Eynulla Fətullayev çıxışında maraqlı məqamlara toxunub

“Əli Həsənov öz çıxışında haqlı olaraq qeyd etdi ki, nurçuluq sektasının siyasi sistemə nə qədər böyük fəlakət gətirdiyini bir ölkənin və bir partiyanın timsalında aydın görmək olar.
Uzağa getməyə ehtiyac yoxdur, Türkiyəyə baxın. Bu sektalar xarici xüsusi xidmət orqanları tərəfindən yaradılıblar və onlar tərəfindən də idarə olunurlar. Bu, o qədər açıq-aydın məsələdir ki, hətta heç kim nə nurçuluğun, nə də sələfiliyin yaranması tarixini inkar etməyə cəhd də göstərmir. Mərkəzi Kəşfiyyat İdarəsinin keçmiş agenti Sibel Edmundun bu yaxınlarda səslənən və Türkiyə KİV-lərinin əksəriyyətində dərc edilən etirafları nurçuların MKİ ilə sıx əlaqələrini bir daha əyani şəkildə ortaya qoyur. Baş nazir Ərdoğan müstəqiul siyasət yeritməyə, Suriya və İran məsələsində Qərbdən fərqli düşünməyə başlayan kimi türk dövlət və xüsusi xidmət orqanlarının içinə yeridilmiş bu nurçular hər tərəfdən Türkiyə hökumətinin üstünə tökülüşdü”.
Bu sözləri Azərbaycan Mətbuat Şurasının təşkil etdiyi “Dini etiqad azadlığı, missionerlik fəaliyyəti və media” adlı konfransdakı çıxışında haqqin.az saytının baş redaktoru Eynulla Fətullayev deyib.
E.Fətullayev jurnalistləri açıq və səmimi olmağa çağırıb: “Biz jurnalistlərik, məmur və siyasətçilər deyilik. Ona görə hesab edirəm ki, söhbətimiz səmimi olmalıdır”.
Baş redaktorun sözlərinə görə, siyasiləşmiş dini cərəyanlar bu gün dövlətçiliyin əsasları üçün heç bir təhlükə törətmir, amma elə bir vaxt gələcək ki, potensial təhlükə real təhlükəyə çevrilə bilər: “Türkiyə də belə oldu. Ötən il mən bir neçə dəfə Türkiyədə oldum, araşdırmalar apardım, hakimiyyət nümayəndələri ilə və qərarların qəbuluna təsir gücünə malik ekspertlərlə söhbətləşdim. Hələ Ərdoğanla Gülən toqquşmamış məqalələrimin birində belə bir proqnoz vermişdim ki, bu ölkədə hakimiyyətdaxili mübarizə kəskinləşəcək. Azərbaycanın müstəqil mətbuatında dərc olunan son hay-küylü materiallar ciddi narahatlıq doğurur. Nurçu sektası ilə bağlı məmurlar barədə ciddi ölçülər götürülməlidir. Xatırlayıram ki, 2006-cı ildə Gülər Əhmədova Milli Məclisin komitə rəhbərlərinin birinin Fətullah Gülənlə olan fotosunu mənə gətirdi. Mən möhkəm təəccüblənsəm də o zaman onu yayımlamadım. Çünki bu məsələ onda aktual deyildi. Ancaq illər keçdi, Azərbaycanda siyasi partiyalar və alternativ ideologiyalar böhranla üzləşdi. Azərbaycanda öz nüfuzunu gücləndirməyə çalışan qüvvələr bu dini sektaların və sonuncuların maraqlarını ifadə edən məmurların xidmətlərindən istifadə etməyə başladılar”.
E.Fətullayev Prezident yanında Strateji Araşdırmalar Mərkəzinin (SAM) əməkdaşı Heydər Mirzənin sosial şəbəkədə Azərbaycan jurnalistlərini təhqir etməsini də qınadı: “Bu analitik dünən nurçulardan yazan jurnalistləri “cındır” adlandırıb. Təsəvvür edirsinizmi?! Siz bu “analatik”in hələ leksikonuna baxın! Onun jurnalistləri təhqir etməyə nə haqqı var?! Tələb edirəm ki, Prezident Administrasiyası öz əməkdaşının bu hərəkətinə münasibət bildirsin. Prezident Administrasiyasının analitikləri bunlardır?!”