Elçin Manafov: “Bəs harada qaldı hakimiyyətin humanistliyi? Nə vaxta qədər xarici təşkilatlardan yardım istənilməlidir? Məgər özlərinin vicdanı və insafı yoxdur? İnsan deyillər bunlar?”

Bu gün AİP-in Astara rayon komitəsinin sədri Rufullah Axundzadənin həbsxanada səhhətinin pisləşməsi və aidiyyəti qurumların baş verənlərə əhəmiyyətsiz yanaşması ilə mətbuat konfransı keçirilib. AİP və İslamçıların Hüquqlarının Müdafiə Komitəsi tərəfindən keçirilən tədbirdə, AİP rəsmiləri, islamçılar, hüquq müdafiəçiləri, ictimaiyyət və media nümayəndələri iştirak ediblər.
İlkin olaraq çıxış edən İslamçıların Hüquqlarının Müdafiə Komitəsinin sədri Natiq Kərimli bildirdi ki, 2011-ci ildən etibarən dəyərli islamçılara qarşı repressiya dalğası baş qaldırıb. AİP-in sədr müavini Vaqif Abdullayevin ötən il müəmmalı şəkildə dünyasını dəyişdiyini bildirən Natiq Kərimli, “növbəti qurbanlardan biri isə Rufullah Axundzadə ola bilər. Onun vəziyyəti olduqca ağırdır. Həbsxanaya aparıldığı gündən etibarən ona qəzet verməməklə tamamilə ictimai-siyasi proseslərdən kənarda saxladılar”, - deyə bildirdi: “Müayinə nəticəsində məlum olub ki, Rufullah Axundzadə ağır şəkildə infarkt keçirib. Hazırda o, 15 nəfərlik palataya yerləşdirilib. Əslində isə normal şəraiti olan xəstəxana və ya müalicə müəssisəsində saxlanılmalıdır. Vəziyyət günü-gündən daha da kəskinləşir. Artıq Penitensiar Xidmətin həkimləri də etiraf ediblər ki, onlar Rufullah Axundzadəyə baxa bilmirlər. Həkimlər bildirirlər ki, bizə icazə versəydilər, dərhal rəy yazıb Rufullah Axundzadənin azadlığa çıxmasına şərait yaradardıq.”
Atasının səhhəti haqqında məlumat verən Rufullah Axundzadənin oğlu Muhammədəli Axundzadə bildirdi ki, atasının vəziyyəti hazırda olduqca ağırdır: “Həkimlər mənə bildirdilər ki, atanızın belə bir şəraitdə müalicəsi mümkün deyil. Bacardığınız qədər çalışın ki, buradan başqa müalicə mərkəzinə aparsınlar. Əks halda vəziyyət daha da pisləşəcək. Atama hazırda tərpənmək olmaz. Hər tərpəndikcə vəziyyəti daha da ağırlaşır. Qıraqdan gətirilən Naibə adlı həkim də rəy verib ki, nə qədər yaxşı müalicə edilsə də saxlanma şəraiti müsbət nəticəyə imkan verməyəcək. Vəkil Anar Qasımlı bir həftədən çoxdur ki, Ədliyyə Nazirliyinin Penitensiar Xidmət üzrə müavini Mədət Quliyevə müraciət etməsinə baxmayaraq, hələ də cavab yoxdur.”
Bundan sonra çıxış edən AİP-in sədr müavini Akif Heydərli bildirdi ki, ötən il dünyasını dəyişən Vaqif Abdullayevin ölümünü səbəbləri hələ də naməlum olaraq qalıb: “Şübhəsiz ki, bütün baş verənlər islamçılara ögey münasibətlərdən doğur. Lakin insan ömrünə və həyatına bu cür münasibət nə milli, nə mənəvi, nə də ki, insanı dəyərlər kriteriyasına uyğun gəlir. Vaqif Abdullayevin ölümündən bir ilə yaxın zamanın keçməsinə baxmayaraq nə hökumət nümayəndələri, nə də ki, Penitensiar Xidmət bundan hər hansı bir nəticə çıxarmayıb. Artıq AİP olaraq növbəti bir faciə ilə üz-üzə dayanmışıq. Penitensiar Xidmətin həkimləri görüş zamanı bizə bildirdilər ki, ola bilsin Rufullah Axundzadənin ölümünə bir neçə saat və ya gün qalıb. “ Akif bəy sonda bildirdi ki, Rufullah Axundzadə cənub bölgəsində kifayət qədər nüfuzlu və hörmətli insanlardan biridir: “Onun həbsxanada dünyasını dəyişməsi ölkədə stabilliyin pozulmasına gətirib çıxara bilər. Əlbəttə ki, bundan nəticələr çıxarılmalı və onun yerdə qalan ömrünün evimdə keçirilməsinə şərait yaradılmalıdır. ”
Sonra çıxış edən Birlik Təşkilatının sədri Vüsal Hətəmov Azərbaycan həbsxanalarının funksiyasının insanları azadlıqdan məhrumetmə yox, həyatdan təcrid etməkdən ibarət olduğunu bildirdi. Vüsal Hətəmov qeyd etdi ki, keçən il iki nəfər islamçı həbsxanada dünyasını dəyişdi: “Bu dəfə isə Rufullah Axundzadəni eyni tale gözləyə bilər. Xalqın baş qarışıb həbsdə olan şəxslərə. Baş verənlər keçiriləcək seçkilərə də ciddi şəkildə təsir göstərəcək. Yaşananlarla bağlı adam söz tapmır deməyə. Bilmirsən hansı problemdən danışasan.”
AİP-in sədr əvəzi Elçin Manafov isə çıxışı zamanı bildirdi ki, kiminsə həbsxanada günahsız yerə hətta bir saat belə yatması yol verilməzdir: “O ki, qaldı sağlam halda həbsxanaya düşüb, xəstələnən şəxslərə. Baş verənlər azadlıqda olan şəxslərə bu qədər təsir etdiyi halda, görün məhbusların özlərinə və onların ailələrinə necə təsirli olar? Bəs harada qaldı hakimiyyətin humanistliyi? Nə vaxta qədər xarici təşkilatlardan yardım istənilməlidir? Məgər özlərinin vicdanı və insafı yoxdur? İnsan deyillər bunlar? Maraqlıdır ki, nəyi gözləyirlər? Artıq Rufullah Axundzadənin sağlamlığını da əlindən almısız. Daha başqa nə istəyirsiz? Bir həftədən çoxdur ki, bir insanın taleyi sual altındadır, hələ də rəsmi reaksiya yoxdur. Prezidentin bu məsələdən xəbəri yoxdursa, onun günahıdır. Hətta bununla bağlı aksiya keçirmək lazım olarsa, belə buna gedəcəyik.”