“Müxalifətin ölkənin heç bir problemi ilə bağlı ortaq mövqeyi yoxdur”

“Bu toplantıdan müxalifətin davamlı və uzunmüddətli birgə fəaliyyəti ilə bağlı qərar çıxacaqsa, bu, artıq ən böyük naliyyət olacaq”

“Azərbaycanda bəlli siyasi qüvvələr var ki, onların qabağına Azərbaycan müxalfətinin bir araya gəlməsinə imkan verməmək tapşırığı qoyulub”

Keçmiş daxili işlər naziri, AMDP sədri İsgəndər Həmidovun təşəbbüsü ilə keçiriləcək “Müxalifətin zirvəsi”nə bir neçə gün qalır. Dekabrın 25-də saat 12:00-da KXCP-nin qərargahında təşkil olunacaq zirvə görüşünə dəvət olunan partiya sədrlərinə, tanınmış siyasətçilərə artıq dəvətnamələr göndərilib.
Bu barədə açıqlama verən İ.Həmidov siyasətçilərlə bir-bir görüşdüyünü söyləyib: “Görüşlərimiz davam edir. Dəvətnamələrin artıq demək olar ki, əksəriyyəti paylanılıb. Dəvətnamələrdən başqa dəvətlilərlə fərdi görüşlərə də ciddi üstünlük veririk... Ayın 25-də saat 12:00-da hər kəsi dəyirmi masa ətrafında görmək istəyirik. Hər kəs gəlib öz fikirlərini deyəcək. Bu, bir toplantıdır. İşlərin normal getdiyini düşünürük. İndiyə qədər dəyirmi masa ilə bağlı elə siyasətçi olub ki, onunla dörd dəfə görüşmüşəm. O, məni inandırır, mən də onu”.
Bir neçə gün öncə, “Müxalifət zirvəsi” ilə bağlı məlumat yayan tanınmış jurnalist Əvəz Zeynallı isə özünün sosial şəbəkə hesabında qeyd edib ki, sözügedən görüşün məqsədi “Azərbaycanda ictimai-siyasi vəziyyət və müxalifətin vəzifələri” mövzusunda müzakirələr aparmaqdır. Ə. Zeynallının sözlərinə görə, zirvə görüşünə İsgəndər bəyin özü də daxil olmaqla 36 siyasətçi dəvət olunacaq.
Toplantıya dəvət olunanların siyahısı belədir:
İsgəndər Həmidov, Pənah Hüseyn, Əli Kərimli, Cəmil Həsənli, İsa Qəmbər, Sərdar Cəlaloğlu, Arif Hacılı, İqbal Ağazadə, Əli Əliyev, Tural Abbaslı, İlqar Məmmədov, Qubad İbadoğlu, Mirmahmud Mirəlioğlu, Əhməd Oruc, Fuad Əliyev, Elşad Musayev, Nəsir Ağayev, Etibar Məmmədov, Arzuxan Əlizadə, Lalə Şövkət Hacıyeva, Əvəz Temirxan, Nemət Pənahlı, Rahim Qazıyev, Hacıbaba Əzimov, İlyas İsmayılov, Sülhəddin Əkbər, Sabir Rüstəmxanlı, Rafiq Turabxanoğlu, Vaqif Hacıbəyli, Qulamhüseyn Əlibəyli, Ağasif Şakiroğlu, Mətləb Mütəllimli, Eldar Namazov, Valeh İbadov, İxtiyar Şirin.
Ancaq müxalifətin zirvə toplantısında kimlərin iştirak edib-etməyəcəyi suallar doğurur. Çünki artıq siyahıda olan şəxslərin bəziləri tədbirə qatılmayacağını açıqlayıb. Bir neçə gün öncə Vətəndaş və İnkişaf Partiyasının sədri, xalq şairi Sabir Rüstəmxanlı mətbuata açıqlama vermişdi ki, belə tərkibdə hər hansı görüşə qatılmaq fikrində deyil: “Bu tərkibdə əvvəllər çox görüşlər keçirilib, heç bir nəticəsi isə olmayıb”.
Bundan sonra isə REAL-ın icra katibi Natiq Cəfərli bu tədbirə qatılmayacaqlarını açıqlamışdı ki, indiyə kimi müxalifətin 11 birliyi olub, heç biri də uğurlu olmayıb.
Göründüyü kimi, müxalifətin zirvə görüşünə qatılmayan müxalif siyasilər də olacaq. Bu cür hallar isə Azərbaycan müxalifətinin vahid bir güc kimi birləşməsinə maneələr yaradır ki, bundan itirən həm müxalifət, həm də xalq olacaq.
İsgəndər Həmidovun təşəbbüsü ilə keçiriləcək “Müxalifətin zirvəsi” ilə bağlı Azərbaycan Demokrat Partiyasının sədri Sərdar Cəlaloğlu “Hürriyyət”ə dedi ki, onlara hələlik rəsmi dəvət gəlməyib: “Amma Pənah bəy mənə deyib ki, dəvət olunacaqsan. Mən də tədbirdə iştirak edəcəm”.

“Bu vaxtında həyata keçirilən bir təşəbbüsdür”

“Biz müxalifətin birliyi olmamasına görə kifayət qədər vaxt uduzmuşuq. Azərbaycan müxalifətinin ölkənin heç bir problemi ilə bağlı ortaq mövqeyi yoxdur. Təxminən 2009-cü ildən bu tərəfə demək olar ki, Azərbaycan müxalifəti tamamilə dağınıq fəaliyyət göstərir. Müxalifətin heç bir məsələ ilə bağlı ortaq mövqeyi yoxdur. Ayrı-ayrı partiyaların mövqeyi isə müxalifətin ümumi mövqeyi ilə münasibətdə xaric üçün də, ölkə ictimaiyyəti üçün də bir o qədər əhəmiyyət kəsb etmir. Ona görə də bu vaxtında həyata keçirilən bir təşəbbüsdür. Mən belə düşünürəm ki, müxalifət təcili bir araya gəlib, ən azı Qarabağla, ölkədəki ictimai siyasi durumla və yaranmış vəziyyətdən çıxışla bağlı ortaq möve ortaya qoymalıdır. Baxın, istər keçmiş SSRİ respublikaları, istərsə də dünyada müxalifət bir araya gəlir. Azərbaycanda müxalifətin bir araya gəlməsi artıq hakimiyyətin dəyişilməsinə görə ciddi bir problemə çevrilib. Bu da müxalif liderlərin bilavasitə məsuliyyətsizliyidir. Dünənə qədər heç bir birliyi yaxına buraxmayanlar İsgəndər Həmidovun bu ideyası ortalığa çıxandan sonra guya, yeni bir birlik təşəbbüsü ilə çıxış edirlər. Biz də bilirik ki, bu birlik təşəbbüsü edən adamlar, əksinə, bir-biri ilə düşmən münasibətdədir. Onların birliyi heç vaxt real birlik ola bilməz. Amma ümumi birliyi pozmaq üçün dərhal qollarını çırmayıb, bu işə girişirlər. Bu da onu göstərir ki, Azərbaycanda bəlli siyasi qüvvələr var ki, onların qabağına Azərbaycan müxalfətinin bir araya gəlməsinə imkan verməmək tapşırığı qoyulub”, - deyə ADP sədri vurğuladı.

“O partiyalar güclərini itiriblər”

S.Cəlaloğlunun fikrincə, müxalifətin birliyinin yaranması üçün hələ tələsməməlidirlər: “Bu, hələ ki, təşəbbüsdür. Bu müzakirələrdə ortalığa çıxacaq ki, kimin müxalifətin birliyi istiqamətində hansı cəhdləri var. Bilirsiniz ki, müxalifət pariyaları arasında çox ciddi aşılanma gedir, böyük ziddiyyətlər var. Müxalif partiyaları bir-birinə qarşı çox ciddi ittihamlara malikdirlər. Ona görə də mən düşünürəm ki, tələcmək lazım deyil. Kimlər ki, bir yerdə ola bilər, bir yerdə olmalıdr və bu işi davam etdirməlidir. Biz indiyə kimi belə mövqe tuturduq ki, hansısa partiyalar da bu birlikdə olsun. Bir halda ki, onlar özlərinin birlikdə olmalarına imkan vermirlər, deməli, o partiyları artıq belə birliklərə dəvət etməyə də ehtiyac yoxdur. Onsuz o partiyalar da əvvəlki kimi bir o qədər də Azərbaycanda ictimai siyasətə təsir etmək imkanına malik deyillər və güclərini itiriblər. Ona görə, onların bu birliklərə qoşulub-qoşulamaması da əhəmiyyət kəsb etmir”.

“Heç vaxt İlqar Məmmədov, Əli Kərimli, Arif Hacılı bir araya gələ bilməz”

“Mətbuatda da müzakirə olunur ki, AXCP sədri Əli Kərimli, Müsvat Partiyasının sədri Arif Hacılı və REAL Partiyasının sədri İlqar Məmmədov birlik yaratmaq istəyir. Ancaq REAL-ın sözcüsü Azər Qasımlı “Hürriyyət”ə demişdi ki, ortada belə bir şey yoxdur” dedikdə isə S. Cəlaloğlu belə dedi: “Mən demədim birlik yaratmaq istəyirlər. Mən dedim ki, birlik yaratmaq görüntüsünə cəhd edirlər. Çünki dərhal ortalığa alternativ bir təşəbbüs qoydular. Əli Kərmli getdi Arif Hacılı, İlqar Məmmədov ilə şəkil çəkdirdi. Sonra da birlikdə bəyan etdilər ki, biz İsgəndər Həmidovun təşəbbüsünə qoşulmayacağıq. Yəni xalq desə niyə qoşulmursunuz, desinlər ki, bizim öz təşəbbüsümüz var. Əslində, yalançı bir alternativ təşəbbüs irəli sürməklə faktiki olaraq o ümumi təşəbbüsdən imtina etdilər və özlərinə bəraət vermək üçün belə bir addım atdılar. Təbii ki, heç vaxt İlqar Məmmədov, Əli Kərimli, Arif Hacılı bir araya gələ bilməz. Bir araya gələcəklərsə, yalnız bir-birini məhv etmək üçün bir araya gələ bilərlər. Biz bilirik ki, İlqar Məmmdovun Əli Kərimliyə, Əli Kərimlinin Müsavat Partiyasının sədri Arif Hacılıya münasibəti necədir. Bu münasibətlər heç vaxt dəyişməyəcək. Buna görə də düşmənlərin mehribançılığı sadəcə olaraq ölkədə real bir müxalif gücün yaranmasının qarşının alnması üçün atdıqları bir addımdır. Başqa heç cür bunu dəyərləndirmək olmaz”.

“Demokartik mübarizədə fəaliyyətin özü artıq naliyyətdir”

“Müxalifət liderlərin bu birliyinin perspektivi varmı” sualına S.Cəlaloğlu belə cavab verdi: “Mahatma Qandinin bir gözəl sözü var: “Biz heç heç vaxt prespektiv haqqında düşünməməliyik, biz ancaq fəaliyyət haqqında düşünməliyik”. Mən bu yaxınlarda “Hüriyyət” qəzetində demokratik mübarizənin fəlsəfəsi ilə bağlı geniş bir məqalə yazmışdım. Orada yazmışdım ki, demokratik mübarizədə “ya fəaliyyət, ya ölüm” şüarı olmalıdır, “ya qələbə, ya ölüm” şüarı yox. Siz dediyiniz nəticəyə hesablanan prespektiv zorakı mübarizə üsulları ilə əldə olunur. Məsələn, partizan hərəkatı, silahlı müqavimət, radikal müxalifətçilk və konkret məqsədə çatmaq üçün nəsə edirsən. Amma demokartik mübarizədə fəaliyyətin özü artıq naliyyətdir. Bu baxımdan, yaranacaq müxalif mərkəz daimi fəaliyyət göstərəcəksə, bunun özü artıq o perspektivdir. Çünki naliyyətlərin əldə edilməsi o demək deyil ki, sən hər şeyi başa vurdun, qurtardın. Vaxtilə Azərbaycan Xalq Cəhbəsi də hakimiyyətə gəlmişdi. Cəmisi 6 ay nailiyyət əldə etdi. Yəni hələ nailiyyəti əldə etmək o demək deyil ki, sən hər şeyi başa vurdun, qurtardın. Bu baxımdan, demokratik mübarizə üçün fəaliyyətin özü önəmli olduğuna görə, bu toplantıdan müxalifətin davamlı və uzunmüddətli birgə fəaliyyəti ilə bağlı qərar çıxacaqsa, bu, artıq ən böyük naliyyət olacaq”./Hurriyyet.org