Prezidentin müşavirəsindən sonra
Əhəd Abıyevin sensasion açıqlaması aranı qatdı

Prezident İlham Əliyevin son müşavirədəki çıxışı hələ çox müzakirə olunacaq. İ.Əliyevin səsləndirdiyi açıq hədələr və sərt bəyanatları hələlik soyuq başla təhlil etmək bir qədər çətindir. Çünki prezidentin sözlərinin ardından hansı əməli addımlar atılacağı bilinmir.
Bilinən budur ki, indiki gərgin situasiyada ölkə başçısı çox ciddi bir gündəm yaratdı. Ən azından yazıçı Əkrəm Əylislinin “Daş yuxular”ı arxa plana keçdi. Amma müşavirədə səslənən fikirlər yaxın günlərdə əməldə təsdiqi tapmasa deməli, İ.Əliyevin çıxışı sadəcə publikaya hesablanıbmış. Bizə isə bir azca gözləmək düşür.
Baxaq görək yaxın günlərdə yüksək çinli məmur cəzalandırılacaqmı, övladı harınlamış məmur ata istefaya gedəcəkmi? Bu müşavirədən sonra ən azından İsmayıllının icra başçısı Nizami Ələkbərov istefa göndərilməlidir. Əgər bu siyasi iradə nümayiş etdirilməsə müşavirəyə bir “quş”. Odur ki, yaxın günlərdə daha ayıq şəkildə müşavirəni analiz edə biləcəyik.
Amma maraqlıdır ki, prezidentin çıxışından sonra ən sərt və iddialı açıqlama Daşkəsənin icra başçısı Əhəd Abıyevdən gəldi. Həmişə qalmaqallı fikirləri ilə seçilən Abıyevin silah gəzdirən məmur övladlarının olmasını deməsi diqqətdən kənarda qala bilməz. İcra başçısı deyir ki, moderator.az-a deyib ki, ölkə rəhbərinin dediklərindən artıq hər kəs dərs almalıdır:
“Cənab Prezident mənim ürəyimdən keçənləri dedi. Artıq hər kəs nəticə çıxaracaq. Bizi bu vəzifəyə təyin edən prezidentimiz tapşırıb ki, yerlərdə onun siyasətini həyata keçirək. Kim bu siyasətə qarşı çıxırsa o, xəyanətkardır. Bu gün elə məmurlar var ki, uşaqları hətta qanunsuz silah gəzdirirlər. Belələrinə cənab prezident bir dərs verdi”.
Ə.Abıyevin məhz silah gəzdirmə faktına toxunması olduqca cəlbedicidir. Çünki bizə prezidentin şəxsi mühafizə xidmətinin rəhbəri Bəylər Əyyubovun qohumu Robert Əyyubovun silah gəzdirdiyi mətbuatdan tanışdır. Hətta onun bir neçə dəfə mübahisə zamanı qarşısındakına atəş açdığı bildirilir. Amma o da istisna deyil ki, İsmayıllıda üsyana səbəb olan məmur balaları silahsız olmayıblar. Hər halda Abıyev hakimiyyətə gərəkli kadrdır, icra başçısıdır, məlumatlı adamdır. Onun belə bir ifadə işlətməsi yalandan olmaz. Halbuki, hüquq-mühafizə orqanları Azərbaycanda kriminogen durumun nəzarət altında olduğunu bəyan edirlər.
Yada salaq ki, Balaxanı qəsəbəsində bir müddət əvvəl atışma baş vermişdi. Əsəd Əliyev, oğlu Məhəmməd və qardaşı Seymur mübahisə zəminində Elçin Əliyevin alın nahiyəsindən, Sadiq Musayevin ayaq nahiyəsindən “Makarov” tipli tapançadan və Elxan Bayramzadənin ürək nahiyəsindən bıçaq xəsarətləri yetirmişdi.
Qanlı hadisədə iştirak edən Sadiq Musayev və Tahir Musayevin nəticədə Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyinin baş direktoru Şakir Musayevin qardaşının övladları olduğu üzə çıxmışdı.
Hətta yadınızdadırsa, 2011-ci ildə Nabran, İsmayıllı, Daşkəsənin Xaşbulaq və İsmayıllı bölgələrində nazirlərin və övladlarının etdikləri əməllər ən yüksək səviyyədə narazılıqla qarşılanmışdı. Məlum olmuşdu ki, xarici xanım müğənnilərinin iştirak etdiyi bütün tədbirləri sıx dairədə nazirlərin özləri, geniş tədbirlər halında isə nazir övladları təşkil edir. Ən gülməlisi isə budur ki, təşkil olunan parkinqlərin birində nazir övladlarından biri üstündəki silahı əlinə alaraq gələn qonaqların yalnız onun üçün rəqs etməsini istəyib. Məclisdə iştirak edən digər məmur övladları isə əcnəbi qonağın müdafiəsinə qalxıb. Nəticədə yaranan silahlı insidenti yerli polis əməkdaşları zorla dayandıra bilmişdilər.
Məhz bundan sonra Prezident Administrasiyasından ciddi xəbərdarlıq gəldi. Xəbərdarlıqda göstərilirdi ki, heç bir məmur övladı üzərində silah gəzdirə bilməz, qiymətli maşın gətizdirə bilməz və şou sahəsində bu gündən etibarən oliqarx-məmurlara bağlı heç bir şirkət sponsorluq edə bilməz. Ancaq görünür nəticə verməyib və prezidentin sonuncu müşavirədəki sərt çıxışı da bunu deməyə əsas verir.
Aslan