictimaiyyətinə müraciət etsək, bizə də seçkilərin keçirilməsində köməklik göstəriləcək. Ən yaxın günlərdə ölkənin bütün demokratik qüvvələrinin adından bunu etmək lazımdır. Fikrimcə, artıq Milli Şuranın tərkibinin formalaşdırılmasına başlamağın da vaxtı gəlib. Ölkənin aparıcı ictimai-siyasi qüvvələrinin nümayəndələri bu şuranın formalaşdırılması ideyasını dəstəkləyir.
Milli Şuraya partiya mənsubiyyətindən, vəzifəsindən və ideoloji əqidəsindən asılı olmayaraq, xalqın etimadını qazanmış şəxslər daxil olmalıdır. (Milli Şuranın işinə Azərbaycan hüdudlarından kənarda yaşayan insanlar da cəlb edilə bilər). Milli Şuranın say tərkibi onun formalaşdırılması prosesində, regionların nümayəndələri nəzərə alınmaqla müəyyən ediləcək. Təkrar edirəm, əsas seçim meyarı ictimai nüfuz və Konstitusiya normalarına uyğun yaşayan dövlət yaradılmasında iştirak etməyə hazırlıq olacaq”.

“Həbs təhlükəsi olsa da, dərhal Bakıya gələcəyəm”

R.İbrahimbəyov məqalənin sonuncu abzasında isə nə istədiyini daha da aydınlaşdırır: “Milli Şura demokratik qüvvələrin ədalətli və düzgün seçkilərin keçirilməsi üçün şəraiti təmin edən ümumi strategiyasını müəyyən edəcək. Daha sonra bütün aparıcı ictimai siyasi qüvvələrin və partiyaların fikrini nəzərə alaraq, prezidentliyə vahid namizədi irəli sürəcək.
Hakimiyyət, şübhəsiz ki, ölkədə mövcud vəziyyətin dəyişməsinə mane olmaq üçün əlindən gələni edəcək və istənilən təxribatlara hazır olmaq lazımdır. Bu dəfələrlə təsdiqini tapıb. Təkcə təbiəti deyil, “Əliyev” rejiminin çoxillik qışından yorulmuş Azərbaycan cəmiyyətini də qış yuxusundan oyandıran bahar gəlir. Mənim işlərim elə alınıb ki, martın sonlarına qədər Azərbaycanın hüdudlarından kənarda olmalıyam. Amma Ziyalılar Forumundan yoldaşlarım istənilən an mənim iş naminə mövcudluğumun zəruri olduğunu hesab edərlərsə, həbs təhlükəsi olmasına baxmayaraq belə, dərhal Bakıya gələcəyəm”. Hörmətli kinorejissorun son cümlələri əslində daha çox müzakirə olunmalıdır.
Əvvəla, o bir neçə gün öncə müsahibəsində qeyd etmişdi ki, “Məgər dəliyəm Bakıya gələm və məni həbs etsinlər? Burda qalıb ziyalı kimi sözümü deyəcəyəm. Bunu yalnız siyasi lider, prezident olmaq istəyən şəxs edər. Çünki belə siyasi xarakterli həbs siyasətçinin nüfuzunu artırır. Mən sıravi vətəndaş və ziyalı kimi mövqeyimi həmişə bildirirəm, bundan sonra da bildirəcəyəm”.
Ancaq müsahibədən 3 gün sonra o, tam əksinə olaraq elə prezident olmaq istəyən şəxs kimi bəyanat verir və həbs təhlükəsi olsa belə Bakıya gələcəyini söyləyir. Eyni zamanda hakimiyyətin status-kvonu saxlamaq üçün təxribatlar təşkil edəcəyinə hazır olmağımızı xəbərdar edir. Daha iddialı, aydın və şəffaf danışır.
İbrahimbəyov demək istəyir ki, martda “azəri baharı” başlanacaq və proseslərin gedişindən asılı olaraq öndə gedəcək. Yəni, bizi qarşıda elə yazıçının təbirincə desək, qış yuxusundan oyadan bahar gözləyir. Bu bahar başqa baharlardan olmayacaq və qış yuxusuna getmiş ölkəni soyuq duşla ayıldacaq. Əgər İbrahimbəyov kimi sanballı bir şəxsiyyətin dediklərinə inansaq, hakimiyyət üçün sonuncu bahar gəlir. Özü də soyuq şimal tərəfdən...

Aslan