Badamdar bələdiyyəsində ölkə qanunları işləmir

Dünyanın aparıcı dövlətlərində yerli özünüidarəetmə orqanı kimi fəaliyyət göstərən bələdiyyələr əhatə etdikləri ərazinin sosial-iqtisadi problemlərinin həllində, abadlıq və quruculuq işlərində müstəsna rol oynayırlar. İlk öncə Azərbaycanda da bələdiyyə strukturu formalaşarkən bizdə də bunun belə olacağını proqnozlaşdıranların arzuları elə ilk mərhələdəcə puç oldu. Çünki Azərbaycanda bələdiyyə sistemi formalaşandan dərhal sonra icra hakimiyyətlərinin yedək şöbəsinə çevrilməklə daha çox torpaq alqı-satqısı ilə məşğul olan bir quruma çevrildilər. Bələdiyyələr daha çox torpaq alveri ilə məşğul olan, vətəndaşların problemlərinin həllində yardımçı olmaq əvəzinə daha çox onlara əlavə problemlər yaradan bir orqan kimi demək olar ki, fəaliyyətsiz vəziyyətdədir. Amma, “fəaliyyətsizlik” heç də bütün sahələrdə özünü göstərmir. Əgər bələdiyyələr vətəndaşların problemlərinin həllində gözə görünmürsə də, torpaq alqı-satqısında, evtikintisində “haqq almaqda” çox operativlik göstərirlər.
Belə “operativ” bələdiyyələrdən biri də Badamdar bələdiyyəsidir. Bu bələdiyyənin fəaliyyətini araşdırsaq bir çox qaranlıq mətləblərin üzə çıxdığının şahidi olarıq. Çünki, Həbib Əsədovun rəhbərlik etdiyi Badamdar bələdiyyəsinin iş prinsipi məhz şəxsi maraqların təmin olunmasına, bələdiyyə sədrinin xüsusi qanunlarının həyata keçirilməsinə əsaslanır.
Həbib Əsəsdov Badamdar bələdiyyəsinin sədri seçiləndən sonra ona “sədaqətli” şəxsləri ətrafına toplayaraq özünə xas idarəetmə strukturu formlaşdırmışdır. Bələdiyyələr əslində seçki yolu ilə formalaşdığı üçün yerli əhalinin problemlərinin həllinə çalışmalı olduğu halda H.Əsədov özünü bu vəzifənin mütləq sahibi hesab edərək bildiyini edir.
Mən Badamdar bələdiyyəsinin “parlaq fəaliyyəti” ilə yaxından tanış olmaq imkanını 2013-cü ilin fevralında əldə etdim. Bələdiyyələr yeni yaradılmış struktur olduğu üçün ölkəmizdə bu sahədə ixtisaslı kadrlar azlıq təşkil edirlər. Mən Qafqaz Universitetinin Dövlət və Bələdiyyə İdarəetməsi fakultəsinin məzunu kimi bu sahədə azsaylı kadrlardan biriyəm. Öz ixtisasımüzrə dəfələrlə işlə təmin olunmaq arzusuyla Badamdar bələdiyyəsinə dəfələrlə müraciət etsəm də, Həbib Əsədov tərəfindən süni maneələr yaradılmaqla get-gələ salınırdım. Lakin sonradan Ədliyyə Nazirliyi Bələdiyyələrlə İş Mərkəzinin rəhbəri Mehdi Səlimzadəyə etdiyim müraciətdən sonra onun tövsiyyəsi ilə Həbib Əsədov məni işlə təmin etmək məcburiyyətində qaldı. Uzun çək-çevirdən sonra Badamdar bələdiyyəsində hüquqşünas təyin olunsam da, elə o gündən burada rəhbərlik tərəfindən əməlli-başlı ögeylik hiss etdim. Çünki mən Həbib Əsədovun “komandası”nın üzvü deyildim.
Elə bu səbəbdən də mən bələdiyyədə mənimlə “arzuolunmaz qonaq” kimi rəftar edilirdi. H.Əsədov və ətrafındakı şəxslər məni bələdiyyənin heç bir işinə yaxın buraxmır, bütün işləri “bağlı qapılar” arxasında həll edirdilər. Bələdiyyənin hüquqşünası olsam da, bu təşkilatın məhkəmə işlərinin böyük əksəriyyəti mənim iştirakım olmadan aparılırdı. Çünki bu proseslərin iştirakçısı olsaydım, H.Əsədov tərəfindən hüququ tapdalanmış yüzlərlə vətəndaşın problemləri ilə daha yaxından tanış olardım. Buna görə də H.Əsədov məhkəmə proseslərinə daha çox özünə sərf edən qeyri-peşəkar şəxləri cəlb etməklə qanunsuz əməllərini pərdələmək istəyirdi. Bilavasitə iştirak etdiyim azsaylı məhkəmə proseslərində qəbul olunmuş qərarlar isə H.Əsədov tərəfindən yerinə yetirilmir, vətəndaşlar əsassız olaraq süründürməçiliklə üzləşirdilər. Çünki, onun Badamdarda yaratdığı “mütləq hakimlik” sisteminə heç bir məhkəmə instansiyası “dur” demək iqtidarında deyil. H.Əsədovun eyni ərazini bir neçə şəxsə satması faktları üzrə aparılan məhkəmə araşdırılması nəticəsində qəbul olunan qərarlar da yerinə yetirilmir. Belə “şübhəli” işləri pərdələmək üçün H.Əsədov özündən əvvəlki bələdiyyə sədri Bəybala Hüseynovun adından “gen-bol” istifadə etməklə öz əməllərini pərdələyir. Belə ki, hər hansı qeyri-qanuni bir əməli “ört basdır” etmək üçün bunun guya B.Hüseynovun dövründə baş verdiyini bildirməklə məsuliyyətdən yaxa qurtarmağa çalışan H.Əsədov öz “şanlı” əməllərini davam etdirir. Belə “ötür-ötür” oyunlarının qurbanlarından biri də Orucov Qafar Səfər oğludur. Belə ki, ona məxsus torpaq sahəsi sonradan başqa şəxsə satılmış, məhkəmə prosesində isə Badamdar bələdiyyəsi məsuliyyətdən yaxa qurtarmaq üçün işi yenə də B.Hüseynovun “boynuna yıxmışdır”. İddiaçının haqlı tələbinin təmin olunması haqqında məhkəmə qərarı olsa da, Badamdar bələdiyyəsinin sədri Həbib Əsədov yenə də öz bildiyini etməkdədir. Göstərdiyim bu fakt Badamdar bələdiyyəsində baş verən qanunsuzluqların mində biri belə deyildir. Lakin, nə qədər məhkəmə qərarları olsa da, hələ də Badamdar ərazisində yalnız H.Əsədovun qəbul etdiyi qərarlar işləyir.
Bu gün Badamdar bələdiyyəsi bütünlüklə H.Əsədovun xüsusi mülkiyyətindədir. Əgər belə olmasaydı H.Əsədov öz xüsusi maşınının kreditini də bələdiyyə büdcəsi hesabına ödəməzdi. Onun şəxsi “KİA” markalı avtomobilinin aylıq kreditləri isə Badamdarın zəhmətkeş sakinlərinin ödədiyi vergilər əsasında formalaşan bələdiyyə büdcəsindən silinir.
Təbii ki, bütün bu qanunsuzluqları həyata keçirmək üçün H.Əsədova mənim kimi ixtisaslı bir kadr lazım deyildi. Ona görə də, işə başladığım ilk gündən məni necə kənarlaşdırmaq haqqında düşünən bələdiyyə sədri bütün mövcud imkanlarını işə salmışdı. Şəxsən Mehdi Səlimzadənin tövsiyyəsi ilə işə qəbul olunsam da, Həbib Əsədov buna da əhəmiyyət verməyərək öz şəxsi monopoliyasını heç kiminlə bölüşmək istəməyərək nəhayət ki, 2013-cü ilin oktyabrına kimi məni qeyri-qanuni olaraq işdən azad etdi. Bunu isə guya bələdiyyənin əmək haqqı ödəməyəimkanı olmadığı ilə əsaslandıran H.Əsədov nədənsə öz şəxsi avtomobilinin kreditini ödəmək üçün bələdiyyənin haradan pul tapdığını “sirr” olaraq saxlayır. Bələdiyyənin bu “imkansızlığı”nı nəzərə alaraq mən maaşsız işləməyə razı olduğumu bildirsəm də, H.Əsədov bunu heç bir vəchlə qəbul etmədi. Amma maraqlıdır ki, sonradan bilavasitə Səbael rayon İcra Hakimiyyəti tərəfindən “xüsusi” tapşırılmış bir şəxsi vergi müfəttişi vəzifəsinə qəbul edən H.Əsədov ona əmək haqqı verməyə vəsait tapdı. Bu isə bir daha sübut edir ki, mənim işdən azad olunmağımda bilavasitə bələdiyyə sədri H.Əsədovun “xüsusi” maraqları var. Əgər belə olmasaydı, H.Əsədov ölkə başçısının yürütdüyü siyasətə zidd getməzdi. Çünki, dövlət başçısı İlham Əliyev dəfələrlə bütün sahələrdə gənc ixtisaslı mütəxəssislərin önə çəkilməsinin vacibliyini vurğuladığı halda Badamdar bələdiyyəsinin sədri gəncləri işdən azad edərək “xüsusi tapşırıq” əsasında başqalarını işə qəbul etməzdi.
H.Əsədovun fəaliyyəti bir daha sübut edir ki, o, Badamdar bələdiyyəsinin idarəetməsindəki “mütləq monarxiyası”nı heç kiminlə bölüşmək istəmir. Əgər belə olmasaydı o, sırf ixtisasım üzrə bu təşkilatda çalışsam da, məni heç bir əsas olmadan işdən azad etməzdi. Bununla o, heç Bələdiyyələrlə iş üzrə Dövlət Mərkəzini, onun sədri Mehdi Səlimzadəni də qəbul etmədiyini göstərmiş oldu.
Mən Göyçay rayonunda anadan olmuşam. Göyçay narı süfrələr bəzəyi, ağız dadıdır. Amma nədənsə onun dadını tez unudanlar da tapılır. Nar mövzusu və Badamdar bələdiyyəsinin qanunsuz əməllərinin davamını növbəti saylarımızda oxuyacaqsınız.

Rəşad Hüseynov