Sosial şəbəkələr və gənclər tərəfindən hakimiyyət üçün
“əcəl zəng”i çalınır; xalq hərəkatının yeni dövrü başlanıb

Azərbaycan gəncliyi mübarizənin yeni arsenalına qədəm qoyub. Vaxtilə “Mən inqilabı beşikdəki körpələrlə edəcəm” deyən Xamneyinin sözləri bu gün Azərbaycanda aktuallaşıb. Heydər Əliyevin hakimiyyətə gəldiyi illərdə dünyaya göz açan körpələr bu gün meydanda bünövrəsi 1993-cü ildə qoyulan rejimə qarşı mücadilə aparır.
Estafet 80-ci illərin sonu və 90-larda doğulan gənclərə verilib və mübarizənin lokomotivi rolunu onlar oynayır. Bakıda keçirilən son mitinqlərdə aparıcı qüvvə və avanqard məhz gənclikdir. Onlar həbslərdən, rezin güllələrdən, su şırnağından qorxmayaraq döyüşürlər. Elə sonuncu mitinqdə polisin qəddar davranışı, aksiyaçıları meydana güllə və su ilə qovmaq cəhdləri də, onların əzmini qıra bilmədi.
10 mart aksiyasından öncə də gənclər sınaqdan çıxmışdı və indi gəncliyi əzmək mümkün olmayacaq. Hələ 2011-ci ilin 11 mart aksiyasından təməli qoyulan gənclik davası bu gün çiçəklənmə dövrünü yaşayır. Onlar həbslərdən, işgəncələrdən, işsiz qalmaqdan qorxmayaraq mübarizə meydanına atılır və rejimə yumruq göstərir.
Etirazçı gənclik müxalifət partiyaları, liderlər, maliyyə resursları olmadan poliqona çıxıblar. Biz mart ayının gərgin keçəcəyi və “azəri baharı”nın başlanacağı barədə proqnoz vermişdik. Buyurun, Azərbaycan martın ilk 10 günlüyünü mitinqlər, repressiyalarla başa vurub. Meydanda döyüşən gənclik, “dövlət çevrilişi” ittihamı ilə həbs edilən yenə gənclik, təqib olunan, sutkalıq həbs alan, cərimələnən də gənclik. Beləliklə, gənclər Əliyevlər üçün “əcəl zəngi” çalmağa başlayıb və bu prosesin qarşısını almaq olmayacaq.
10 mart mitinqində su şırnağının, rezin güllələrin, bibər qazının qabağından gənclər qaçmadısa, onların üstünə bundan sonra qoşun, tanklar da yeridilsə bumeranq effekt verəcək. Nəticə göz qabağındadır və hakimiyyət gənclərlə bacarmır. Müxalifəti, mətbuatı və QHT-ləri xeyli dərəcədə əzib sındıran rejim gənclik dalğasının qarşısında duruş gətirə bilmir.
Əksinə, repressiyalar onları qüvvətləndirir, növbəti aksiyalara daha çox aktivistin çıxmasına zəmin hazırlayır. Bu gün dünyanın hər yerində proseslərin aparıcı qüvvəsi tələbələr, yeniyetmələr və gənclərdir. Elə ərəb ölkələrində baş verən inqilablarda da gənclik ön cəbhədə vuruşurdu. Bu proseslərin cərəyan etməsində sosial şəbəkələrin, virtual təşkilatlanmanın rolu əvəzsizdir.
Facebook və Tvitter sosial şəbəkələri vasitəsi ilə mitinqlər təşkil olunur, təbliğat aparılır və virtual planlar reallığa transformasiya olunur. Bununla da sosial şəbəkələr vasitəsi ilə xalq hərəkatının yeni dövrünə başlanıb və Azərbaycanda inqilabın tappıltı səsləri eşidilir.
Sistem artıq daxildən çat verib, hakimiyyət idarəetməni itirib, bütün imkanlar tükənib, nəzarətetmə qabiliyyəti əldən çıxıb və saray daxilində çəkişmələr dərinləşib. İnqilabın modeli də məhz iqtidar daxilində parçalanmanın yaranması, narazı kütlənin yetişdirilməsi və hakimiyyətin isterik vəziyyətə düşməsi ilə səciyyələnir.
Hakimiyyətin isə fərqli düşünən gənclərə münasibəti onları məhv etməkdir. İqtidar gənclərin şərləyib narkoman çıxarır, dövlət çevrilişində günahlandırır ( kül o dövlətin başına ki, 3 gənc çevriliş edəcək).
Yada salaq ki, Azərbaycan Gənclər Fondunun yaradılmasının birinci ildönümü ilə əlaqədar konfrans keçirilmişdi. Prezident Administrasiyasının ictimai-siyasi şöbəsinin müdiri Əli Həsənov çıxışında hökumətyönlü gənclərin passivliyindən narazılıq etmişdi.
Sitat: “Üç-dörd nəfər sizin tərəfinizdən heç bir müqavimətlə qarşılaşmadığı üçün Eurovision zamanı fleşmoblar təşkil ediblər, əcnəbilərə ucqar yerləri göstəriblər, bununla da ölkənin imicinə ciddi ziyan vurublar. Belə aksiyalara qarşı həm keyfiyyət, həm də kəmiyyətcə fəal mübarizə aparmalısınız. Azərbaycan haqqında yolunu azmış 4-5 gəncin deyil, sizin - Azərbaycanın problemlərini beynəlxalq ictimaiyyətin diqqətinə çatdırmaq iqtidarında olan fəal gənclərin danışmasına nail olmalıyıq”.
Ə.Həsənovun timsalında rejimin gəncliyə olan “qayğısı”, “diqqəti” göz önündədir. İqtidar öz vətəndaşlarına qarşı silah açırsa, bu rejim özünü intihar yolunu tutmuş sayılır.

A.Ağasoy