Universitetdə baş verən qanunsuzluq araşdırılır; Nadir Qəhrəmanov “vurulacaq”
GündəmXəbər.az saytının verdiyi bilgiyə görə Sumqayıt Dövlət Universiteti artıq neçə illərdir ki, ölkə mətbuatının sözün mənfi mənasında daha çox diqqət ayırdığı təhsil ocaqlarındandır. Bu isə təsadüfi olmayıb və burada yaşanan qanunsuzluq və korrupsiya faktları ilə birbaşa bağlıdır. SDU-da baş verən şok olaylarla bağlı redaksiyamıza yeni informasiyalar daxil olub. Elə bu məqalənin ərsəyə gəlməsi də məhz həmin faktlara işıq salmaq ehtiyacından irəli gəlib. Bu haqda bir qədər sonra daha ətraflı bəhs edəcəyik…
Xatırladaq ki, SDU 13 iyun 2000-ci ildə ümummilli liderimiz Heydər Əliyevin fərmanı ilə Azərbaycan Sənaye İnstitutunun bazasında yaradılmışdır. 2000-ci ildə burada baş verən özbaşınalıq, rüşvətxorluq, maliyyə yeyintiləri Təhsil Nazirliyini qəti tədbirlərə əl atmağa məcbur etdi. Rektor dəyişdirildi, bir çoxları həbs edildi. Lakin rektorun dəyişməsi də universitetin normal vəziyyətə saxta diplom verilməsi, maliyyə yeyintiləri hallarının dayanmasına təsir etmədi.
“Gələn gedənə rəhmət oxutdular” prinsipi SDU-da da keçərli oldu. Görmədiyi günə düşən Nadir Qəhrəmanov birdən-birə varlanmağa başladı. Villalar, şadlıq evləri, bahalı maşınlar, binaları, zinət əşyaları rektoru çaşdırdı. Ona göstərilən etimaddan daha çox öz şəxsi maraqları üçün çalışan N.Qəhrəmanovun universitetdəki özbaşınalığı son dövrdə daha dözülməz həddə çatıb.
Əslində korrupsiya, rüşvətxorluq elementləri bütün ali məktəblərdə qismən mövcuddur. Fərq etməz az və ya çox. Amma SDU-da rüşvətxorluq elə geniş şəkildə kök atıb ki, bunun birbaşa Qəhrəmanovlara xidmət etməsinə şəkki-şübhəniz olmasın. Hər il imtahan sessiyası zamanı rektor öz pulu ilə müxalifət qəzetlərində müxtəlif həqiqətə uyğun olmayan yazılar dərc etdirməklə aidiyyatı qurumların fikirlərini əsas məsələlərdən, şikayətlərdən, korrupsiya, rüşvətxorluq hallarından, qanunsuz əməllərindən, maliyyə maxinasiyalarından məharətlə yayındırmağı bacarırdı. Məsələn, Arif Paşayevlə qırılmaz tellər, Ramiz Mehtiyevlə sıx əlaqələrinin olması, H.Əliyev Fonduna pul köçürmələri, Rəfiqə Əliyavanın onu rektor qoydurması, ulu öndər H.Əliyevlə ailələrinin yaxınlığı və sair.
Mətbuata diqqətlə nəzər salsanız görərsiniz ki, bu məsələlər kütləvi şəkildə qabardırılır. Hər yerdən sığortalanıb. Təhsil Naziri Misir Mərdanovda hər şeydən bəlli olduğu üçün fürsətdən istifadə edərək hamını qəti şəkildə inandırıb ki, Prezidentin Sumqayıt Dövlət Universitetində gedən qanunsuzluqlardan, rüşvətxorluq, korrupsiya və maliyyə maxinasiyalarından xəbəri var. Ona görə də heç bir icra başçısı Nadir Qəhrəmanovla bacara bilmir. Prokurorluq və dövlət təhlükəsizliyi orqanları keçmiş nazirin sözlərini əsas tutaraq ona baş qoşmaq belə istəmirlər. Bir sözlə, balansı qorumağa üstünlük verirlər.
Ən maraqlısı budur ki, Tələbə Qəbulu Üzrə Dövlət Komissiyasının xəbəri olmadan SDU-da birbaşa 2-ci kursa kütləvi şəkildə tələbə qəbulu aparılıb. Rusiyanın bir çox ali məktəblərindən köçürmə yolu ilə SDU-ya qəbul olan tələbələr köçürüldükləri ali məktəblərin adlarını belə bilmirlər. Məsələn Quliyeva Səbinə Zahid qızı və Alıyeva Leyla Zahid qızı kimya fakültəsinin biologiya ixtisasına 39.7 qrupuna qəbul olunublar.
Redaksiyamıza SDU-da baş verənlərlə bağlı daxil olan yeni faktlar isə daha dəhşətlidir. Daxil olan məlumatlarda bildirilir ki, SDU-nun elmi işlər üzrə prorektoru Yadigar Hüseynov SDU-da baş verən bütün əxlaqsızlığın əsasını təşkil edən şəxslərdəndir. Belə ki, SDU-da bütün kafelərə, yeməkxanalara elmi işlər üzrə prorektor rəhbərlik edir. İddia olunur ki, bunun səbəbi isə odur ki, o bu obyektlərdə öz adamları vasitəsilə alkoqollu içkilərin satışına nəzarəti həyata keçirir. Bundan başqa SDU-nun sabiq tərbiyyəvi işlər üzrə prorektor Həqiqət Aslanovun qanunsuz olaraq işdən çıxarılmasında və dolayısı ilə ölümünə səbəb olmasında da Y.Hüseynovun çox böyük xidmətləri olmuşdur. Belə ki, mərhum Həqiqət Aslanov hər zaman əməkdaşların qarşısında Yadigar Hüseynovun çirkin əməllərini ifşa edirdi. Elə bütün bunlara görə də o işdən uzaqlaşdırıldı.
SDU-da elmi işlərin təsdiq edilməsi üçünYadigar Hüseynov 1000 (min) manat almasa bu işi baş tutmuş saymaq olmaz. Bütün bunlardan isə çıxan nəticə budur ki, Y.Hüseynov bu gün SDU-dakı korrupsiya maşınının əhəmiyyətli hissələrindən birinə çevrilməyi bacarıb. Bütün bunlardan başqa Y.Hüseynov tələbələrin rüşvət yoluyla qiymət almasına, saxta yolla ixtisasdan ixtisasa keçirilmələrinə də şəxsən rəhbərlik edir. SDU-da prorektor həmkarlarını və dekanları şantaj yoluyla öz tabeçiliyində saxlayır. Bütün bunlarla bağlı Təhsil Nazirliyinə, hüquq-mühafizə orqanlarına çoxsaylı şikayətlərin edilməsinə baxmayaraq universitetdə baş verənlərlə bağlı hələ də təsirli tədbirlər həyata keçirilmir.
SDU-dan daxil olan şikayətlərdə isə ən dəhşətli və dözülməz məqam tələbələrə qarşı əxlaqsız təkliflərin edilməsidir. Bunun təsdiqi kimi bu günlərdə Azerinfo.org saytında yer almış bir informasiyanı olduğu kimi diqqətinizə çatdırmaq istəyirik: “Sumqayıt Dövlət Universitetinin bir qrup tələbəsi saytımızın elektron ünvanına bu təhsil müəsissəsində baş verənlərlə bağlı məktub ünvanlayıb. Tələbələr universitetdə əsl biabırçılığın hökm sürdüyünü iddia edirlər.Pul yığımının başında isə Universitetin elmi işlər üzrə prorektoru Yadigar Hüseynov və qiyabi təhsil üzrə prorektor Qafar Ramazanov durur. Tələbələr təhsil nazirindən bir neçə gün öncə keçirilən iclasda Zəngilan rayonundan məcburi köçkün olan tələbə qızı açıq şəkildə küçə söyüşləri ilə təhqir edən Nadir Qəhrəmanovun əməlləri barədə ölçü götürülməsini tələb edirlər. Tələbələr məktublarında iddia edirlər ki, rektor Nadir Qəhrəmanov katibəsi vasitəsilə məcburi köçkün olan xanıma əxlaqsız təklif edib. Lakin rədd cavabı alan rektor tələbəni universitetdən qovdurub. Artıq iki gündür ki,bir qrup tələbə etiraz olaraq dərslərə girmirlər”.
SDU-nun rektoru və azğınlaşmış prorektorlar isə bu fakt təsdiqlənəcəyi halda ən ağır cəzaya layiqdirlər. Bununla bağlı redaksiyamıza daxil olan özəl məlumatda bildirilir ki, baş vermiş bu insidentlə bağlı iki gün öncə SDU-nun rektoru Nadir Qəhrəmanov Milli Təhlükəsizlik Nazirliyinə çağırılıb və bu işlə bağlı hazırda araşdırmalar davam etdirilir. Ümumiyyətlə isə SDU-da baş verən bütün neqativ hallarla bağlı ciddi tədbirlərin görülməsi və hətta rektor Nadir Qəhrəmanovun tutduğu vəzifədən azad ediləcəyi gözlənilir.
Xatırladaq ki, tələbələrə və əməkdaşlara əxlaqsız təkliflər SDU üçün nadir hadisə sayılmamalıdır. Belə ki, bir müddət öncə rektorun katibəsi işləmiş Əminə adlı gənc qız ona edilən təkliflə bağlı məhkəməyə müraciət etsə də, bununla bağlı hər hansı tədbir görülmədi. Əksinə həmin xanım ictimai qınağa hədəf seçildi.
Bütün bunlar öz yerində. Amma SDU-nun basılıca problem korrupsiya və rüşvətxorluqdur. Məlumat üçün bildirək ki, Təhsil Nazirliyi bir müddət öncə universitetdə maliyyə yoxlamalarına start verib. Əldə etdiyimiz məlumatlarda o da vurğulanır ki, TN-nin həyata keçirdiyi yoxlamalarda müəyyən olunan maliyyə qanunsuzluqları, saxta köçürmələr Baş Prokurorluq yanında Korrupsiya qarşı Mübarizə İdarəsinə veriləcək. Daxil olan məlumata görə, bir neçə həftə bundan öncə rektor Nadir Qəhrəmanov labüd həbsdən canını qurtarmaq üçün “yuxarılar”a dəyəri milyonlarla ölçülən rüşvət verib. Bununla belə, rektorun canını tam qurtardığını düşünmək də olmaz. Hər halda onun yaxın günlərdə istefaya göndəriləcəyi ehtimal olunur.
Samir