Məlumdur ki, Azərbaycan Prezidenti İlham Əliyev Azərbaycanın bütün şəhər və rayonlarının inkişafına xüsusi diqqət və qayğı göstərir, vaxtaşırı olaraq Prezidentin Ehtiyat Fondundan abadlıq və quruculuq, təmir-bərpa işləri üçün vəsait ayırır. Prezident Sumqayıt şəhərinin inkişafı, aparılan təmir işlərinin başa çatdırılması üçün dəfələrlə vəsait ayırıb. Sumqayıtın keçmiş icra başçısı Eldar Əzizovun dövründə bir neçə dəfə milyonlarla vəsait ayrıldı və icra başçısı hər dəfə müsahibə verəndə deyirdi ki, Sumqayıt inkişaf edəcək, bulvar olacaq və s. Sumqayıtlılar bir neçə il bu nağıllarla aldadıldılar və bir gün Eldar Əzizov vəd etdiyi möcüzələri yaratmamış Səbayel rayonuna icra başçısı təyin olundu. Alınan milyonlar necə oldu, hara xərcləndi məlum olmadı, Eldar Əzizov hesabatı da deyəsən özü ilə apardı.
Bu dəfə sumqayıtlılar ümidlərini yeni gələn icra başçısı Zakir Fərəcova bağladılar ki, Sumqayıt sakinidir, şəhər əhalisinin əksəriyyətinin aztəminatlı olduğunu bilir, problemlərinə bələddir, gələn kimi yeni iş yerləri açılmasına çalışacaq, camaatın güzəranının qayğısına qalacaq, şəhəri abadlaşdıracaq, evlərin damı, zirzəmiləri düzələcək, yaşıllıqlar artacaq. Prezidentin ard-arda sərəncam verib Sumqayıta yenə də Ehtiyat Fondundan bir neçə dəfə vəsait ayırması da bu ümidləri gücləndirdi. Həmin vəsaitlərin miqdarı və onun xərclənməsi ilə bağlı 24saat.org olaraq araşdırma apardıq.
Sumqayıta nə qədər pul ayrılıb?
Zakir Fərəcov 2015-ci il sentyabrın 2-də Sumqayıta icra başçısı təyin olundu. Prezidentin sərəncamı ilə 2015-ci il oktyabrın 13-də Sumqayıt şəhərində çoxmənzilli binaların lift təsərrüfatının maddi-texniki bazasının möhkəmləndirilməsi üçün Sumqayıt Şəhər İcra Hakimiyyətinə Azərbaycan Respublikasının 2015-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 3,7 milyon (üç milyon yeddi yüz min) manat, 2015-ci il dekabrın 15-də Sumqayıt şəhərində çoxmənzilli binaların dam örtüklərinin dəyişdirilməsi və zəruri təmir işlərinin həyata keçirilməsi üçün Sumqayıt Şəhər İcra Hakimiyyətinə Azərbaycan Respublikasının 2015-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 5,0 (beş) milyon manat, 2016-cı il martın 3-də isə Sumqayıt şəhərində çoxmənzilli binalarda zəruri təmir işlərinin davam etdirilməsi məqsədi ilə Sumqayıt Şəhər İcra Hakimiyyətinə Azərbaycan Respublikasının 2016-cı il dövlət büdcəsində nəzərdə tutulmuş Azərbaycan Prezidentinin ehtiyat fondundan 9 milyon manat, o cümlədən çoxmənzilli binaların dam örtüklərinin dəyişdirilməsi üçün 6,5 milyon manat, lift təsərrüfatının maddi-texniki bazasının möhkəmləndirilməsi üçün 2,5 milyon manat vəsait ayrılıb. Ümumilikdə Zakir Fərəcovun icra başçısı təyin olunduğu 7 ay ərzində Sumqayıta Prezidentin Ehtiyat Fondundan 17.7 milyon manat pul ayrılıb. Bəs görəsən bu qədər pul hara xərclənib?
Milyonlar necə və hara xərclənir?
Bu suala cavab tapmaq üçün şəhərdə ümumi müşahidə apardıqda məlum oldu ki, şəhərin ancaq mərkəzi küçələrində abadlıq işləri görülür, onların da çoxu elə əvvəlki başçının dövründən qalmadır. Z. Fərəcov şəhərə gələndən ancaq keçmiş başçının qoyduğu qadağaları götürməklə məşğul olub. İcra Hakimiyyətinin qarşısındakı yolu açıb, Bayraq Meydanında fontanlar bərpa edilir, Sumqayıtın iki inzibati əraziyə bölünməsi barədə qərar ləğv olunub, hazırda Kimyaçılar klubunun qarşısındakı bağlı yolun açılması gözlənilir və s. Bir də 5-ci, 17-ci mikrorayonlarda bəzi binaların dam örtüyünün dəyişdirilməsi istiqamətində işlər görülüb ki, hazırda o işlərin də fəhlələr pullarını ala bilmədikləri üçün dayandığı deyilir.
Z.Fərəcov icra başçısı təyin olunandan ancaq söküntü xəbərləri eşidilib. Dəniz kənarında hasarlanmış ərazilərin bir hissəsi sökülsə də, bəziləri, hansı ki, vəzifəli şəxslərə məxsusdur, onlara toxunulmayıb. Bu da şəhərdə ayrı-seçkiliyin olduğunu göstərir. Elə MİS rəisləri də bundan ruhlanıb mikrorayon və məhəllələrdə vətəndaşlar arasında ayrı-seçkiliyi davam etdirirlər və onlara dur deyən yoxdur. Şəhərin 11-ci və 13-cü mikrorayonlarında da demək olar ki, aztəminatlı insanlar yaşayır. Binaların damları, zirzəmilər bərbad vəziyyətdədir, amma hələ ki , heç bir təmirdən söhbət getmir. Şəhərin mərkəzi küçələri şüşə kimi asfaltlansa da mikrorayonlar, xüsusilə 9, 11 və 13-cü mikrorayonların yolları böyrək daşı xəstəliyindən əziyyət çəkənlər üçün əla müalicə vasitəsidir.
Qurd dərəsində çəkilən yol
Yol məsələsi ilə bağlı 24saat.org olaraq maraqlı bir faktın da üstünü açdıq. Belə ki, Z.Fərəcov Sumqayıta icra başçısı təyin olunduqdan az sonra şəhərin cənub çıxışında, Saray qəsəbəsinə bitişik “Qur dərəsi” adlanan bağlar massivində uzun illər bərbad vəziyyətdə olan yol yüksək səviyyədə təmir edilib. İlk baxışda bu yaxşı haldır. Amma faktın görünməyən tərəfi ilgincdir. Belə ki, 24saat.org-a daxil olan məlumata görə bu yol Sumqayıtın yeni icra başçısının atasının yaşadığı bağ evi üçün xüsusi olaraq çəkilib. Bizim tərəfimizdən ərazidə aparılan videoçəkilişdə də yolun məqsədli istiqamət üzrə çəkildiyi və digər hissələrin bərbad vəziyyətdə olduğu açıq aydın görünür. Eyni zamanda redaksiyamıza daxil olan məlumata görə bu yolun çəkilişi Sumqayıtın sabiq bələdiyyə sədri Əbülfəz Babayevin üzərinə qoyulub. Bu xərc müqabilində bələdiyyə sədrinin yeyintilərinə göz yumulmasına söz verilsə də yol çəkildikdən sonra Ə.Babayevin işi prokurorluğa verilib.