Gənclər “Özünsən!” yazaraq deputatın
050 216 59 60 nömrəli telefonuna SMS göndərirlər

Dünən gənclərin deputat Hadı Rəcəbliyə verdiyi üç günlük möhlət bitdi. AzTV efirində söyüş söydüyünü etiraf edən H.Rəcəbli bunu ermənilərin ünvanına səsləndirdiyini qeyd etsə də, bu izahat onu xilas etmədi. Gənclərin facebook-da başladığı kampaniya davam etdi və bu gün onun yekunlaşacağı gözlənilir. Nəticə olaraq deputatın telefon nömrələri yayılacaq və hər kəs ona “özünsən” SMS-i göndərəcək. Facebook şəbəkəsində “Hadı Rəcəbli cəzalandırılsın” səhifəsi də yaradılıb. Baxmayaraq ki, deputat heç kəsdən üzr istəməyəcəyini bəyan etmişdi. Sonra vəziyyətin ciddiliyini dərk edib Azərbaycan gənclərini 2 fevral günü münasibəti ilə təbrik edərək iqtidar-müxalifətli bütün gəncləri öz övladları saydığını vurğulamışdı.
Ancaq deputatın açıqlaması gənclərin könlünü ala bilmədi. Kampaniya barədə Almaniyada yaşayan blogger Həbib Müntəzir də son statuslarından birində deputata verilən möhlətin artıq bitdiyini yazıb: “Hadı Rəcəbli müsahibə verib və efirdə söyüş söydüyünü etiraf edib. Amma o, erməni gəncini söydüyünü bildirib. Üzr-filan istəməyəcəyini deyib. Və onu da əlavə edib ki, SMS-lə ”Özünsən" kampaniyasını başladan gənclər erməni diasporunun təsiri altına düşüblər. Görəsən erməni olmasaydı, bu yaptokratlar hər şeyi kimin üstünə atardılar? Ümumiyyətlə verilişdə Azərbaycandakı azad təfəkkürlü gənclərdən söhbət gedirdi və söyüş də onlara ünvanlanmışdı. Erməninin nə iti azıb axı mövzuda? İkincisi, hansı haqla televiziya vasitəsilə küçə söyüşü söyüb, insanların evinə girmə cəsarəti göstərir və buna bəraət qazandırır? Hər bir halda Hadı müəllim üzr istəməsə, telefon nömrəsinə gələcək SMS-lərlə ona Azərbaycan gənclərinin diaspor gücünü göstərəcəyik".
Kampaniya təşkilatçılarından olan Kənan Qasımlı və İlkin Rüstəmzadə də deputat üzr istəməyəcəyi halda təklif olunan variantdan istifadə edəcəklərini açıqladılar. AXCP gənclər komitəsinin üzvü Nihat Hüseyn də kampaniyaya qoşulacaqlarını dedi. Qeyd edək ki, AzTV-nin efirində “destruktiv gənclərin” fəaliyyəti tənqid olunub, onların xarici qüvvələrin təsiri altında olduğu vurğulanıb.
Deputat Hadı Rəcəblinin AzTV efirindən gənclərin ünvanına təhqiramiz söyüşlər ünvanlaması qarşı tərəfi qəzəbləndirib. Mikrofonun açıq olması üzündən başı qalmaqalda olan deputatın mobil telefonuna gənclər dayanmadan SMS göndərməkdədir. Artıq onlar “Özünsən!” yazaraq deputatın 050 216 59 60 nömrəli telefonuna SMS göndərirlər.
Xatırladaq ki, Hadı Rəcəblinin dilindən söyüş efirə yayımlanmış söyüşə görə gənclər üzr istəməsi üçün deputata 3 gün vaxt dermişdilər. Verilən müddət dünən bitdiyindən və H.Rəcəbli üzr ystəmədiyindən, bu gündən etibarən gənclər də SMS kampaniyasına başlayıb. Daha sonra gənclər deputata üzr istəməsi üçün 3 gün möhlət vermişdilər. Lakin deputat üzr istəməyəcəyini bəyan etmişdi.
Maraqlıdır, bəs deputatın gənclərin bu gündən start götürən SMS kampaniyasına reaksiyası necədir? Elə bu sualımıza cavab almaq məqsədilə H.Rəcəbli ilə əlaqə saxlamaq istədik. Dəfələrlə göstərdiyimiz cəhdlərimizə baxmayaraq deputatdan cavab ala bilmədik. Mobil telefon bağlı olmadığından görünür, deputat zənglər kimi, ona ünvanlanan mesajları da davamlı olaraq izləməkdədir. Amma nə zənglərə, nə də mesajlara cavab vermir.
Gültəkin