Hafiz Hacıyev “Pənah Hüseyn” deyir, Araz Əlizadə onları artıq tanıyır, Cəmil Həsənli ümumi konturları cızıb
Tarixin bütün dövrlərində dövlətlər və ya imperiyalarda siyasi hakimiyyət uğrunda mübarizə aparılıb. Zamanın şərtlərindən və diktəsindən asılı olaraq hakimiyyəti ələ almağın metodlarında dəyişikliklər baş verib. Tarix dərslərindən görürük ki, bir zamanlar güc yolu ilə hakimiyyətə sahib olmaq tendensiyası demək olar ki, əksər ölkələrin siyasi mübarizə mexanizminin tərkib hissəsi olub. Güc amili elə indi də, bəzi ölkələrdə müşahidə olunur. Ancaq XXI əsrdə bu, hakimiyyət kürsüsü uğrunda sivil və hüquqa uyğun olaraq mübarizəyə kölgə sala bilməz. Zor tətbiq etmək dövründən ağıl mərhələsinə qədəm qoyan dünya siyasi müstəvisinin aparıcı fikir adamları artıq ideoloji üsul və vasitələrlə hakimiyyətə yiyələnmək variantını daha üstün tuturlar. Çünki müasir dövrdə bu metod iqtidara yiyələnməyin əsas komponentlərindən biridir. Bu mənada xalq seçkisi yolu ilə ölkə rəhbərini təyin etmək də qloballaşan dünya siyasi tarixinin aparıcı xəttidir. Dövlətə rəhbər seçildikdən sonra isə əsas məsələ hakimiyyət komandasını formalaşdırmaqdır.

Azərbaycanda da 2013-cü il oktyabr ayının 9-da keçiriləcək prezident seçkiləri məhz qanunvericiliyə müvafiq qaydada rəngarəng siyasi mənzərə və mübarizə üsulları ilə müşahidə olunur. 10 nəfər namizədin mübarizə apardığı seçkidə qalib tərəfin hansı partiya və ya siyasi fiqur olmasından asılı olmayaraq, həmin şəxslərin hakimiyyət komandasında kimlərin yer alacağı maraq doğurmaya bilməz. Bir az da dəqiqləşdirsək, namizədlərin kölgə kabinetində nazir və digər məmur postlarına təyinatlar proqramı cəmiyyət üçün də vacibdir. Qeyd etmək yerinə düşər ki, Azərbaycan Konstitusiyasına görə, yeni seçilmiş dövlət başçısı səlahiyyətlərini icra etməyə başladığı gündən Nazirlər Kabineti istefa verir.

Görəsən bizim prezidentliyə namizədlərimiz hakimiyyətə gələcəkləri təqdirdə kadr siyasətini necə formalaşdıracaqlar? Modern.az saytı mövzu ilə bağlı araşdırma aparıb.

İqbal Ağazadə: “Seçkini udandan sonra qərar verəcəyəm”

Ümid partiyasının sədri, millət vəkili İqbal Ağazadə məsələ barədə seçkini udacağından sonra qərar verəcək. Bu barədə özü danışan İ.Ağazadə fikirləşir ki, hələ kifayət qədər vaxt var.

“Bu məsələ danışıqlardan, hakimiyyətin içərisində olan qüvvələrin peşəkarcasına bəzi dəyərləri və prinsipləri qəbul etməsindən asılı olan bir məsələdir”. Prezidentliyə namizədin sözlərinə görə, partiyada kölgə kabineti ilə bağlı hər hansı bir müzakirə də aparılmayıb. O, ümumiyyətlə ad çəkməkdən də imtina edib.

BAXCP: “Konkret komanda haqda təsəvvürlərimiz var”

Bütöv Azərbaycan Xalq Cəbhəsi Partiyasından (BAXCP) prezidentliyə namizəd, millət vəkili Qüdrət Həsənquluyev təkcə partiya daxilindəki tərəfdarlarını deyil, cəmiyyətdəki ayrı-ayrı tanınmış simaları da öz hakimiyyət komandasına cəlb etmək niyyətindədir. Bu haqda BAXCP-nin səlahiyyətli nümayəndəsi Elçin Mirzəbəyli məlumat verib. O, ad çəkməsə də bildirib ki, konkret komanda haqda təsəvvürləri var.

Fərəc Quliyev: “Yaxın zamanda elan edəcəyəm”

Milli Dirçəliş Hərəkatı Partiyasının sədri, millət vəkili Fərəc Quliyevin də idarəetmə sistemi ilə bağlı proqramı var. “Söhbət konkret şəxslərdən də getmir”-deyən F.Quliyevin sözlərinə görə bu proqram yaxın zamanlarda elan olunacaq.

İlyas İsmayılov bu barədə düşünmür

Ədalət Partiyasından prezidentliyə namizəd, Milli Məclisin deputatı İlyas İsmayılov hakimiyyət komandasında kimlərin təmsil olunması haqda indi düşünmür. O, seçkidən sonra qərar verməyi planlaşdırır.

ADP: “Komandamın 30 faizini indiki hakimiyyətdə təmsil olunan şəxslər təşkil edəcək”

ADP sədri Sərdar Cəlaloğlu digər rəqiblərinə nisbətən daha konkret danışıb. “Mənim hakimiyyət komandamın 40 faizini öz partiyamızın üzvləri, 30 faizini demokratik müxalifətin nümayəndələri, 30 faizini isə indiki hakimiyyətdə təmsil olunan şəxslər təşkil edəcək. Komandada bu faizlərlə yerlər müəyyən edəcəyəm”-deyən S.Cəlaloğlu bununla bağlı adlarını çəkdiyi tərəflərə təklif edəcəyini bildirib.

Araz Əlizadə: “Vəzifə vercəyim şəxslərin hamısını tanıyıram”

ASDP sədri Araz Əlizadə siyasi mənsubiyyətindən asılı olmayaraq peşəkarlardan ibarət bir komanda formalaşdırmağı arzu edir. “Bu peşəkarlar Azərbaycanda var. Hamısını da tanıyıram”. Buna baxmayaraq A.Əlizadə məsələ ilə əlaqədar heç bir danışıq aparmadığını da etiraf edib. O həmçinin əlavə edib ki, iqtidara gəlməsi sosial-demokratların hakimiyyətdə tam olaraq özünə yer tutması anlamına gəlmir.

Hafiz Hacıyev: “Öz komandamda Pənah Hüseyni görmək istəyirəm”

Müasir Müsavat Partiyasının sədri Hafiz Hacıyev isə prezident olacağı təqdirdə məğlub olacaq digər namizədləri kənarda qoymaq istəmir. Onun sözlərinə görə, kölgə kabinetində bugünkü hakimiyyətin tərkibində olan sağlam qüvvələr yer alacaq. Nə qədər qəribə səslənsə də H.Hacıyev Milli Şuranın namizədini də öz hakim dairəsində görmək istəyir.
“Mənim fikrim var ki, bugünkü prezidentliyə namizədlərin əksəriyyətindən istifadə edim. Milli Şuranın namizədi Cəmil Həsənlini universitetlərin birinə ya rektor, ya da kafedra müdiri qoymaq istəyirəm”-deyən H.Hacıyev vurğulayıb ki, namizədlər sırasında baş prokuror olmağa layiq insanlar da var. Yəqin ki, Hafiz müəllim bununla deputat İlyas İsmayılovu nəzərdə tutub.
“Eyni zamanda Elçibəy hakimiyyəti dövründə də layiqli kadrlar olub. Mən öz komandamda Pənah Hüseyni də görmək istəyirəm. Onu gücü çatıb icra edə biləcəyi vəzifəyə təyin edəcəyəm. Mən partiyada da kollektivin təşkili barədə tapşırıq vermişəm”.

Cəmil Həsənli: “Bu barədə müəyyən tezislər var”

Milli Şuranın vahid namizədi Cəmil Həsənlinin mətbuat xidmətinin rəhbəri Oqtay Güləliyev bildirib ki, hələlik konkret adlar üzərində bir müzakirə aparılmayıb. “Bu barədə müəyyən tezislər var və təxmini konturlar var”-deyə C.Həsənlinin rəsmi nümayəndəsi qeyd edib.

Zahid Oruc: “Əsas ideyadır”

Öz təşəbbüsü ilə prezidentliyə namizədliyi irəli sürülmüş millət vəkili Zahid Orucun cavabı belə olub: “Biz seçkilərə ideyalarımız qazansın, fikirlərimizi, mesajlarımızı cəmiyyətə çıxaraq, onlar ictimai rəydə möhkəmlənsin deyə qatılmışıq. Buna adekvat hərəkətlərimiz də var. Biz praqmatik bir mövqenin sahibiyik. Komanda quruculuğu və konkret adlar üzərində işləməmişik. Bəlli bir məqsədimiz də yoxdur. Adlar, soyadlar şərti xarakter daşıyır. Ən vacibi ölkənin gələcək həyatında milli maraqlara müvafiq komandanın formalaşmasıdır”.