Nuşirəvan Məmmədov: “Başlıca məqsədim qonşum tərəfindən zəbt olunan torpaq sahəmin geri qaytarılmasını tələb etmək idi. Çünki, Azərbaycan Respublikası Konstitusiyasının 13-cü maddəsində mülkiyyət hüququ ilə bağlı geniş şəhr də verilib”

Bu gün də ictimai həyatımızda sosial problemlər tüğyan edirsə, vətəndaş huquqları anbaan tapdaqlar altına atılırsa, süründürməçilik amillərinə aylar, illər uzunu yol verilirsə, bütün bunlar mahiyyət etibarilə onu söyləməyə əsaslar verir ki, hələ də əksər vəzifə sahibləri daşıdıqları vəzifələrinin öhdəsindən gələ bilmirlər. Əgər bu belə olmasaydı dəfələrlə redaksiyamıza üz tutan və üz-üzə qaldığı problemlərinin ictimailəşməsinə çalışan, Ağcabədi rayonu Həzi Aslanov küçəsi ev-224 ünvanın sakini Məmmədov Nuşirəvan Məhərrəm oğlu da, dövlət idarələrinin qapılarında, vəzifəli şəxslərin isə qəbullarında qalmazdı. Yəni, o, artıq bir neçə ildir ki, haqqına qovuşmağa çalışır, amma ona imkan verilmir, haqq səsini isə bir kimsə eşitmir.
İndi bir anlığa olsa da, baş verənlərə diqqətlə nəzər salaq. Nuşirəvan Məmmədov “Gündəm Xəbər”ə ünvanladığı müraciətində bildirir ki, “Azərbaycan Respublikası Dövlət Torpaq və Xəritəçəkmə Komitəsi tərəfindən verilən və 16 aprel 2010-cu il tarixdə 515 nömrəsi ilə qeydiyyata alınan 266453 saylı “Torpaq Sahəsinin Planı və Ölçüsü” sənədimdə, ailəmizə məxsus torpaq sahəsi 1469,42 kvm, ümumi yoldan həyətimizə dönən yolunun eni isə, 8 m 76 sm göstərilir. Qeyd olunan ünvanda yaşamadığım halda, həmin sahəni həm sənədləşdirdim, həm də ki, hasara aldım. Amma, o vaxtkı qonşum Zeniyev Zeyni Süleyman oğlu, 1984-cü ildə torpaq sahəmdə müvəqqəti yaşamadığımdan sui-istifadə edərək, mənə məxsus yolun 3m 46 sm-ni zəbt etməyi də bacardı. Yəni, o, evini faktiki olaraq mənə məxsus torpaq sahəmdə inşa etdirdi. Bu gün ailəmizə məxsus darvaza yolumuz, ümumilikdə 5 m 30 sm qalıb. Bir qədər keçdikdən sonra isə, Zeyni Zeyniyev evini və həyətyanı sahəsini başqa bir şəxsə satdı.


Mənə məxsus torpaq sahəm qonşum tərəfindən zəbt olunduğu üçün, hələ 09 iyun 2008-ci il tarixdə Ağcabədi rayon Polis Şöbəsinin rəisi Təhmünasib İbrahimova, Ağcabədi şəhəri üzrə icra nümayəndəsi Rasim İbrahimova, Ağcabədi şəhər bələdiyyəsinin sədri Alı İsmayılova yazılı surətdə ərizə ilə müraciət etdim. Məqsədim, qonşum tərəfindən zəbt olunan torpaq sahəmin geri qaytarılmasını tələb etmək idi. Çünki, Azərbaycan Respublikası Konstitusiyasının 13-cü maddəsində mülkiyyət hüququ ilə bağlı geniş şəhr də verilib. Məhz, həmin maddədə göstərilir ki,
I. Azərbaycan Respublikasında mülkiyyət toxunulmazdır və dövlət tərəfindən müdafiə olunur.
II. Mülkiyyət dövlət mülkiyyəti, xüsusi mülkiyyət və bələdiyyə mülkiyyəti növündə ola bilər.
III. Mülkiyyətdən insan və vətəndaş hüquqları və azadlıqları, cəmiyyətin və dövlətin mənafeləri, şəxsiyyətin ləyaqəti əleyhinə istifadə edilə bilməz.
Amma, qanunun belə bir tələbinə baxmayaraq, 18 iyun 2008-ci il tarixdə yuxarıda adları çəkilən dövlət qurumları səlahiyyətlilərinin birbaşa iştirakı ilə həyətyanı sahəmə baxış keçirisə də, problemim həllini tapmadı ki, tapmadı. Yəni, bizim ailəyə məxsus torpaq sahəsinin zəbt olunduğunu öz gözləri ilə görən qurum səlahiyyətliləri, torpaq sahəsinin bizə məxsus olması barədə protokol da tərtib etdilər. Amma, onlar zəbt olunmuş torpaq sahəsini geri qaytarmaq əvəzinə, nədənsə son anda qəribə bir qərar da qəbul etdilər. Yəni, onların istəyi o oldu ki, biz zəbt olunmuş torpaq sahəmizdən könüllü imtina etməliyik və darvazamızı qonşumuzun zəbt edib tikdirdiyi evin tinində qoymalıyıq.
Onların belə bir yanaşması məni qane etmədiyindən, problemin varlığına məhkəmədə aydınlıq gətirilməsi qərarına gəldim. Üz-üzə qaldığım problemlə bağlı 19 aprel 2009-cu il tarixdə Ağcabədi rayon Məhkəməsinin hakimləri Fərhadov Xanlar Zal oğlu və İbrahimov Zamin Vəliyyədin oğlunun iştirakları ilə keçirilən məhkəmə prosesində, ilkin iddiaçı Nəsirov Yaşar Səfər oğlunun (qanunsuz tikilən evin sahibi) nümayəndəsi Nəsirov İslam Səfər oğlunun ilkin iddiası üzrə, Azərbaycan Respublikası adından “Qətnamə” qəbul edildi. Qətnamədə (qətnaməyə şərnamə desək, yəqin ki, yanılmarıq) darvazamın öz hesabıma götürülməsi tələbi qoyuldu.
21 iyun 2012-ci il tarixdə Ağcabədi rayon Məhkəməsinin qəbul etdiyi qərara (qəribə qərara) əsasən, darvazam məhkəmə icraçısı Alıyev Gəray Seyfəddin oğlunun rəhbərliyi, bir neçə polis əməkdaşının iştirakı və ağır texnika ilə dağıdılı. Təəssüf doğuran hal o oldu ki, darvazam dağıdılan zaman bir hissəsi yoxa çıxarıldı. Həmin vaxt məni qonşumun qardaşı İslam Nəsirov, həyat yoldaşım Əhmədova Nazilə Əhməd qızını isə məhkəmə icraçısı Gəray Alıyev vəhşicəsinə döydü. Bu gün məndə dağıdılan darvazamın şəkilləri və öz həyətimizdə döyülməyimiz barədə lazımi eksrertiza sənədlərim də var. Belə bir olaylar barədə məlumatlı olan hər kəs, sanki dəhşətə də gələr. İnsan o halda od tutub yanır və öz-özünə sual da edir ki, ilahi gör mənim qonşum kimdir? Məhkəmə icraçıları kimdir və mənə qarşı hansı addımlarını da atdılar? Biz 21-ci əsrdə yaşasaq da, gör hansı qaydada idarə olunuruq?”.
Ağcabədi rayon sakini Nuşirəvan Məmmədov bizimlə söhbətində məntiqli bir fikir də söylədi. O, onu da bildirdi ki, “mən və həyat yoldaşım indi niyə döyülmürük? Çünki, biz bu gün həqiqəti tələb etmirik və həqiqət var deyə, onun varlığına da inanmırıq. Amma, həqiqət nə qədər acı olsa da, öz-özlüyündə yenə də həqiqətdir”. Şikayətçi əlində olan şəkilləri, şəkillərdə olan faktları göstərərək, “ bəs indi dövlətin xəritəsini neynəyək, onu hara so.......q ki, baş verənləri ört-basdır etmək mümkün olsun” deyir. O, onu da vurğulayır ki, “görəsən hansı marağa görə cinayəti gizlədən Ağcabədi rayon prokuroru cənab Salman Səmədov və yuxarıda adlarını çəkdiyim hakimlər, baş verənləri ört-basdır etməyə çalışırlar? Yeri gələndə onlar mənə sanki “cırtdan nağılı” da danışırlar. O halda bəs qanunun, Konstitusiyamızın tələbi nə olsun? Səbəb nə olur ki, qanunu pozan vəzifə sahiblərinə cəza verilmir? O halda, görəsən mövcud qanunvericiliyimiz əsasında fəaliyyət göstərən nazirlərimiz və digər vəzifə sahiblərimiz necə düşünürlər? Səbəb nə olur ki, mənim haqq səsim eşidilmir, problemlərim qanun çərçivəsində həllini tapmır? Onlara kim cəza verəcək, yoxsa hüquq-mühafizə orqanı əməkdaşlarına heç bir halda cəza düşmür? Yəqin ki, bu məmləkətdə qanun şah deyil, şah qanundur. Əgər bu belə olmasaydı, illər uzunu üz-üzə qaldığım problemlərim qısa zaman kəsiyində həllini tapardı”.
Sözsüz ki, açıqlamada qeyd olunan olaylar sadə bir sakinin üz-üzə qaldığı problemlər olduğundan, biz onun durumunu hiss edib, onun vəziyyətinə sanki acıyırıq. Eyni zamanda onu da istərdik ki, təkcə Nuşirəvan Məmmədov yox, bəzi vəzifə sahiblərinin günahı ucbatından qapılarda qalan, haqq-ədalət axtarışında olan hər kəsin problemləri qanun çərçivəsində həllini tapsın ki, ədalət zəfər çala bilsin. Yoxsa...
Açıqlamada adları çəkilən hər kəsin mövqeyini də dinləyə bilərik.

“Gündəm Xəbər”