Əbülfəz Babayev kimə arxalanır?

Bu gün bələdiyyələr haqqında danışdıqda ilk növbədə onların fəaliyyətsiz qurum olması göz önünə gəlir. Bələdiyyələrin adı var. Amma fəaliyyətlərindən heç bir əsər-əlamət yoxdur. Ökənin ən iri bələdiyyələrindən olan Sumqayıt bələdiyyəsini də bu siyahıya daxil etmək olar. 14 ildir fəaliyyət göstərən Sumqayıt bələdiyyəsi artıq insanları cana yığıb. Bələdiyyə sədri Əbülfəz Babayevin qanunsuz hərəkətləri yerli özünü idarəetmə qurumunun fəaliyyətinə kölgə salıb. Qeyd edək ki, Sumqayıt şəhər bələdiyyəsi 12 dekabr 1999-cu il tarixdə yaranıb. Ərazisi 7829,80 hektardır. Bələdiyyə İcra aparatı əməkdaşlarının sayı 82, üzvlərinin sayı isə 18 nəfərdir. Bələdiyyəyə sədrlik edən 66 yaşlı Əbülfəz Babayev 2005-ci ilin avqust ayından bu vəzifəni icra edir.
Burdan əvvəl bir çox vəzifələrdə çalışan sədr həm də 2006-cı ildən Azərbaycan Şəhər Bələdiyyələri Milli Assosiasiyasının rəhbəridir. Xatırladaq ki, bu şəxsin qanunsuzluğu barədə qəzetimizdə geniş məlumatlar vermişik. Lakin bələdiyyə sədri haqqında yazılan tənqidi yazılardan heç bir nəticə çıxarmır. Və qanunsuz və özbaşına əməllərini davam etdirir. Və bu cür hərəkətlərlə həm Sumqayıt sakinlərinin, həm də rəhbərlik etdiyi qurumun işçilərinin narazılığına səbəb olub. Etibarlı mənbələrin verdiyi məlumata görə, dövlət tərəfindən quruma ayrılan vəsait bələdiyyə sədri tərəfindən mənimsənilir. Sumqayıtdakı abadlıq və quruculuq işlərinə sərf olunmur. Sədr bütün dövlət vəsaitinin arxasına keçib. Üzərinə düşən hər hansısa bir iş görmür. Bələdiyyə büdcəsi Əbülfəz Babayev tərəfindən talan olunur. Yəni bələdiyyənin büdcəsi bir növ sədrin şəxsi büdcəsinə çevrilib. Qurumun öhdəliyində olan bir sıra işlər həyata keçmir. Şəhərin küçələri, məhəlləarası yollar, işıqlandırma sistemləri bərbad durumdadır. Bələdiyyə parkları baxımsız qalıb. Problem çoxdur. Hər seçki öncəsi bələdiyyə tərəfindən burda abadlıq işləri görülərdi. Bu il seçki ili olsa da, nədənsə sədr heç bir iş görmür. Özbaşınalıqları hamını bezdirib. Bələdiyyə üzvləri 8 il ərzində olmazın zülmlərə məruz qalıblar. Şəhər sakinləri sədrin istefası ilə bağlı məsələ qaldırıblar. Lakin buna nail ola bilməyiblər. Görünür, bələdiyyə sədri kiməsə arxalanır. Hakimiyyətin yuxarı dairələrindən hansısa yüksək çinli məmur tərəfindən müdafiə olunur. Qurum rəhbərinin qazanc yeri əsasən bələdiyyə büdcəsinə yığılan vergilər və qanunsuz torpaq satışlarıdır. Torpaqları ucuz qiymətə satır. Heç birinin sənədi yoxdur. Sadəcə, müqavilə tipli bir sənəd verib camaatın başını aldadırlar. Bələdiyyə sədri 2005-ci ildən indiyə qədər sayı bilinməyən qanunsuzluqlara yol verib. Qeyri-qanuni yollarla qazandığı vəsaitlər hesabına isə özünə çox yüksək səviyyəli şərait qurub. Sədr Sumqayıtın bir çox yerlərində ticarət obyektləri tikdirib. Şəhərin ən gur nöqtələrində onun aptekləri, supermarketləri, gözəllik salonları, tikinti materialları dükanı, şadlıq sarayları və avtoservisləri var. Bakıdakı obyektlərinin, mənzillərinin isə dəqiq sayını bilən yoxdur. Əlaqədar dövlət qurumlarından xahiş edirik ki, Əbülfəz Babayevin fəaliyyətini araşdırıb mövcud olan qanun pozuntularını aşkara çıxarsın.

Rasim