Sözügedən məsələ ilə əlaqədar “Azərsu” ASC-nin ictimaiyyətlə əlaqələr şöbəsinin rəhbəri Anar Cəbrayıllı facebookda açıqlama yayıb.
“Bu gün “Azadlıq” radiosu vasitəsilə prezidentə şikayət edən Qalib Bağırovla birlikdə dediyi ərazidə, yəni Zabrat qəsəbəsinin “Kərpic zavodu” deyilən ərazisində olduq. Qalib Bağırov ha axtardı ki, özünün dediyi camış düşən quyuları bizə göstərsin, heç babat çala da tapa bilmədi. Naəlac qalıb dalanlara ayrılan yolları göstərdi, hansı ki, oralar dədə-badan asfalt görməyib. Ən sonda ixtisasca həkim olan Qalib Bağırov bizim işçilərə xitabən “sağ olsunlar, bizə su verirlər” dedi.

Zabrat qəsəbəsinin “Kərpic zavodu” adlanan ərazisində “Azərsu” ASC-nin sifarişi əsasında qazılmış asfalt örtüyü bərpa olunub. Yalnız bir ünvanda yolu perpendikulyar keçən yerdə bu həftə qazılmış hissəyə asfalt vurulmayıb. Amma həmin əraziyə karbonat verilib və yer quruyan kimi asfalt örtüyü bərpa ediləcək. Yaşayış massivinin dalanlarında olan yol probleminin isə su çəkilişinə heç bir aidiyyəti yoxdur. Həmin dalanlarda əvvəlcədən torpaq yollar olub və yağıntı ilə əlaqədar orada problemlər yaranıb. Bunu Qalib Bağırov özü də etiraf etdi.

“Kərpic zavodu” adlanan ərazidə “Azərsu” ASC tərəfindən 22 km-dən artıq su xətti çəkilib, 900-dən artıq ev birləşməsi verilib və sayğac quraşdırılıb, işlər davam etdirilir”.

* * * 12:45

“Cənab prezident! Etimad göstərdiyiniz məmurlar xalqın səbr kasasını daşırırlar. O qədər haqsızlıqlarla rastlaşırıq ki, məcbur olub Sizə müraciət edirik. Ətraf kəndlərin inkişafı ilə bağlı nə qədər sərəncamlar imzalasanız da, ortada heç nə yoxdur”.

Virtualaz.org saytı qeyd edir ki, bu sətirlər Bakının Zabrat qəsəbəsinin sakinlərinin prezident İlham Əliyevə ünvanladığı müraciətdəndir.

Əslində Zabrat sakinlərini prezidentdən kömək istəməyə məcbur edən səbəblər heç də ölkə başçısının bilavasitə müdaxiləsini tələb edəcək dərəcədə mühüm əhəmiyyət kəsb etmir. Bu səbəbləri aradan qaldırmalı olan çoxlu sayda məmurlar və strukturlar var. Ancaq bura Azərbaycandır və prezidentin tapşırıq və sərəncamlarını yerinə yetirməli olan məmurlar əslində camaatı boğaza yığmaq dərəcəsində məsuliyyətsizlik edirlər.

Zabrat sakinləri prezident İlham Əliyevə ünvanladıqları müraciətin bir nüsxəsini də “Azadlıq” radiosunun “Qaynar xətt”inə yollayıblar. Onlar ölkə rəhbərindən rahat yol və su istəyirlər.

Qəsəbə sakini Qalib Bağırov danışır ki, Zabratda su və kanalizasiya xətləri çəkilməsi üçün yollar qazılıb, işlər yarımçıq saxlanılıb, indi əziyyətini sakinlər çəkir: “Hətta qazdıqları quyuya düşənlər də olur. Son 20 gündə Zabratda su çəkmək adı ilə “Azərsu” Açıq Səhmdar Cəmiyyətinin qazdığı quyuya insan yox, camış da düşsə, çıxartmaq olmaz. Quyular qazılıb, qazanlar və qazdıranlar yoxa çıxıb. Söz deyiləsi adam yoxdur ki, heç olmasa gəlib quyuları doldursunlar”.

QUYU QAZIB QAÇIRLAR...

Qalib Bağırovun sözlərinə görə, 3 il əvvəl asfalt döşənmiş yolları su xətlərinə görə qazıb töküblər. Ancaq nə xətlər çəkilmir, nə də qazdıqlarını gəlib düzəltmirlər: “Fəhlələr bir-iki gün işləyirlər, sonra başqa kənddə iş çıxır, burdakı işləri yarımçıq saxlayıb gedirlər ora. Burdan yol çəkirlər, o tərəfdən iritonajlı maşınları yola buraxırlar. Maştağa yolu 2 ildir çəkilib, gəlib görün necə bərbad vəziyyətdədir. Su xətlərinə görə qazırlar, sonra keyfiyyətsiz asfaltlayırlar, çökəklər əmələ gəlir. 3 saylı Sabunçu xəstəxanasına gedən yol, Ramana yolu, Balaxanıya dönən yol - hamısı bərbad vəziyyətdə, çökəklikdir”.

Qalib Bağırov Zabrat sakinlərinin nəqliyyat problemi yaşamalarından da danışır.

Sabunçu Rayon İcra Hakimiyyəti isə bildirir ki, Zabrat sakinlərinin bu problemləri müvəqqətidir. Qəsəbədə kanalizasiya və su xətslərinin çəkilişi yaxın vaxtlarda başa çata, yollar da əsaslı asfaltlanacaq. Zabrat sakinlərinə səbr etmək qalıb.

Qeyd edək ki, analoji problem Bakının digər ətraf qəsəbələrində də hökm sürür. Məsələn, Bakının Bülbülə qəsəbəsi ərazisində yeni salınmış yaşayış massivlərində “Azərsu”nun “mənşəyi qeyri-müəyyən” podratçı şirkətlərinin qazdıqları yollarda dəfələrlə batıb qalan maşınlar olub. “Azərsu” prezidenti Qorxmaz Hüseynov Bakı və ətraf qəsəbələrin inkişafına dair üçüncü dövlət proqramının təqdimatı zamanı prezident İlham Əliyevin hüzurunda çıxış edərək bildirib ki, ətraf qəsəbələrdə on minlərlə abonent daimi içməli su və smart-kart tiplu sayğaclarla təmin edilib.

Lakin əslində reallıq bundan ibarətdir ki, “Azərsu” su xətlərini çəksə də həmin ərazilərdə içməli su hələ yoxdur, yollar da ki bərbad hala salınıb. Mətbuat müntəzəm olaraq “Azərsu” rəhbərinin yaxın qohumlarının adına qeydiyyatdan keçmiş çoxsaylı şirkətlərin su çəkilişi layihələrində yol verdikləri korrupsiyadan yazır.