Elçin Xəlfəquliyevin “naxələf” işləri

Sovet dönəmində Qazaxda fəaliyyət göstərən “Qazax stomatoloji poliklinika”nın əhaliyə birmənalı şəkildə xidməti, yəqin ki, Qazax sakinlərinin yaddaşından silinməyib. Burada çalışan diş həkimlərinin yüksək ustalığı hamının ürəyincə olub. Sonradan poliklinikanın “işbazlar” tərəfindən pullu xidmətə keçirilməsi buradakı yüksək fəaliyyətə son qoydu. Təcrübəli həkimlər poliklinikadan çıxarılaraq tam şəraitsiz yerlərə köçürüldülər. Nəticədə, poliklinikanın binasının ağzına qara qıfıl vurularaq, satışa çıxarıldı. Uzun müddət bina alıcısını gözləyənə kimi, dağılmağa məruz qaldı. Su xətti kəsildi, havalandırıcı sistem xarab oldu, 1 mərtəbəli olan bina yağışın, selin əlindən yararsız vəziyyətə düşdü. 7-8 il belə halını yaşayan bina təbii ki, diş sahəsində təcrübəli həkimini də tapa bilməzdi. Bu yerə, yalnız hansısa “işbaz” sahib çıxa bilərdi. Doğurdan da, artıq 2 ilə yaxındır ki, “stomatoloji poliklinika öz sahibin tapıb”.

Payçılar “payını” gözləyir

Qeyd etdiyimiz kimi, sözügedən poliklinikada Qazax əhalisinin yaxşı tanıdığı Oqtay Yusifov, Sübhi Salmanov, Rövşən Məmmədov, Xəlil Cəlilov, Hüsniyyə Məmmədova, Ayna Quliyeva kimi diş həkimləri, eyni zamanda Nərmin Carçıyeva və Ceyhunə Əmirova kimi bacarıqlı gənclər çalışmışlar. Üstəlik, 4 nəfər də tibb bacısı fəaliyyət göstərmişdir. Lakin, özəlləşmə haqqında müvafiq qanunun üstündən xətt çəkilərək poliklinikanın binası uzun müddət orada işləyənlərə təklif edilmədən, məsləhət aparılmdan ixtisasca diş həkimi olsa da, Elçin Xəlfəquliyev tərəfindən özəlləşdirilməsinə şərait yaradılmışdır. Haqqını tələb edən payçılar bu gün də qanunun aliliyinə hörmətsiz yanaşanlar haqqında şikayətçidirlər. İşə baxın ki, az da olsa diş poliklinikasında işləyən, düz 10 il bu sahədən kənar düşüb özü üçün gəvə sexi açaraq bizneslə məşğul olan Elçin Xəlfəquliyevin əli gəvədən üzüldükdən sonra payçıların “payını yeyib”.

“Stomatoloji poliklinika” xəstəlik mənbəyidir

Əslində stomatoloji ploliklinika postsovet məkanından qalma ifadədir. Hazırki yaşlı nəsil diş çəkilən və müalicə olunan yerləri poliklinika kimi tanıyır. Belə yerdə özünü ayıq hesab edən Elçin Xəlfəquliyev öz yanından müştəriləri özünə cəlb etmək məqsədi ilə qanunsuz özəlləşdirdiyi binanın çöl qapısına “Stomatoloji poliklinika” sözlərini yazdırıb. Halbuki, bu məsələdən aidiyyəti orqanlar tam xəbərsizdir. Aldığımız məlumata görə, binanın rəsmi adı “Ehlan” MMC-dir. Bunun da eybi yox! Bəs buradakı antisanitariyaya, müqaviləsiz işçilərə, vergidən yayınmaya və keyfiyyətsiz xidmətə nə deyək? Səhiyyə nazirliyinin əməkdaşlarının belə bir məsələdən xəbəri varmı? Adicə suyu, havalanması və müasir tələblərə cavab verməyən bir şəraitdə dişlərin çəkilməsi və müalicəsi necə aparıla bilər?

Qazax sakini “hepatit”ə tutuldu

Söylənilən antisanitariya şəraiti Qazax rayon sakini Ramiz Əliyevin, necə deyərlər “başında çatladı”. Belə ki, ötən ilin yay ayında “acı” dişini Elçin Xəlfəquliyevə çəkdirən sakin “hepatit (c)” virusunun daşıyıcısına çevrilib. O, bu xəstəliyini Qazax Mülicə Diaqnostika Mərkəzi və Rusiyadakı poliklinikalardan biri də təsdiqləyib. Hazırda şikayətçi ölkənin səhiyyə nazirliyindən tutmuş hüquq-mühafizə orqanlarına kimi şikayətçidir. Əgər məsələ təsdiqini taparsa, sözsüz ki, özəl “diş poliklinikası”nın xəstəlik yaradan həkimi Elçin Xəlfəquliyev bir insan həyatına vurduğu ciddi zərbə üçün cəzasına çatacaqdır.
Onu da bildirmək yerinə düşər ki, vətəndaş Ramiz Əliyevin söylədiyinə görə, Elçin Xəlfəquliyevə çəkdirdiyi diş üçün 15 mant pul verib. Bunun müqabilində Xəlfəquliyev vətəndaşa pulun qəbzinin əvəzində “hepatit (c)” virusu verib...

Xəlfəquliyev səhiyyə nazirliyinə “iş” verir?

Elçin Xəlfəquliyev tutduğu saxta işlər bir yana, bu azmış kimi sosial, vergi və digər ödəmələri qanuni formada həyata keçirən Qazaxdakı diş texnik və həkimlər haqqında mənfi rəy yaratmaq əməlindən daşınmamaqla “naxələf” işlərlə məşğuldur. Bu heç də onun diş həkimi bacarıqsızlığından geri qalmayan bir “sənətə” çevrilmişdir. Halbuki, qonşu İran və Türkiyə kimi ölkələrdə dövlət ödəmələrini verməklə diş texniki və həkimlər öz fəaliyyətləri ilə məşğuldurlar. Təəssüflər olsun ki, belə bir irəliləyişlərdən xəbərsiz olan Xəlfəquliyev rayondakı texnik və həkimlər haqqında səhiyyə nazirliyinə lüzumsuz şikayətlər etməklə əsassız olaraq onların cərimələnməsini tələb etmişdir. Məqsədi isə, onların hamısını antisanitariya və tibbi tələblərə cavab verməyən saxta təşkil etdiyi “stomatoloji poliklinika”ya cəlb etməkdir. Təbii ki, bu da Elçin Xəlfəquliyevin “öz qanunlarıdır”. Ağıllı insanların Elçin kimilərinin yolu ilə getməsi ağılsızlıqdan savayı bir şey deyildir. Yazılanlarla bağlı qarşı tərəfin də mövqeyini öyrənməyə hazırıq...
İlham Hacalı