Yevlaxlı iş adamı özünü prezident
admistrasiyasının qarşısında yandıracağını deyir

Bir müddət əvvəl yevlaxlı iş adamı qəzetimizə müraciət edərək 1 milyon imanatlıq obyektinin kompensasiyasını ala bilmədiyndən şikayətlənmişdi. Şikayətçi Bəhram Sultanov bildirirdi ki, Yevlax - Gəncə dairəsinin qarşısında «Xan Çinar» adlı istirahət mərkəzi fəaliyyət göstərib. Həmin istirahət mərkəzi «İpək Yolu» magistralının çəkilməsi ilə əlaqədar olaraq plana düşüb. Lakin Dünya Bankının ayırdığı 1 milyon manatlıq kompensasiyanı «Azəryolservis» ASC-nin sədri və millət vəkili Cavid Qurbanovla hazırda Gəncənin İcra başçısı olan Elmar Vəliyev alaraq öz aralarında bölüşdürüblər.
Dünən bir daha qəzetimizi arayan Bəhrəm Sultanov bildirib ki, o artıq bu ədalətsizlikdən cana doyub. Şikayətçi bildirir ki, iki ildir Azərbaycan dövlətinin bütün instansiyalarına rastlaşdığı özbaşınalıq və ədalətsizlik barədə müraciət edib. Lakin onun müraciətlərinə heç bir dövlət qurumu qanuni reaksiya verməyib.
İş adamının bildirdiyinə görə, Cavid Qurbanovla Elmar Məmmədov əlbir olub ona çatacaq 1 milyon manat kompensasiyanı mənimsəyiblər. Sahibkar bildirir ki, həmin magistral üzərində plana düşən bütün obyektlərin kompensasiyası, layihəni maliyyələşdirən Dünya Bankı tərəfindən ödənilib.
Həmin vaxt Elmar Vəliyevin sağ əli , Yevlax Dövlət Torpaq və Xəritəçəkmə Komitəsinin Yevlax rayon şöbəsinin müdiri Məharət Mustafayev (hazırda Kəpəz rayon İcra Hakimiyyətinin başçısı), Bəhram Sultanovu yanına çağırıb və bildirib ki, onun obyekti rəsmi olaraq dövlət tərəfindən 1 milyon manat olaraq dəyərləndirilib. Amma «Azəryolservis» ASC-nin sədri ona bu məbləğin ancaq yarısını təklif edir. Məharət Mustafayev açıq şəkildə bildirib ki, Gavid Qurbanov iş adamına düşən və Dünya Bankı tərəfindən ödənilən kompensasiyanın yarısını, yəni 500 min manatını istəyir.
İş adamı bu təklifdən imtina edib və bildirib ki, kompensasiyanın hamısını istəyir. Əks təqdirdə obyektin sökülməsinə imkan verməyəcək. Bir müddətdən sonra, 2010-cu il iyulun 16-da, iş adımını o zaman Yevlax İcra Hakimiyyətinin başçısı olan Elmar Vəliyev öz yanına dəvət edib. Sahibkar ora yollanıb və icra başçısı ötkəm səslə ondan inadını yerə qoymağı və təklif olunan məbləğlə razılaşmağı əmr edib. Sahibkar etiraz etdikdə isə, icra başçısı otağındaca onu dövlətə xəyanətdə ittiham edib və sahibkar elə icra başçısının kabinetində həbs olunub.
Bəhram Sultanov azadlığa çıxdıqdan sonra görüb ki, onun istirahət mərkəzini söküblər. İş adamının istirahət mərkəzinin arxasında saldırdığı və 700-dən artıq ağac yetişdirdiyi Heydər Əliyev adına park da yerlə yeksan olunub.
Sahibkar bildirir ki, artıq iki ildən artıqdır ki, ona çatacaq kompesasiyanı almaq üçün mübarizə aparır. Dünya Bankı kompensasiyanı ödəməsinə baxmayraq, o qara qəpikdə 1 milyonluq obekti üçün kompensasiya ala bilməyib. Bəhrəm Sultanov iddia edir ki, onun adına saxta sənədlər tərtib olunub və bu pul alınaraq mənimsənilib. İddiaya əsasən saxta sənədlərin hazırlanmasında isə hazırda Kəpəz rayon İcra Hakimiyyətinin başçısı olan Yevlax Dövlət Torpaq və Xəritəçəkmə Komitəsinin Yevlax rayon şöbəsinin müdiri Məharət Mustafayev birbaşa iştirak edib.
Bəhram Sultanov artıq ədalətin təcəlli edəyinə inanmır. Şikayətçi bildirir k, onun mülkiyyət hüququ Azərbaycan Respublikası Konstitutsiyası ilə təmin olunub və dövlət qurumları, ölkə qanunları, həmçinin ölkə prezidenti onun mülkiyyət hüququnun təminatçısıdır. Lakin bu günə qədər onun bu instansiyalara etdiyi müraciətlər öz nəticəsini verməyib və ona çatacaq qanuni kompesasiya sadəcə olaraq dövlət məmurları tərəfindən mənimsənilib.
Bəhram Sultanov şikayətində qeyd edir ki, ölkənin iki tanınmış məmurunun - biri «Azəryolservis» ASC-nin sədri və millət vəkili Cavid Qurbanov, digəri isə ölkənin ikinci şəhərinin icra başçısı olan Elmar Vəliyevin onun mülkiyyət hüququna qəsd etmələri və ona çatacaq 1 milyon manat kompensasiyanı mənimsəmələri ölkədə baş alıb gedən məmur özbaşınalığının və çapqınçılığının bariz nümunəsidir.
İş adamının sözlərinə görə, aradan keçən iki il müddətində o beynəlxalq təşkilatlara belə müraciət etməsinə baxmayaraq, onun haqqlı tələbinə baxan yoxdur. Buna görə də artıq Bəhram Sultanov ədalətin bərpa olunacağına bütün ümidini itirib: «Artıq mənim heç nəyə ümidim qalmayıb. Çünki Cavid Qurbanovun və Elmar Vəliyevin adminstrativ və başqa imkanları qanunların üzərində dayanır. Burda mən xoruzla şahın məşhur hekayətini xatırlamaya bilmirəm. Xoruzun zibillikdən tapdığı bir şahını şah onun əlindən aldığında, xoruz oxumağa başlayır: «Quqqulu quu, şah mənə möhtac imiş». İndi belə çıxır ki, Cavid Qurbaqov və Elmar Vəliyev mənə çatacaq kompensasiyaya möhtac imişlər».
Sonda iş adamı bildirdi ki, o, artıq cana doyub. Əgər yaxın günlərdə dövlət qurumları onun şikayətinə münasibət bildirməsələr, o zaman özünü Prezident Adminstrasiyasının qarşısında yandırmaqdan başqa çarə görmür: «Artıq ağlıma başqa heç bir şey gəlmir. Düşünürəm ki, ancaq özümə qəsd etməklə ölkədəki özbaşınalığın səviyyəsini nümayiş etdirə bilərəm. Mən dövlətdən heç bir şey istəmirəm. Sadəcə öz qanuni haqqlarımı tələb edirəm. Tələb edirəm ki, mənə çatacaq qanuni kompensasiya mənə qaytarılsın və pozulan konstitutsion hüququm bərpa olunsun».
Zaur