Rayonda vaxtı ilə minik avtomobillərinə yağ və benzin əlavə etməklə çörək pulu qazanan, əslən Ermənistanın Polad Ayrımından olan Elşad Qasımov az zaman kəsiyində sabiq icra başçısı Rauf Hüseynovla əlbir olaraq Qazax şəhərində “Karvan” tikinti materialları mağazası açdı. Rayonda abadlıq-quruculuq işləri aparılan kimi başçı bütün mataerialları yalnız “Karvan”dan götürülməyini idarə, müəssisə və təşkilat rəhbərlərinə tapşırırdı. Beləcə özünə var-hal toplayan Elşad Qasımov çox keçmədi ki, həmin dövr Qazax Mərkəzi Uşaq Xəstəxanasının qənşərində rayonda MTN-in Qazax Şöbəsinin rəisi işləmiş Azər müəllimin kommersiya məqsədi ilə tikdirdiyi 2 mərtəbəli binanı aldı. Həmin binanı da mağaza edərək böyük tikinti mataeiallarının satışı mağazasına çevirdi. Burada da milyon qazanan Elşad Qasımov həmin mağazanın arxasında yerləşən “Akasiya” yeməkxanasını 190.000 manata aldı. Üstəlik, mağazaya bitişik yenidən 2 mərtəbəli bina da inşa etdirir. İşə bax ki, Qazaxda “Ulduz” mağazasının üstündə yerləşən binanın məhkəməyə məxsus xidməti evini də özəlləşdirdi. Ən bahalı minik avtomobili də aldı. Sonra nələr, nələr, nələr...
Lakin Qazaxda adi bir yağ tökənin birdən - birə bu qədər varlanmasına çoxları mağazanın hesabına olmadığını da düşünürlər. Yəqin bunu aidiyyəti orqanlar da yaxşı bilir, lakin nədənsə üz vurmurlar.
Bəs məsələ necədir? Fikir verin, bu qədər var-dövləti olan bu adam adının çəkilməsini məsləhət bilmədiyimiz dul qadına 2-ay ərzində pulunu almaq şərti ilə kombi istilik sistemi üçün material verir. Ay tamam olmamış başlayır pulunu istəməyə. Qadın da ”yaxin gündə verəcəyini” bildirsə də Elşad bununla razılaşmır. Nəticədə, hazırda -18 dərəcə şaxta olan Qazaxda usta da taparaq qadının evinə soxulur və kombiyə məxsus bütün sistemi sökdürür. Həmin an qadınin 3 yaşındakı nəvəsi də yanında olur. Uşağın qorxudan ağlamasına məhəl qoymayan Elşad Qasımov avadanlığı maşına yükləyərək mağazasına sattığa qoyur. Bəli, bu da Azərbaycan kişisi... Görəsən, Tanrı bunu bağışlayacaqmı?