Milli Şura Xalq Cümhuriyyətinin yolunu gedir; toplantılar davam edəcək; Rüstəm İbrahimbəyovdan önəmli mesajlar; ölkə və dünya mediasının diqqəti Gürcüstana yönəlib
İyulun 30-da Milli Şura təmsilçilərinin Tiflisdə fövqəladə toplantısı keçirildi. Öncədən xəbər verdiyimiz kimi, Milli Şuranın sədri Rüstəm İbrahimbəyovun Rusiya vətəndaşlığından imtinası hələlik qəbul edilmədiyi üçün qurum öz rəhbərinin Bakıya gəlişinin ləngiməsi haqqında qərar verib. Bu səbəbdən Milli Şuranın 15 nəfərlik nümayəndə heyətinin Milli Şura sədri ilə Tiflisdə görüşməsi qərar alınıb.

Milli Şura üzvlərinin Tiflisə avtobusla gedəcəyi xəbəri yayılsa da, sonradan fərqli marşrutlarla hərəkət etmək məqsədəuyğun sayılıb. Milli Şuranın bəzi üzvləri yola iyulun 29-da çıxıb. Qatar və avtomobillərlə yola çıxanlar Tiflisə iyulun 30-da səhər saatlarında çatıb. Müsavat başqanı İsa Qəmbər, Milli Şuranın İcra Aparatının rəhbəri Eldar Namazov, Milli Şuranın komitə sədrləri Nurəddin Mustafayev, Mehman Əliyev, Gültəkin Hacıbəyli, Milli Şura üzvləri Fuad Ağayev, Vidadi Mirkamal isə Tiflisə təyyarə ilə gəlib. Tiflisə ən gec gələnlər isə Rüstəm İbrahimbəyovla Eldəniz Quliyev oldu. Bəlli olduğu kimi, Eldəniz Quliyev bir neçə həftədir Türkiyədədir. O, Tiflisə Türkiyədən avtomobillə gəlib.

Bakı vaxtı ilə saat 15:00-da artıq Milli Şuranın toplantıda iştirak edəcək bütün nümayəndə heyəti “Vere Palas” otelinə toplaşmışdı. Qalırdı sədr Rüstəm İbrahimbəyovun gəlişi. Bir neçə günlük Avropa turnesindən Moskvaya dönən Rüstəm İbrahimbəyov Tiflisə saat 16:30-da çatmalı idi.

“Vere Palase”da sədri gözləyən Milli Şura üzvləri arasında qızğın müzakirələr gedirdi. Milli Şuranın taleyi, Azərbaycan müxalifətinin qarşıda atmalı olduğu addımlar iki-bir, üç-bir toplanan qruplarda müzakirə edilib.

“Yeni Müsavat”la fikirlərini bölüşən Milli Şuranın komitə sədri Nurəddin Mustafayev bildirib ki, Tiflis toplantısında Milli Şura qarşısında dayanan bütün suallara dəqiq cavab tapılmalıdır: “Biz bütün hallarda birliyimizi qorumaq şərti ilə durumdan ən ideal çıxış yolunu tapmalıyıq. Ümid edirəm ki, biz buna nail olacağıq. Uzun illərdən sonra Azərbaycanın demokratik qüvvələri bir aradadır. Bu birliyin qədrini bilmək və qətiyyətli addımlar atmaq vacibdir. Hakimiyyət Azərbaycan müxalifətinə qarşı aylardır açıq hücuma keçib. Ancaq biz bunların hamısını dəf etmişik. Tiflis görüşündən çox şeylər gözləyirəm. İnanıram ki, biz zaman itkisinə yol vermədən bütün gücümüzü ideyamızın gerçəkləşməsinə xərcləyəcəyik”.

Nurəddin Mustafayev bildirib ki, bu gün Azərbaycan öz həyatında yaxşılığa doğru dəyişiklik istəyir: “Əgər biz yaxın günlərdə doğru qərarlar verib xalqı öz arxamızca apara bilsək, ona vəd etdiyimiz rifahı gətirmək üçün məsuliyyətli olsaq, heç şübhə etmirəm ki, beynəlxalq birlik də bizimlə razılaşacaq. İki illik keçid dövrünü idarə edəcək şəxsin üzərinə çox ağır yük düşür. Milli Şura bu məsələdə hansı hədəfi müəyyən edibsə, onun gerçəkləşməsi üçün çalışmalıdır. Hakimiyyət heç bir halda bizə rahat imkanlar yaratmayacaq. Ancaq biz ortaya gücümüzü, israrlı tələblərimizi qoyub öz namizədimizi qeydə almağa nail olmalıyıq”.

“Vere Palace”nin foyesində ardı-arası kəsilməyən telefon zənglərinə cavab verən, imkan tapan kimi isə internetdə Milli Şuranın Tiflis görüşü ilə bağlı xəbərləri izləyən Milli Şuranın İcra Aparatının rəhbəri Eldar Namazovla da ayaqüstü söhbət etdik. Nurəddin Mustafayevdən fərli olaraq Eldar Namazov Milli Şuranın Tiflis toplantısından qurumun qərarları ilə bağlı hər hansı önəmli dəyişikliklər olmadığını dedi: “Milli Şuranın Tiflis görüşündə hansısa konkret qərarın müzakirəsindən söhbət getmir. Rüstəm bəylə bütün yaranan durumu müzakirə edəcəyik. Ümumi müzakirələrin içərisində Milli Şuranın bugünkü fəaliyyəti ilə bağlı bütün məsələlər müzakirə ediləcək. Eyni zamanda Milli Şura gələcək addımlarını müəyyən edəcək”.

Səhər saatlarında “Vere Palace” ya gəldiyimiz zaman otel təmsilçiləri bildirmişdi ki, burada Azərbaycan nümayəndə heyətinin hər hansı toplantısı nəzərdə tutulmur. Daha sonra Milli Şura üzvləri arasında belə bir xəbər dolaşmağa başladı ki, yığıncaq 1918-ci ildə Azərbaycan Milli Şurasının Azərbaycanın Xalq Cümhuriyyətini elan etdiyi tarixi zalda olacaq. Ancaq xəbər təsdiqlənmədi, bəlli oldu ki, Gürcüstan rəhbərliyi bunun üçün Azərbaycan müxalifət liderlərindən rəsmi müraciət istəyib. Bu haqda “Yeni Müsavat”a danışan Eldar Namazov dedi ki, Rüstəm İbrahimbəyov Tiflisə gələndən sonra onun imzası ilə gərəkli müraciət ünvanına çatdırılacaq: “Böyük ehtimalla iyulun 31-də Milli Şura Azərbaycanın müstəqilliyi elan edilən tarixi zalda toplantı keçirəcək”.

Eldar Namazovun telefonuna gələn zəngdən bəlli oldu ki, Rüstəm İbrahimbəyov artıq Tiflisdədir və “Vere Palace” yə doğru hərəkət edir. Onu da deyək ki, sədri qarşılamaq üçün Milli Şura üzvlərindən heç kim Tiflis Hava Limanına getməmişdi. R.İbrahimbəyovu Tiflisı gələrkən yaxın dostu olan Gürcüstanın məşhur rejissoru Eldar Şengelaya və Gürcüstanda yaşayan soydaşlarımızdan ibarət 30 nəfərlik heyət qarşılamışdı.


Saat 17 radələrində nəhayət, Rüstəm İbrahimbəyovu gətirən avtomobil “Vere Palace”yə çatdı. Avtomobildən enən Milli Şura sədrini Bakıdan gələn nümayəndə heyəti, yerli və beynəlxalq media orqanlarının təmsilçiləri qarşıladı. Milli Şura üzvləri ilə təxminən 10 dəqiqəlik salamlaşmadan sonra İbrahimbəyov onun üçün ayrılan otel otağına getdi. Bu arada onu da vurğulayaq ki, Rüstəm İbrahimbəyov yetərincə qıvraq görünürdü.

Tiflis vaxtı ilə saat 18.00-da Milli Şura üzvləri “Vere Palace” də toplantı zalına toplansa da yığıncağı başlamaq mümkün olmadı. Sədr də zala daxil olandan sonra bəlli oldu ki, Müsavat başqanı İsa Qəmbər zalda deyil. Səbəb Müsavat başqanı İsa Qəmbərin toplantı keçirilən zala gəlməməsi idi. 20 dəqiqə sonra yığıncağa qatılan İsa Qəmbər bildirdi ki, ona toplantının 18.30-da keçiriləcəyi bildirilib və o, yığıncaq zalına deyilən vaxtdan 10 dəqiqə tez gəlib.

Yığıncaq başlanan zaman jurnalistlərin zaldan görüntü almasına icazə verildi. Daha sonra toplantının qapalı keçiriləcəyi bildirilərək jurnalistlər zaldan çıxarıldı. Onu da qeyd edək ki, Gürcüstandakı yerli və beynəlxalq media Azərbaycan müxalifətinin toplantısına ciddi maraq göstərir. Çoxsaylı jurnalistlər Azərbaycan media təmsilçiləri ilə bərabər yığıncağın başa çatmasını gözləyirdilər.


Eldar Namazovun sözlərinə görə, zal 2 saatlıq icarəyə götürülüb, ancaq toplantı daha tez başa çata bilər. İsa bəyin gəlişi gözlənilən zaman jurnalistlər Rüstəm İbrahimbəyova sual vermək istəsələr də o, yumşaq şəkildə cavabdan imtina etdi: “Sual verə bilərsiz, ancaq cavab olmayacaq”.


Bir məsələn də xüsusi vurğulamağa ehtiyac var. Milli Şuranın Tiflis toplantısı başlamazdan öncə Gürcüstanda yaşayan xeyli soydaşımız Vere Palasa toplaşmışdı. Bildirək ki, ötən gün Milli Şuranın Gürcüstan nümayəndəliyinin yaradılması üçün 5 nəfərlik təşəbbüs qrupu yaradılıb. Qrup üzvləri ilə yanaşı yığıncaq zalına nə Azərbaycandan gələn nümayəndə heyətinin, nə də Gürcüstandakı soydaşlarımızın tanımadığı xeyli şəxs gəlmişdi. Azərbaycan dilində sərbəst danışan bu şəxslər oteldə foto və videogörüntü çəkirdilər. Gürcüstanda yaşayan soydaşlarmız düşünür ki, bu şəxslər Azərbaycan hakimiyyətinin maliyyə dəstəyi ilə yaradılan QHT sektorunun təmsilçiləri ola bilər.


İyulun 30-da “Vere Palace” də baş verən bəlkə də ən ilginc olay otelin sahibinin erməni olması ilə bağlı saytlardan birinin yaydığı xəbər oldu. Qeyd edək ki, xəbəri “Yeni Müsavat” ın əməkdaşının da iştirak etdiyimiz danışıqda AzTV-nin Gürcüstan müxbiri Şahismayıl Şəmmədoğlu səsləndirdi. Onun sözlərinə görə, otel sovetlər dönəmində Gürcüstanda ticarət naziri vəzifəsini tutan bir erməninindir. İndi vəfat edən həmin şəxsin otel biznesini onun övladları davam etdirir. Ancaq otel administrasiyası ilə yaratdığımız əlaqə zamanı bəlli oldu ki, xəbər tamamilə yanlışdır. Otelin sahibi də, direktoru da gürcüdür. Otel sahibinin adı Manana Şaraşidze, direktorunun adı isə Simon Qapanadzedir.


Milli Şuranın toplantısından sonra keçirilən brifinq haqda sabahkı “Yeni Müsavat”dan xəbər əldə edə bilərsiniz.