“İlham Əliyevin Moskvaya səfər etdiyini bütün dünya bilir”
“Milli Şuradan bir namizəd olmalıdır və o da sona qədər qalmalıdır”
Milli Şuranın sədri və prezidentliyə namizədi Rüstəm İbrahimbəyovun Rusiya vətəndaşlığından imtina prosesinin sürətləndirilməsiylə bağlı yeni təşəbbüslər göstərilir. Hazırda bu istiqamətdə son yeniliklərin nədən ibarət olduğunu elə R.İbrahimbəyovun özündən soruşduq və fürsətdən istifadə edərək ona gündəmdə olan digər sulları da ünvanladıq:

- Proses sürətlənib, işlər gedir. Məncə, daha da sürətlə gedəcək. Bu istiqamətdə şəxsi əlaqələrimdən də istifadə edirəm.

- Seçkinin keçiriləcəyi günü bir həftə əvvələ çəkdilər. Bir çox ekspertlər bu addımı təsadüfi saymır və məqsədin Milli Şuraya seçkidə problem yaratmaq olduğunu vurğulayır. Sizin, mövqeyinizi bilmək istərdik.

- Mən hazırda təəccüblənirəm - bu iqtidarın əlində hər şey var, inzibati resurslara, maliyyə imkanlarına, seçkiləri saxtalaşdırmaq təcrübəsinə sahibdir, bəs nədən bu dəfə bu qədər qorxuya düşüb?

Bunu hamı qeyd edir ki, hakimiyyət 2013-cü il seçkilərində böyük qorxuya düşüb, təşviş keçirir, faktiki çabalayır. Bunun səbəbi sadədəir. Hakimiyyət görür ki, xalqın ona münasibəti olduqca mənfidir. Biz hakimiyyətin törətdiyi cinayətlərdən tam məlumatlı deyilik. Bu istiqamətdə nəsə bilsək də, bilmədiklərimiz də var. Amma hakimiyyətin öz cinayətlərindən yaxşı məlumatı var. Bilirlər ki, xalqa, vətənə qarşı həddindən artıq qanunsuzluqlara yol veriblər və hakimiyyətdən getsələr vəziyyətləri çox ağır olacaq. Digər tərəfdən, bu il demokratik qüvvələr son iyirmi ildə mümkün olmayan birliyə nail olublar. Milli Şurada cəmiyyətin bütün spektri təmsil olunub. Siyasi partiyalarla yanaşı Milli Şuraya tanınmış hüquq müdafiəçiləri, QHT təmsilçiləri, ziyalılar daxil olub. Belə bir siyasi situasiyanın yarandığı vaxtda hakimiyyət müxalifətin vahid namizədinin seçkidə iştirakına maneələr yaratmaq istəyir. Hakimiyyət bilir ki, bu dəfə onun üçün çox çətin olacaq. Bilir ki, bu dəfə qələbə qazana bilməyəcək. İqtidar yalnız saxtakarlığa ümid edə bilər. Amma bu dəfə saxtalaşdırmaya xalqın və beynəlxalq aləmin reaksiyasının çox sərt olacağından da qorxur. Ona görə də var gücü ilə müxalifətin vahid namizədinin seçkidə iştirak etməməsinə çalışır. Seçki gününü qabağa çəkmək, rəhbərlik etdiyim təşkilatla bağlı cinayət işinin açılması məhz bundan irəli gəlir. Rejim qorxu içərisindədir. Baş verənlərin fonunda İlham Əliyevin gizli şəkildə Rusiyaya gəlməsi barədə yayılan məlumatlara da diqqət yetirməyi vacib sayıram. Hakimiyyət bu məlumatı gizlətməyə çalışsa da, mümkün olmadı. İlham Əliyevin Moskvadan Avropaya gedib-getmədiyi məlum deyil, amma o, bura birbaşa Bakıdan gəlib.

“İlham Əliyev ölkədən çoxdan gedib”

- İlham Əliyevin bu səfəri barəsində hansı məlumata sahibsiniz?

- Bütün dünya İlham Əliyevin Moskvaya səfər etdiyini bilsə də, Prezident Administirasiyası xalqı aldadır ki, o, Azərbaycandadır. Halbuki İlham Əliyev çoxdan Azərbaycanı tərk edib. Bu məlumatın müxtəlif səviyyələrdən təsdiqi mənə artıq çatıb.

- Hakimiyyət düşərgəsindən hazırda sizə müxtəlif ittihamlar ünvanlanır. İttihamlardan biri bundan ibarətdir ki, Rüstəm İbrahimbəyov 2013-cü il seçkiləri zamanı meydana çıxıb. Bəs bu neçə ili harda idi?

- Rüstəm İbrahimbəyov 1982-ci ildə «Ultimatum» əsərini yazıb və səhnələşdirib. Birinci dəfə idi ki, Azərbaycan Xalq Cümhuriyyəti bu formada təqdim olunurdu. Bu əsərdə AXC göylərə qaldırılıb. Bu addım Sovet vaxtı atılıb. Bundan başqa, 1989-cu ildə Xalq Hərəkatının üzvləri təzyiqlərlə üzləşəndə, mən ziyalılar adından müraciətlər etmişəm. Bu müraciətlərə birinci mən qol çəkmişəm. Yanvarın 20-də Sovet ordusu Bakıya daxil olanda mən Moskvada Azərbaycanın daimi nümayəndəliyində qərargah yaratmışdım. Həmin qərargahın rəhbəri mən idim. Faciə baş verdikdən sonra hər gün olaylarla bağlı mətbuat konfransı keçirirdim. Nəticədə o vaxt Azərbaycan Ali Sovetinin sədri olan Elmira Qafarova mənə zəng etdi və bildirdi ki, bu mətbuat konfransları davam edərsə nümayəndəliyi bağlayacaqlar. Ona görə mən mətbuat konfranslarını Moskvadakı evimə keçirdim. 1989-cu ilin sonunda Fransada konfransda Daşnaksütun Partiyasının mətbuat katibi ilə dialoqum olub. Mətbuatın iştirak etdiyi bu konfransda Azərbaycanın mövqeyi geniş işıqlandırılmışdı. Bundan başqa SSRİ KQB-sini aldadaraq əvvəl Moskvaya, sonra isə Bakıya 5-6 çox məhşur fransız jurnalistlərini gətizdirmişəm. Məqsəd 20 Yanvar faciəsindən sonra Azərbaycan həqiqətlərini dünyaya çatdırmaq idi. O zaman mənə KQB-dən ciddi xəbərdarlıq edirdilər ki, siz ölkəyə gizlin şəkildə jurnalist gətizdirmisiniz. Biz jurnalistləri qorumaq məqsədilə KQB-ni aldatmışdıq, amma belə bir izahat verdik ki, bir fransız qızı ilə azərbaycanlı oğlan evlənib və Bakıya gəliblər, onların yanındakılar isə bu cütlüyün dostlarıdır. Bir neçə gün bu jurnalistləri güddülər, amma bir nəticə olmadı. Min zülmlə onların çəkdikləri fotoları ölkədən çıxardıq. Bütün bunları tanınmış diplomat Ramiz Abutalıbov, Eldar Salayev yaxşı bilir. Bu barədə Müsavat başqanı İsa Qəmbər də məlumatlıdır. Təəssüf ki, jurnalistlər bu faktları ortaya çıxarıb, yenidən ictimailəşdirmirlər.

- Seçki tarixinin dəyişməsi Milli Şura daxilində də müəyyən müzakirələrə səbəb olub. Müsavat başqanı Isa Qəmbər yaranmış situasiyadan çıxış edərək, bəyan edib ki, Milli Şuranın növbəti sessiyasında yeni bir namizədlə çıxış edilməsi gündəmə gətirilməlidir. Bu təşəbbüsü necə dəyərləndirirsiniz?

- Bu İsa bəyin fikridir. Biz hamımız Milli Şuranın üzvləriyik. Hər kəsin öz mövqeyi ola bilər. Milli Şuranın növbəti sessiyasında bütün təkliflərə baxılmalıdır. Milli Şuranın təkliflərlə bağlı rəyi olmalıdır. Söhbət məndən getdiyi üçün bu barədə danışmağım düzgün çıxmır, amma mən düşünürəm ki, Milli Şuradan bir namizəd olmalıdır və o da sona qədər qalmalıdır. Biz var gücümüzü, bütün potensialımızı istifadə edərək Milli Şuranın namizədinin qeydə alınmasına nail olmalıyıq. Konstitusiya ilə seçki qanunvericiliyi arasında böyük təzadlar mövcuddur. Hakimiyyət prezidentliyə namizədin qeydiyyatı üçün lazım olan yekun sənədləri əvvəlcədən tələb edir. Bu düzgün yanaşma deyil. Milli Şuranın namizədinin irəli sürülməsi üçün təşəbbüs qrupunun bu barədə qərarı və mənim ilkin sənədlərim kifayət edir. /Azadliq.info/