Avropa Məhkəməsi “Qış bulvarı” vandalizminə görə
hökuməti fantastik məbləğdə cərimələyəcək; şəhərin
mərkəzində üç ildir evyıxma əməliyyatları gedir

Bakı meri Hacıbala Abutalıbovun “Qış bulvarı” vandalizmi bitmək bilmir. Şəhərin mərkəzində salınacaq örtülü parka görə, vətəndaşların evlərinin yerlə-yeksan olunması prosesi 3 ilə yaxındır ki, davam edir və bu özbaşınalıqlara “dur” deyən tapılmır. Bakının Baş Planı adı ilə rəsmi şəkildə evyıxma əməliyyatları həyata keçirən H.Abutalıbov və onun ərazi üzrə nümayəndəsi Zülfəli İsmayılovun qanunsuz hərəkətləri dözülməz həddə çatıb.
Bakının mərkəzi küçələri olan Füzuli, Şəmsi Bədəlbəyli, Mirzağa Əliyev, Dilarə Əliyeva, R.Rza, Vidadi, M.İbrahimov adına küçələrdə yerləşən yaşayış evləri darmadağın olunur, tarixi tikililər uçurulur, vətəndaşların əmlakı qarət edilir, onlara bunun əvəzində isə qəpik-quruş kompensasiya ödənir. Nəticə etibarı ilə Heydər Əliyev adına Sarayın arxasında əhatə edən yaşayış massivi tamamilə buldozerlə şumlanıb, mənzil sahibləri mərkəzdən sürgün olunub, bir çoxu evsiz-eşiksiz qalıb, bir qismi məhkəməyə müraciət edib, kimisi də məcburiyyət qarşısında kənar yerlərdə darısqal mənzillərə sığınıblar.
Beləliklə, hökumətin Abutalıbovun əli ilə yıxdığı evlərin yerində analoqsuz park tikilməsinə başlanıb. Vətəndaşların mülkiyyət hüquqlarının kütləvi şəkildə tapdanması hesabına bulvar salmağa hazırlaşan hökumət yaxın gələcəkdə böyük zərbə ilə üzləşəcəyini fikirləşməyib. Bir müddət sonra Avropa məhkəməsi vətəndaşların müraciətləri əsasında hökuməti mülkiyyət haqlarını pozmasına görə cərimələyəcək.
Belədə hökumət böyük məbləğdə təzminat ödəmək məcburiyyəti ilə qarşılaşacaq. Ancaq hazırda gedən proses Abutalıbovun və hökumətin vecinə deyil. Onları maraqlandıran tezliklə evlərin sökülməsi, vətəndaşların çıxarılmasıdır. Habelə, mənzil sahiblərinə ödənilən kompensasiyalar da qanunsuz şəkildə verilir. Bu pullar fiziki bir şəxsin bank hesabına köçürülüb və oradan paylanır. Bu isə dövlət planı məqsədi ilə sökülən mülklərə yardım verilməsi prosedurunda hüquqların pozulmasıdır.
İndinin özündə isə M.Əliyev və D.Əliyeva küçələrində məskunlaşan sakinlərin evləri bir-bir dağıdılır. Artıq evi sökməyə gələnlər daha da qəddarlaşıblar. Onlar qoca, körpə, xəstə şəxsləri nəzərə almadan camaatın yuvasını başına uçururlar. Z.İsmayılov başda olmaqla mülk sahibləri ilə kobud danışılır, onlar təhqir olunur, şikayət edənlər isə hədələnir. Məlum olduğu kimi, burada kvadrat metrinə 1500 manatdan kompensasiya verilir.
Mirzağa Əliyev küçəsi, ev 213-də yaşayan Leyla Həsənova qəzetimiz vasitəsi ilə prezident İlham Əliyevdən kömək istəyir. O, mənzili sökülərkən qanunsuzluğa yol verildiyini bildirir. L.Həsənova əmlakının dağıdıldığı zaman evdə olmayıb və baş verənlərdən xəbər tutmayıb. Bundan sonra mənzilinə gələn vətəndaş görüb ki, evdə olan əmlaklar qarət olunub, söküntü zamanı əşyalara ziyan dəyib, bir çoxu itib.
Mənzil sahibi məsələ ilə bağlı Nəsimi Rayon Polis İdarəsinin (RPİ) 21-ci polis bölməsinə müraciət edib. Polisdən vətəndaşın şikayətinə cavab olaraq bildirilib ki, Nəsimi Rayon Məhkəməsinə müraciət etsin. L.Həsənova ona böyük məbləğdə ziyan dəydiyini iddia edir.
Onun sözlərinə görə, məhkəmə qərarı və mənzil sahibinin icazəsi olmadan söküntü işləri aparıla bilməz. Eyni zamanda mənzildə yerləşən avadanlıqlar çıxarılandan sonra söküntü başlana bilər. Amma Bakı Şəhər İcra Hakimiyyətinin 3 ildən çoxdur ki, davam edən qanunsuz evsökmə işləri adıçəkilən vətəndaşın mənzilindən də yan keçməyib.
L.Həsənova qeyd etdi ki, meriyaya dəfələrlə müraciət edib və ona oxşar cavablar verilib. Bildirilib ki, ərazidə plana uyğun olaraq söküntü işləri aparılır və vətəndaşın narazılığı varsa hüquq-mühafizə orqanlarına və BŞİH-in nəzdində yaradılmış komissiyaya müraciət edə bilər. L.Həsənovanın isə adıçəkilən qurumlara artıq heç bir ümidi qalmayıb və çıxış yolunu prezidentə müraciət etməkdə görür.
Şikayətçi “ölkə başçısına müraciət edərək ona köməklik göstərilməsini istədi: “Xahiş edirəm ki, mənə evimə görə ədalətli kompensasiya verilməsində və mənzilimin söküntüsü zaman itən əşyalarımın müqabilində maddi təzminat ödənilməsində yarım göstərin. Cənab prezident, tək ümidim sizədir. Mənim mənzilim cəmi 16 kvadrat metr olub və çox cüzi məbləğdə kompensasiya ödənilib. Bakı meriyası hər kvadrat metrə 1500 manat ödəyir”.
L.Həsənova deyir ki, bu pulla ev ala bilmir: “Uzun illər şəhərin mərkəzində yaşa, axırda da qəpik-quruş verib səni yuvandan qovsunlar. Belə haqsızlıq olarmı? Nə Xırdalanda, Masazırda, nə başqa kənar ərazilərdə bu pula mənzil tapmaq olmur. Hörmətli prezidentdən xahiş edirəm ki, mənə kömək etsin. Evsiz-eşiksiz qalmışam, qohum-əqrəbanın evində yaşamağa məhkumam”.

Mirzə Həsən