Hadı Rəcəblinin gənclərə yönəlik təhqirinə görə ona üç gün vaxt verildi

O isə aktivistlərin kampaniyası qarşısında geri çəkildi:
“Həmin sözlər gənclərə və hətta müxalifətə belə yönəlməyib”

Deputat Hadı Rəcəbli AzTV efirində söyüş söydüyünü təsdiqləyib. Deputat Azərbaycan gənclərini deyil, ermənilərə xitabən təhqiramiz ifadə işlətdiyini vurğulayıb. Lakin H.Rəcəblinin söyüşü sosial şəbəkələrdə etiraz doğurub və ona qarşı kampaniya başlanıb. Gənc fəal Bəxtiyar Hacıyev üç gün ərzində deputat fəal gənclərdən üzr istəməyəcəyi halda onun telefon nömrələrinə sms yazmağı təklif edib. Deyib ki, deputata bir sözlük “özünsən” cavabı ilə hər kəs sms yazsın. Onun bu çıxışı gənclərin böyük əksəriyyəti tərəfindən maraqla qarşılanıb və fəallar H.Rəcəblinin üzr istəyəcəyini gözləyirlər. Deputat isə moderator.az-a əvvəlcə açıqlamasında üzr istəməyəcəyini bildirib:
“Heç kəsdən üzr istəmək niyyətim yoxdur. Orada söyüş olub. Bu söz də cəm halında deyil, tək halda ifadə olunub. Söyüşün də ünvanı erməni gənci olub. Ermənidən üzr istəyərlər?”. O, Azərbaycan gənclərini təhqir etmək niyyətində olmadığını söyləyib: “Təəssüf ki, erməni lobbisinin təsiri altına düşüb, Azərbaycana qarşı kampaniya aparan gənclərimiz də var. Bu gənclər getdikləri yoldan dönməlidirlər”.
Müsavat Gənclər Təşkilatının sədri Tural Abbaslı isə musavat.com-a deyib ki, H.Rəcəbli hakimiyyətin hələ etik baxımdan mərifətli nümayəndəsi sayılırdı: “İndi bu yaşda adamın ağzından efirdə təhqiramiz ifadənin çıxması nə özünə yaraşır, nə deputatlıq statusuna. Əgər bu söyüşü erməni gəncinə xitab etdiyini, erməni lobbisinin təsiri altında olan gənclərə üz tutduğunu deyirsə konkret həmin gənclərin, onların üzv olduğu təşkilatların adını çəksin. Yoxsa kimdir ermənilərin təsiri altında olanlar? Bəlkə əsgər ölümlərinə etiraz edənlərdir, İsmayıllıya dəstək aksiyasına çıxanlardır? Bunu aydınlaşdırsın”.
T.Abbaslı H.Rəcəbli ilə bağlı kampaniyaya qoşulduqlarını açıqladı: “Nə qədər gec deyilsə üz istəsin. Əslində mən Kürdəxanı həbsxanasında olanda bir məhbus var idi. Onunla birgə vergidən yayınmaya görə cinayət işində Hadı Rəcəblinin oğlu Tural Rəcəblinin adı çəkilirdi. Azərbaycanın fəal gəncliyini təhqir etməkdənsə, öz oğluna tərbiyə versin”.
İctimai fəal Bəxtiyar Hacıyev isə deyib ki, ağsaqqal bir deputata söyüş söymək yaraşmaz: “Özü də efirdə söyüş söydüyünü etiraf edib. Hətta ermənini söyübsə belə, yaşlı bir adamın ağzından belə ifadənin çıxması düzgün deyil. Gənclər həftənin 1-ci gününə kimi ona vaxt veriblər və üzr istəyəcəyini gözləyirik”.
Günün ikinci yarısında isə deputatdan növbəti açıqlama gəldi. O, bu dəfə vəziyyətin ciddiliyini dərk edib loyal və xoşməramlı çıxışda bulundu. Sitat: “Sabah gənclər günüdür. Mən bütün gənclərimizi ürəkdən təbrik edirəm. Həyatımın, bütün ömrümün çox böyük bir hissəsi gənclərlə işə sərf edilib. Mən onların qayğılarını və hissiyatını gözəl bilirəm. Gənclər qanunvericiliyinin müəllifi olmuşam. Onların mənafelərinə xidmət edən, sosial müdafiəsinə yönələn layihələrin müəllifiyəm. Təəssüf ki, bu gün gəncləri qıcıqlandıran, onların heysiyyatına toxunan, təxribat xarakterli çirkin addımlar da atılır. Cavanlarımız arasında mən fərq qoymuram. Müxalifətli, iqtidarlı hamısı bizim balalarımızdır. Onlar Azərbaycanın sabahıdırlar. Səhv yolda olanı, emosiyalara uyanı, mənfi təsirlər altına düşənləri düz yola gətirmək lazımdır və bu böyüklərin hər birinin borcudur”.
H.Rəcəbli əlavə edib: “Onu da demək istəyirəm ki, ötən ilin sonunda AzTV-nin efirində müsahibə vaxtı heç bir söyüş səslənməyib. Sonralar sosial şəbəkələrdə bir söz bir neçə dəfə gücləndirilərək verilişə montaj olunaraq yayımlanıb. Montajda həmən söz əslində tək halında səslənib və qulaqcıqla belə dinlədikdə aydın görünür ki, heç cür gənclərə və hətta müxalifətə belə yönəlməyib. Həmin söz hər birimizin erməni lobbisinə, erməni diasporuna yönəltmək istədiyimiz ən dəqiq sözdür”.
Aslan