Deputatın Bakıda və İsmayıllıda biznes obyektlərinin olduğu deyilir

gundemxeber.az Son günlər bir sıra deputatların adı ölkədə baş verən bir çox hadisələrdə və müxtəlif qalmaqallarda hallanır. Belə ki, Gülər Əhmədova ilə bağlı yayılan məlum videogörüntülər və deputat, yazıçı Hüseynbala Mirələmovun qardaşı oğlunun ona məxsus istirahət mərkəzində kriminal hadisə törətməsi, eləcə də deputat Nəriman Əliyevin Masallıda əhaliyə məxsus torpaqları zəbt edərək özünə biznes qurması bir çox deputatların onsuz da yaxşı olmayan imicinə daha da zərbə vurub.
Onsuz da xalqın problemlərini Milli Məclisdə qaldırmaq əvəzinə sifarişli və hazır layihələrə səs verən deputatların kimə və nəyə xidmət etməsi çoxdan bəlli idi. Sadəcə, baş verənlər bu prosesi praktik olaraq bir daha təsdiq etdi. Bütün bunlarla yanaşı cəmiyyətdə ən çox danışılan məsələlərdən biri də milyonlar xərcləyərək deputat mandatı alan bir sıra şəxslərin bu mandatdan istifadə edərək ya özlərinə böyük biznes imperiyası qurması, ya da bunun hesabına biznes şəbəkələrini qorumasıdı.
Qanunvericiliyə görə, deputat seçilmiş şəxs heç bir biznes fəaliyyəti ilə məşğul ola bilməz. Ancaq Azərbaycanda millət vəkillərinin əksəriyyətinin iş adamı və biznesmen olduğu heç kəsə sirr deyil. Baxmayaraq ki, Milli Məclis sözçülərinin rəsmi açıqlamalarında millət vəkillərinin bizneslə məşğul olması təkzib edilir.
Ancaq Əsabil Qasımov, İqbal Məmmədov, Cavanşir Feyziyev, Xanlar Fətiyev, Malik Həsənov, Fərhad Qəribov, Rüfət Quliyev, Əhməd Vəliyev, Astan Şahverdiyev, Ərəstun Cavadov və digər deputatların açıq biznes fəaliyyəti ilə məşğul olmalarına dair təkzib olunmaz faktlar var.
Müqayisə üçün deyək ki, deputatların bizneslə məşğul olmasına Azərbaycandan fərqli olaraq bir sıra ölkələrdə ciddi etirazlar var və sərt tədbirlər görülür. Məsələn elə bir neçə ay əvvəl Rusiyada deputat Gennadi Qudkovun biznes fəaliyyəti ilə məşğul olması əsas gətirilərək onun deputat mandatı əlindən alındı. Azərbaycanda isə deputatın biznesinin olması sanki bir normaya çevrilib.
Bu günlərdə gunxebər.com daha bir deputatın biznes imperiyası ilə bağlı məlumat dərc edib. Bu şəxs 17 saylı Yasamal üçüncü seçki dairəsini təmsil edən deputat Ülvi Quliyevdir. Bildirilir ki, deputat Bakıda böyük biznes şəbəkələri yaratmaqla məşğuldur. Ancaq o, bu obyektlərini yaxın adamlarının adına sənədləşdirilir. Özü isə demək olar ki, vaxtaşırı bu obyektlərə baş çəkir, bir obyektlərdən gələn gəlirin hesabatını aparır.
Verilən məlumatda bildirilir ki, metronun “Nərimanov” stansiyasının yaxınlığındakı “Qala” restoranı da məhz deputat Ülvi Quliyevə məxsusdur. “Qala” sözügedən ərazidə ən elitar və ən baha restoran sayılır. Bu barədə redaksiyamıza göndərilən məlumatda bildirilir ki, deputatın Yasamal rayonu ərzazində də bir neçə super-marketi və kafesi var. Bundan başqa, onun Bakıda böyük bir restoranı almaq iddiasında olduğu da bildirilir. Məlumatda o da vurğulanır ki, deputatın biznes obyektləri təkcə Bakı şəhəri ilə məhdudlaşmır. Onun İsmayıllı rayonunda da biznes obyektləri var. Ancaq deputatın bu obyektlərdə başqa iş adamları və vəzifəli şəxlərlə ortaq olduğu deyilir.
Xatırladaq ki, deputat Ülvi Quliyev həm də Azərbaycan Karate-do Federasiyaları Assosiasiyasının prezidentidir.
Zaur